سول كىتاپتىڭ ءبىر تاراۋىندا اۆتور «ساتتىلىككە جەتەم دەگەن كەز كەلگەن ادام 3 سۇراققا جاۋاپ بەرۋى كەرەك» دەپ ەسەپتەيدى. ول قانداي سۇراقتار ەكەن؟ ءبىز فارراح گرەيدىڭ 3 سۇراعىن اۋدارىپ ۇسىنامىز.
ءبىرىنشى سۇراق: باسقالار قينالىپ جاسايتىن قانداي جۇمىستى ءسىز وڭاي اتقاراسىز؟
نە ءۇشىن ماقتاۋ ەستيتىنىڭىزدى ەسكە الىڭىز. ءسىزدىڭ قولىڭىزدان جاقسى كەلەتىن ءبىر-ەكى جۇمىستىڭ بار ەكەنى انىق. جانە ول جۇمىسىڭىز ەلەۋسىز قالماسا كەرەك. ادامداردىڭ ءسىزدىڭ جۇمىسىڭىزدى ەلەپ- ەسكەرىپ، ماقتاۋ ايتاتىن سەبەبى ادەتتە وزدەرىنىڭ سول جۇمىسقا بەيىمى جوقتىعىنان بولىپ جاتادى.
ولار ءسىزدىڭ قولىڭىزدان كەلگەن جۇمىستى ىستەي المايدى.
كەيدە ءسىزدى قورشاعان ادامدار سىزگە بىرەگەي تۇلعا دەپ باعا بەرىپ، بويىڭىزداعى ەرەكشە دارىندى جوعارى باعالاپ جاتادى. ادامدار وزدەرىندە جوق دارىنعا تامسانۋعا بەيىم.
بۇنىڭ الدەبىر شەكتەن تىس دارىن بولۋى مىندەتتى ەمەس. اڭگىمە رومانتيكالىق حات جازۋ، ءدامدى تاعام دايىنداۋ، گۇل شوعىن قولدان جاساۋ سياقتى ەڭ قاراپايىم ىستەر جايىندا بولۋى مۇمكىن.
وتىرىڭىز دا، اسىقپاي وسى ساۋال جايلى ويلانىڭىز. ويىڭىزعا كەلگەننىڭ ءبارىن جازىپ الىڭىز. ءسىز جايىندا ادامدار قانداي ماقتاۋ ءسوز ايتادى؟ اقشا تابۋعا جارايتىن قانداي قابىلەتتەرىڭىز بار؟ ەسىڭىزدە بولسىن، ءسىزدىڭ جۇمىسىڭىز وزىڭىزگە وتە قاراپايىم بولىپ كورىنۋى مۇمكىن. ءسىزدىڭ مىقتى جاعىڭىزدى باعالامايتىنىڭىز سونشالىق، جاي عانا ونى ەلەمەيسىز. ءوز دارىنىمىزعا ءبىز ءوز- وزىنەن بولاتىن نارسە دەپ قاراۋعا بەيىمبىز. سوندىقتان دارىنىڭىزدى سىرتقا شىعارىپ، ءوز قىزىعۋشىلىعىڭىزعا پايدالانۋعا تىرىسىڭىز.
ەكىنشى سۇراق: اقشا تولەمەسە دە، قانداي ىسپەن شارشاماستان اينالىسار ەدىڭىز؟
ءسۇيىپ ىستەيتىنىڭىز سونشا، اقشا تۋرالى ويلاماي ىستەيتىن جۇمىسىڭىزدى ەسكە الىڭىز. ءار ادامعا جۇمىسىن جەك كورسە دە، جالاقى العاندى جاقسى كورەتىن جاندار جاقسى تانىس. ءبىراق اقشا الاتىن ۋاقىت وتەدى دە شىعادى. ال ەندى وزىڭىزگە ۇنايتىن ىسپەن اينالىسىپ اقشا تاپقانىڭىزدى ەلەستەتىڭىز. ماتەريالدىق جاعداي جۇمىستىڭ جاعىمدى قوسىمشاسى عانا بولماق. اقشا جۇمىس ورنىن تاڭداۋدىڭ نەگىزگى سەبەپكەرى بولماۋى ءتيىس.
