قازاقتىڭ اندەرىن راديو ارقىلى تىڭدادىم - كورەيانىڭ ءبىرىنشى حانىمى

 نۇر- سۇلتان. قازاقپارات - بۇگىن كورەيا پرەزيدەنتى مۋن چجە يننىڭ جۇبايى، وسى ەلدىڭ ءبىرىنشى حانىمى كيم چجون سۋك قازاق اندەرىن قالاي تىڭداعانىن ايتتى، دەپ حابارلايدى قازاقپارات ءتىلشىسى.

"قازاق پەن كارىس تىلدەرى التاي توبىنا جاتاتىنىن بىلەمىن. وكىنىشكە قاراي، قازاق ءتىلىن ۇيرەنگەن جوقپىن. سول ءۇشىن تاعى ءبىر مارتە كەشىرىم سۇرايمىن. قازاق جاستارى كارىس مۋزىكاسىن ۇناتادى دەپ ەستىگەنمىن. بۇگىن مەن دە تاڭ اتا راديو ارقىلى قازاقتىڭ تانىمال اندەرىن تىڭدادىم. ءسوزىن تۇسىنبەدىم. ءبىراق اندەردىڭ اۋەنى وتە كوڭىلدى، ادامعا كادىمگىدەي ەنەرگيا بەرەدى ەكەن. مەن ءۇشىن بۇل - جاڭا تاجىريبە، جاڭا تانىم"، - دەدى كيم چجون سۋك نازاربايەۆ ۋنيۆەرسيتەتىنىڭ ستۋدەنتتەرىمەن بولعان كەزدەسۋدە.

 وسى ورايدا كورەيانىڭ ءبىرىنشى حانىمى ك-pop ونەرىنە قىزىعىپ جۇرگەن جاستاردىڭ ەكى ەلدىڭ مادەني بايلانىستارىن كۇشەيتەتىنىنە سەنىم ءبىلدىردى. "سىزدەر قازاقستان مەن كورەيا اراسىنداعى كوپىر ىسپەتتى مادەني بايلانىستاردى كۇشەيتە الاسىزدار. سىزدەر كورەيانىڭ مادەنيەتىن وسىنشاما جاقسى تۇسىنسەڭىزدەر، كارىس ءتىلىن دە ۇيرەنە الاسىزدار. سوندا ءبىز ءبارىمىز بىرىگە الامىز. راقمەت سىزدەرگە! "، - دەدى كيم چجون سۋك.

 

 ايتا كەتەيىك، بۇگىن كورەيانىڭ ءبىرىنشى حانىمى كيم چجون سۋك نازاربايەۆ ۋنيۆەرسيتەتىن ارالاپ، ستۋدەنت جاستارمەن كەزدەستى. وعان اللىمەن ۋنيۆەرسيتەتتە قۇرىلعان ك-pop كلۋبىنا مۇشە جاستاردىڭ ونەرى تانىستىرىلدى. كلۋب جەتەكشىسى ايىم داۋىلبەكوۆانىڭ ايتۋىنشا، بيىل كلۋبتىڭ قۇرىلعانىنا بەس جىل تولىپ وتىر. وسىعان وراي، كونسەرت تە ۇيىمداستىرىلعان بولاتىن. ال كورەيانىڭ مادەني ورتالىعى قولداۋ جاساپ وتىرادى. "بۇگىندە ءبىزدىڭ كلۋبىمىزعا 45 ادام كىرەدى. بارلىعى - نازاربايەۆ ۋنيۆەرسيتەتىنىڭ ستۋدەنتتەرى. ماگيسترانتتار دا بار. اپتاسىنا ءتورت رەت جاتتىعىپ وتىرامىز. الايدا كونتسەرتتەردىڭ الدىندا كۇندە دايىندالامىز. رەسمي اتاۋىمىز - "NU Kpop cover dance club". ال توپتىڭ اتاۋى - "Yeoboseyo". وسى اتپەن سان الۋان جارىستارعا قاتىسىپ وتىرامىز. بۇعان دەيىن تەك ۋنيۆەرسيتەت اياسىندا عانا ونەر كورسەتتىك. ال بىلتىر چانۆون فەستيۆالىنە قاتىستىق. بيىل دا شاقىرىپ جاتىر"- دەدى ا. داۋىلبەكوۆا قازاقپارات تىلشىسىنە بەرگەن سۇحباتىندا.

 كورەيانىڭ ءبىرىنشى حانىمىنا "Yeoboseyo" توبىنىڭ ونەرى ۇناپ قالدى. ءتىپتى، وزىمەن بىرگە تانىمال ك-pop ارتىستەرىن الىپ كەلمەگەنىنە دە وكىنىپ قالدى. "سىزدەرمەن تانىسقانىما وتە قۋانىشتىمىن. ك-pop ونەرىن ۇناتاتىندارىڭىز بيدەن كورىنىپ تۇر. سول ءۇشىن العىسىمدى ايتامىن. وزىمەن بىرگە كورەيانىڭ تانىمال ك-pop بيشىلەرىن الىپ كەلۋ كەرەك ەدى. وكىنىشكە قاراي، شىقپاي قالدى. سول ءۇشىن كەشىرىم سۇرايمىن. كەلەسى جولى مىندەتتى تۇردە الىپ كەلۋگە تىرىسامىن"، - دەپ اتاپ كورسەتتى كيم چجون سۋك.