بەيجىڭ - پاريج كونە رالليىنە قاتىسۋشىلار بۇگىن ەلورداعا كەلەدى
الەمنىڭ 30 دان استام ەلىنىڭ 120 بىرەگەي سيرەك كەزدەسەتىن اۆتوموبيلىن Marriott قوناق ءۇيىنىڭ كولىك تۇراعىندا (دوستىق كوشەسى، 2) 17 -ماۋسىمدا ساعات 16.30-20.00 ارالىعىندا كورۋگە بولادى. ءۇش جىلدا ءبىر رەت وتەتىن بەيجىڭ- پاريج رالليى - 1907 -جىلى العاش رەت ۇيىمداستىرىلعان اۆتوموبيل جارىسى. كولىكتەر بەيجىڭنەن (قىتاي) پاريجگە (فرانسيا) دەيىن 14994 ك م قاشىقتىقتى ءجۇرىپ وتەدى. وعان تەك 1976 -جىلعا دەيىن شىعارىلعان كولىكتەر عانا قاتىسا الادى.
مىسالى، Bentley, Lancia, Packard, Horch جانە قۇنى ميلليون ەۋروعا دەيىنگى باسقا سيرەك كەزدەسەتىن كولىكتەر.
اۆتوجارىس بەيجىڭنەن باستالادى. قاتىسۋشىلار قىتايدى ارالاپ، 5 كۇن موڭعوليا، التاي (رەسەي)، قازاقستان، رەسەي، ەۋروپا جانە فرانسيا ەلدەرىنىڭ اۋماعىنان وتەدى. ايتا كەتەيىك، بيىل ايگىلى راللي العاش رەت بۇكىل قازاقستان ارقىلى وتەدى. 16 -ماۋسىمدا شاراعا قاتىسۋشىلار پاۆلوداردا، كەلەسى كۇنى نۇر-سۇلتاندا، سودان كەيىن بالكاشينو كەنتىنە توقتايدى. جول ۇستىندە رەترو اۆتوموبيلدەر بۋرابايعا سوعادى. رالليگە قاتىسۋشىلار قازاقستاندا ات باسىن بۇراتىن ەڭ سوڭعى قالا - قوستاناي. «بەيجىڭ- پاريج» رالليىن ۇيىمداستىرۋشى - Endurance Rally Association (ERA) (لوندون).
جارىستى ۇيىمداستىرۋ يدەياسىن LeMatin فرانسۋز گازەتى ۇسىنعان. ول ونى 1907 -جىلعى 31 -قاڭتارداعى سانىندا جاريالاعان.
«ادامدار كولىك بار كەزدە قالاعان جەرىنە بارا الاتىنىن، قالاعانىن ىستەي الاتىنىن دالەلدەۋى كەرەك. بيىل جازدا بەيجىڭنەن پاريجگە دەيىن اۆتوموبيلمەن جولعا شىعۋعا بەل بۋاتىندار ما ەكەن؟»، دەلىنگەن العاشقى ماقالادا.