مەن سويلەسكەن كوپتەگەن تابىستى ادام قارجى تۋرالى ايتقاندى ۇناتپايدى، ەسەسىنە وزدەرىنە ۇناعاندىقتان قالاي جۇمىسباستى بولىپ كەتەتىندەرىن قۋانا- قۋانا ايتىپ وتىرادى. ەگەر ءسىز جۇمىسىڭىزعا «عاشىق بولا الساڭىز»، اقشا ءوز قامىن ءوزى جاسايدى.
سوندىقتان فينانس ماسەلەسىن كولەڭكەدە قالدىرا تۇرىپ، سىزدەن تاعى دا ويلانۋىڭىزدى سۇرايمىن: بىرنەشە جىل بويى سىزگە اقشا تولەمەسە دە، قانداي ىسپەن اينالىسار ەدىڭىز؟ ويىڭىزعا كەلگەننىڭ ءبارىن جازىپ الىڭىز. بۇل جەردە باستى ءرولدى اقشا ەمەس، ءسىزدىڭ قىزىعۋشىلىعىڭىز الۋى كەرەك. بار جانىڭىزدى سالىپ قانداي جۇمىستى جاسايتىنىڭىز جايلى ويلانىڭىز.
ءۇشىنشى سۇراق: قوعام الدىنداعى مىندەتىڭىزدى قايتارۋ ءۇشىن قانداي قىزمەت اتقارار ەدىڭىز؟
قانشالىقتى كوپ بەرسەك، سونشالىقتى كوپ الامىز. مەن وسىعان وتە قاتتى سەنىمدىمىن. تۇپتەپ كەلگەندە بىرەۋدىڭ ءومىرىن جاقسارتقانىڭىزدى تۇسىنگەن كەزدەگى قاناعاتتانۋ سەزىمىنە ەشتەڭە جەتە قويماس. وزىڭىزگە قويۋ كەرەك ءۇشىنشى سۇراق - قوعام مەن تۇتاس الەم الدىنداعى مىندەتىڭىزدى قايتارۋ جايىندا.
بۇل - تەڭدىكتىڭ جەكە جانە وتە ماڭىزدى بولىگى. بۇعان نە كىرگىزەم دەسەڭىز دە، ءوز ەركىڭىزدە، ماسەلەن: قوعامدىق جۇمىسقا ءوز ەركىڭىزبەن قاتىسۋ، قارجىلاي قامقورلىق تانىتۋ، ءوزىڭىزدىڭ قولىڭىزدان جاقسى كەلەتىن ءىستى بىرەۋگە ۇيرەتۋ، قايىرىمدىلىق شارالارىنا قولداۋ ءبىلدىرۋ، ادامداردى وزدەرىنە اسا قاجەت زاتپەن قامتاماسىز ەتۋ. كەيدە بىرەۋگە نازار سالۋدىڭ ءوزىن قايىرىمدىلىق دەپ ەسەپتەۋگە بولادى.
بۇل قايراتكەرلىكتى قوعامدىق جۇمىس پەن الدەبىر قىزمەت دەپ ولشەۋگە بولمايدى. ءسىز قوعامدى تاۋارمەن قامتاماسىز ەتىپ، كەڭەس بەرۋ ارقىلى، ەڭبەك شارتىن جەڭىلدەتۋ ارەكەتىمەن قوعامعا پايدا كەلتىرە الاسىز. ودان باسقا، بيزنەسىڭىز ورگە باسقاندا، سىزگە قىزمەتكەر قاجەت بولادى، وسى ارقىلى جاڭا جۇمىس ورىندارىن ۇسىنا الاسىز.
