نۇرسۇلتان نازاربايەۆ ماسكەۋدەگى قازاقستان ەلشىلىگىندە بولدى
14:19, 08 - قىركۇيەك 2019
ماسكەۋ. قازاقپارات - جۇمىس ساپارىمەن رەسەيدە جۇرگەن قازاقستاننىڭ تۇڭعىش پرەزيدەنتى نۇرسۇلتان نازاربايەۆ ماسكەۋدەگى قازاقستان ەلشىلىگىندە قوناق بولدى، دەپ حابارلايدى قازاقپارات ەلشىلىكتىڭ باسپا ءسوز قىزمەتىنە سىلتەمە جاساپ.
دەلەگاتسيا قۇرامىندا سونداي-اق ق ر پرەمەر-ءمينيسترى اسقار مامين جانە ق ر سىرتقى ىستەر ءمينيسترى بەيبىت اتامقۇلوۆ بار.
قوناقتاردى قوشەمەتپەن قارسى العان قازاقستاننىڭ رەسەي فەدەراتسياسىنداعى ەلشىسى يمانعالي تاسماعامبەتوۆ ەلشىلىكتىڭ جوندەۋدەن وتكەن عيماراتىن ارالاتىپ، كورسەتىپ شىقتى. ودان بولەك، دەلەگاتسيا قازاقستان- رەسەي قارىم-قاتىناسىنا ارنالعان مۋزەيدى تاماشالاپ، سيرەك كەزدەسەتىن ەكسپوناتتارمەن تانىستى.
نۇرسۇلتان نازاربايەۆ جينالعان ديپلوماتتارعا تابىس پەن ساتتىلىك تىلەدى.
ەسكە سالا كەتەيىك، قازاقستاننىڭ تۇڭعىش پرەزيدەنتى ماسكەۋدە حالىق شارۋاشىلىعى جەتىستىكتەرى كورمەسىندەگى «قازاقستان» پاۆيلونىنىڭ اشىلۋ راسىمىنە قاتىستى.