گولليۆۋدتىڭ تانىمال كينوپروديۋسەرلەرى قازاقستانعا كەلەدى

نۇر-سۇلتان. قازاقپارات - ا ق ش- تىڭ كينو سالاسىنىڭ ايگىلى ماماندارى وتاندىق كينو يندۋستريامەن قاتار ەلىمىزدىڭ تابيعاتى جانە ارحيتەكتۋراسىمەن تانىساتىن بولادى.

بۇل تۋرالى ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى اندرەي حازبۋلاتوۆ XV حالىقارالىق «ەۋرازيا» كينوفەستيۆالىنىڭ وتۋىنە وراي ق ر مادەنيەت جانە سپورت مينيسترلىگىندە وتكەن باسپا ءسوز ءماسليحاتىندا ءمالىم ەتتى، دەپ حابارلايدى قازاقپارات ءتىلشىسى.

«Warner Bros.، LIONSGAT، NBC Universal, Warner Horizon, The Discovery, Global Film Solutions سەكىلدى گولليۆۋدتىڭ كينو كومپانيالارىنىڭ پروديۋسەرلەرى قازاقستاندا كەلەدى. ءبىز ولار ءۇشىن FAM (Familiarization) تۋر ۇيىمداستىرماقپىز. ولار ءبىزدىڭ ەلىمىزدىڭ الۋان ءتۇرلى فيلمگە ارنالعان لوكاتسيا جانە پەيزاجدارىمەن تانىسادى. سونداي-اق، قازاق فيلم كينوستۋدياسىنىڭ جۇمىسىن كورسەتەمىز. ودان بولەك، نۇر-سۇلتان، الماتى قالالارىنىڭ ارحيتەكتۋرالىق نىساندارىمەن قاتار، الماتى وبلىسى مەن ەلىمىزدىڭ باتىس وڭىرلەرىن كورسەتەتىن بولامىز. گولليۆۋدتىڭ پروديۋسەرلەر توبى ەلىمىزدە ءبىر اپتا بويى بولىپ اتالعان وڭىرلەردى كورىپ شىعادى»، - دەدى ا. حازبۋلاتوۆ.

ودان بولەك، ورتالىق باسشىسى ۇلتتىق فيلمدەر وندىرىسىنە قولداۋ ءبىلدىرۋ ماقساتىندا كينوجوبالارعا بايقاۋ جاريالانعانىن ايتىپ ءوتتى.

«جۋىردا وتەتىن ەۋرازيا حالىقارالىق كينوفەستيۆالىنىڭ اياسىندا ءبىزدىڭ ورتالىق بىرلەسىپ كينو تۇسىرۋگە ءوتىنىم قابىلداۋدى اشىق دەپ جاريالايدى. ياعني كينوجوبالاردى قابىلداپ، ىرىكتەۋدەن وتكەن اۆتورلار ءوز جوباسىن قورعايدى. قورعاۋدان سوڭ ءساتتى دەپ تانىلعان جاعدايدا كينوتۋىندىنى ورتالىقتىڭ قولداۋىمەن، بىرلەسىپ جۇزەگە اسىراتىن بولامىز»، - دەدى ا. حازبۋلاتوۆ.

اتالعان كينوجوبالار بايقاۋىنا قاتىستى تولىق اقپاراتتى www.filmkazakhstan.com سايتى ارقىلى تانىسۋعا بولادى. ءوز كەزەگىندە امەريكاندىق «جاھاندىق ساياسات باستامالارى» كومپانياسىنىڭ پرەزيدەنتى دجەي فيتلۋك قازاقستان مەن ا ق ش- تىڭ كينو سالاسى ماماندارىنىڭ قولعا الىپ وتىرعان بىرلەسكەن جوباعا قاتىستى ءوز پىكىرىن ءبىلدىردى.

«ءيا، كينوفەستيۆال اياسىندا امەريكانىڭ بەدەلدى كينوپروديۋسەرلەرىن شاقىرىپ وتىرمىز. نەگىزىنەن العاندا بۇل ەكى جاق ۇشىندە ءتيىمدى ۇسىنىس بولىپ تابىلادى. بىرىنشىدەن، قازاقستاننىڭ ىشكى كينويندۋسترياسىن ىلگەرىلەتۋگە اسا ءمان بەرىلسە، ەكىنشىدەن گولليۆۋد ءۇشىن قازاقستان جاڭا ءارى قىزىقتى گەوگرافيالىق ايماق. تاعى ءبىر ەرەكشە ايتىپ وتەتىن جايت، بۇل جوبا قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ ا ق ش- قا رەسمي ساپارى كەزىندەگى كەزدەسۋلەردىڭ ناتيجەسىندە جۇزەگە اسىرىلعالى وتىر. ويتكەنى، ءدال سول كەزدە سىزدەردىڭ مەملەكەت باسشىلارىڭىز ا ق ش- تىڭ كينويندۋستريا قاۋىمداستىعىنىڭ باسشىسى گەيل ماككيننونمەن كەزدەستى. كەزدەسۋ بارىسىندا كينو ونەرى سالاسىندا ەكىجاقتى بىرلەسىپ جۇمىس ىستەۋ كەلىسىمىنە قول جەتكىزدى»، - دەدى ول.

ايتا كەتسەك، بۇعان دەيىن قازاقستاندا ايگىلى «فورساج» فيلمىنىڭ ەپيزودىن ءتۇسىرۋ مۇمكىندىگى قاراستىرىلىپ جاتقانىن حابارلاعان بولاتىنبىز.