ۇن ەكسپورتى نەلىكتەن تومەندەپ كەتتى

نۇر- سۇلتان. قازاقپارات – ق ر اۋىل شارۋاشىلىعى ءمينيسترى ساپارحان وماروۆ قازاقستاندىق ۇننىڭ نەلىكتەن ەكسپورتى تومەندەگەنىن ءتۇسىندىردى، دەپ حابارلايدى قازاقپارات ءتىلشىسى.

«سوڭعى جىلدارى بيداي ەكسپورتى ارتىپ كەلەدى. الايدا ۇن ەكسپورتىنىڭ كولەمى ءالى وسكەن جوق. قازىر ۇن ەكسپورتى ءتىپتى تومەندەگەنىن ايتا كەتۋ كەرەك. مۇنىڭ ءبارى نارىقتىق ماسەلەلەرگە كەلىپ تىرەلەدى. بۇرىن وزبەكستان كوپ مولشەردە ۇن ساتىپ الاتىن، ءبىراق قازىر ولار وزدەرى دە، تاجىكستاندا ديىرمەندەردى سالا باستادى. ءبىزدىڭ ۇننىڭ نەگىزگى نارىعى - اۋعانستان»، - دەدى ساپارحان وماروۆ سەناتتىڭ اگرارلىق ماسەلەلەر، قورشاعان ورتانى قورعاۋ جانە اۋىلداردى دامىتۋ كوميتەتىنىڭ كەڭەيتىلگەن وتىرىسىندا دەپۋتاتتاردىڭ سۇراقتارىنا جاۋاپ بەرە وتىرىپ.

الايدا، ونىڭ ايتۋىنشا، پاكىستان جاقىندا اۋعانستان نارىعى بويىنشا قازاقستاننىڭ باسەكەلەسىنە اينالعالى وتىر.

«پاكىستاندا ەگىن ءتۇسىمى جاقسى بولعان كەزدە ءبىز ءۇشىن اۋعانستانعا ۇن ساتۋدا قيىندىقتار تۋىنداي باستايدى. بىزگە ءونىمنىڭ جاڭا نارىقتارىن اشۋ قاجەت. پرەزيدەنتتىڭ ق ح ر- عا ساپارى كەزىندە قىتايدىڭ تەك ءبىر پروۆينتسياسىمەن كەلىسىمگە كەلدىك. ولار ايىنا 5 مىڭ تونناعا دەيىن ۇن ساتىپ الۋعا دايىن وتىر. ءبىز تەك ۇن ەكسپورتىمەن شەكتەلىپ قالماۋىمىز كەرەك. تەرەڭ وڭدەلگەن ونىمدەردى ساتۋعا تىرىسقان ابزال. مىسالى، ماكارون، كراحمال جانە تاعى باسقا ونىمدەردى شىعارعان ءجون. قازىر ءبىز 4 ميلليون تونناعا جۋىق ۇن وندىرەمىز، ونىڭ 1,7 ميلليون تونناسىن ءوزىمىز پايدالانامىز، ال 2,2 ميلليون تونناسىن ەكسپورتقا شىعارامىز، تاعى 100 مىڭ توننا اينالىپ كەلگەندە وزىمىزدە قالادى»، - دەدى مينيستر.

ايتا كەتسەك، اتالمىش وتىرىستا «اگروونەركاسىپ كەشەنىن رەتتەۋ ماسەلەلەرى بويىنشا ق ر- نىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.

اۆتور ايان بەكەن ۇلى