بۇل تۋرالى قازاقپارات تىلشىسىنە بەرگەن سۇحباتىندا قازىرگى قۇقىق ينستيتۋتىنىڭ ديرەكتورى، زاڭ عىلىمدارىنىڭ دوكتورى، پروفەسسور يسيدور بورچاشۆيلي تەرەڭىرەك ايتىپ بەردى.
ايتا كەتسەك، ماجىلىسمەندەر جاقىندا عانا «قورعانىس ونەركاسىبى جانە مەملەكەتتىك قورعانىس تاپسىرىسى تۋرالى» زاڭ جوباسىن ەكى وقىلىمدا ماقۇلداعان بولاتىن. ول قۇجات بويىنشا، جەڭىل ونەركاسىپ سالاسىنداعى وتاندىق وندىرۋشىلەر كونتسورتسيۋمى قورعانىس سالاسىنداعى مەملەكەتتىك تاپسىرىستى ورىنداۋدان شەت قالعان.
- يسيدور شاميلوۆيچ، جەڭىل ونەركاسىپ سالاسىنداعى وتاندىق وندىرۋشىلەردىڭ كونسورسيۋمىنىڭ قورعانىس سالاسىنداعى مەملەكەتتىك تاپسىرىستى ورىندالۋىنان زاڭدى تۇردە شەتتەتىلۋىنە قاتىستى قانداي پىكىر بىلدىرەر ەدىڭىز؟
- بىرىنشىدەن، وزدەرىڭىز بىلەتىندەي، ءبىزدىڭ ەلىمىزدە كاسىپكەرلىكتى دامىتۋ تۋرالى كونستيتۋتسيانىڭ 26-بابى 4-بولىگىندە: «رەسپۋبليكانىڭ ءاربىر ازاماتى كاسىپكەرلىكپەن اينالىسۋعا قۇقىلى» ەكەنى جازىلعان. ەكىنشىدەن، ءبىزدىڭ مەملەكەت باسشىسى ەلدەگى كاسىپكەرلىكتىڭ دامۋىنا قانشالىقتى نازار اۋدارىپ وتىرعانىن وزدەرىڭىز بىلەسىزدەر.
وسى جىلدىڭ 10 -قاڭتارى مەن 5 -قازانىنداعى ەكى جولداۋىندا دا ەلباسى كاسىپكەرلىكتىڭ دامۋىنا، اسىرەسە جەڭىل ونەركاسىپتى وركەندەتۋگە ماڭىز بەرۋ كەرەكتىگىن اتاپ وتكەن ەدى. الايدا قازىرگى تاڭدا ەكى وقىلىمدا ءماجىلىس جەڭىل ونەركاسىپ سالاسىنداعى وتاندىق وندىرۋشىلەردىڭ كونسورسيۋمى قورعانىس سالاسىنداعى مەملەكەتتىك تاپسىرىستى ورىنداي الاتىن نورما الىنىپ تاستالعان زاڭ جوباسىن قابىلدادى.
- دەمەك، ماجىلىستە قارالماي تۇرىپ، كونسورسيۋمدار ءتيىستى ورگانداردىڭ ماقۇلداۋىمەن زاڭ جوباسىندا ەنىپ تۇرعان بولدى عوي؟
- ءيا. كونسورسيۋم تۋرالى زاڭ جوباسىنىڭ بولىگىن ۇكىمەت قولداعان ەدى. ۇكىمەتتىڭ بۇل قورىتىندىسىن پرەزيدەنت اكىمشىلىگى دە ماقۇلدانعان. كونسورسيۋمنىڭ مۇشەلەرى زاڭ جوباسىن ازىرلەۋدە جۇمىس توبىنىڭ قۇرامىندا بولدى. الايدا جۇمىس توبىنىڭ كەزەكتى وتىرىستارىنىڭ بىرىندە كونسورسيۋم مەملەكەتتىك قورعانىس تاپسىرىسىن ورىنداي الاتىن نورمانىڭ الىنىپ تاستالعانى انىقتالدى.
- ەندىگى كەزەكتە وتاندىق وندىرۋشىلەر قورعانىس سالاسىنداعى مەملەكەتتىك تاپسىرىستاردىڭ ورىندالۋىنا قاتىسا الا ما؟
- ازاماتتىق كودەكستىڭ 233-بابىنا سايكەس، كونتسورتسيۋم - زاڭدى تۇلعالاردىڭ ەركىن بىرلەستىگىن قۇرۋعا رۇقسات بار. الايدا مينيسترلىكتەگىلەر مەملەكەتتىك قورعانىس تاپسىرىسى سالاسىندا زاڭدى تۇلعالار جەكە، ياعني كونسورسيۋمعا بىرىكپەي جۇمىس ىستەي الادى دەگەنگە كەلتىرەدى.
- قالاي ويلايسىز، ولاردىڭ بۇل تۇجىرىمعا سۇيەنۋىنىڭ سەبەبى نەدە؟
- كونسورسيۋمدار قورعانىس سالاسىنداعى تاپسىرىستارعا قاتىسا الۋى ءۇشىن ەشقانداي قۇقىقتىق كەدەرگى بولماۋى كەرەك.
- اتالمىش زاڭ جوباسى قابىلدانعان جاعدايدا قانداي ماسەلەلەر تۋىنداۋى مۇمكىن؟
- ەگەر كومپانيالار جەكە-جەكە مەملەكەتتىك تاپسىرىستى ورىنداۋعا كوشسە، جەمقورلىقتى تۋىنداتار جاعدايلار كوپتەپ ورىن بەرىلىپ كەتۋى مۇمكىن. وسىلايشا، جەڭىل ونەركاسىپ سالاسىندا زاڭدى تۇلعالاردىڭ بىرلەستىگىنە قولداۋ بىلدىرمەۋ ارقىلى مەملەكەت ارى قاراي قىتاي مەن وزبەكستاننان كەلەتىن شيكىزاتتارعا اقشاسىن جۇمساي بەرەتىن بولادى.