كەيدە كەلەسى تابىسقا يە بولۋ ءۇشىن بىردەڭە بەرە الۋ الترۋيستىك موتيۆپەن ءوربيدى. بيلل گەيتس ءسىز بەن ءبىز سياقتى ادامدار كومپيۋتەر قولدانسىن دەپ «Microsoft» كومپانياسىن قۇردى، ءبىراق ءقازىر قانداي جەتىستىككە جەتكەنىن قاراڭىزشى. گەيتس - ميللياردتاعان ادامنىڭ ومىرىنە ىقپال ەتەتىن مىڭداعان قايىرىمدىلىق ۇيىمى مەن قورىنىڭ نەگىزىن سالۋشى، دەمەۋشى. ەگەر ول بۇرىن كومپيۋتەردى ۇنەمى قولدانىلاتىن ءۇي زاتىنا قالاي اينالدىرام دەپ باس قاتىرسا، بۇگىندە «Microsoft» كومپانياسىنىڭ قايراتكەرلىك ءىسى قاتارىندا دەنساۋلىق ساقتاۋ مەن اعارتۋشىلىق سالاسىنا قاتىستى ءىرى باعدارلامالار بار.
ءارى قاراي نە ىستەۋ كەرەك؟
وسى جاتتىعۋدى ورىنداپ بولىپ، ەشتەڭەگە جەتپەگەن بىردە-ءبىر ادامدى كورگەن جوقپىن. جوعارىدان ايتىلعان سۇراقتاردى وزىڭىزگە قويا باستاساڭىز، ساناڭىزدا اۆتوماتتى تۇردە ءتۇرلى وي پايدا بولادى. ول وي باسقالارعا قاراعاندا جاقسى جاسايتىن جۇمىسىڭىزعا قاتىستى بولۋى دا مۇمكىن. وپرا ۋينفري ءوز شوۋىن جۇرگىزگەندى ۇناتادى، سەبەبى ول بۇل جۇمىستى وڭاي اتقارادى. تايگەر ۆۋدس ەش قينالماي گولف دوبىن قاجەتتى باعىتقا جىبەرە الادى. بۇل ونىڭ قولىنان جاقسى كەلەدى.
ەگەر ءسىز گلەديس سياقتى ءان ايتۋعا تىرىسساڭىز، مۇلدە باسقا دىبىس شىعار ەدى. ەگەر ءسىز تايگەر سياقتى گولف دوبىن سوققىڭىز كەلسە، ءسىز بۇنى جاقسىلاپ جاساي الماس ەدىڭىز. قالاي بولعاندا دا، وسىنداي سۇراقتار ءسىزدى ناقتى ساتتەرگە نازار اۋدارۋعا يتەرمەلەيدى. شىن مانىندە دارىگەر، ادۆوكات، بۋحگالتەر، جازۋشى، عالىم، ءانشى، سۋرەتشى، مۇعالىم، مەنەدجەر، پروگرامميست، ت. ب. بولعىڭىز كەلدى مە؟ وسى جايىندا ويلانىڭىز.
تريشا م. وزىنە وسى سۇراقتاردى قويعاندا، ءوزىنىڭ ينتەرەر ديزاينىنا بەيىمى بار ەكەنىن ءتۇسىندى. وعان بۇل ءىس ۇنەمى ۇنايتىن، جيھازدى ورنالاستىرۋ، ءۇي ءىشىن بەزەندىرۋ جايلى كەڭەس بەرۋدەن ەشقاشان قاشقان ەمەس. دوستارى مەن تۋعان- تۋىستارى ونىڭ تالعامى مەن ءستيلىن ماقتاپ، وعان ءۇي مەن كەڭسەنىڭ بەزەندىرىلۋى جايىندا كومەك سۇراپ كەلەتىن. تريشا ءتۇس پەن فاكتۋرانى وتە مىقتى سەزە الاتىن، كەڭ كولەمدە ويلاۋ قولىنان كەلەتىن. ءۇشىنشى سۇراق ونىڭ كوڭىلىن بۇزبادى.
ول ادامدارعا ينتەرەردى بەزەندىرۋ بويىنشا باعاسى قىمبات قىزمەت ۇسىنىپ، قايىرىمدىلىقپەن اينالىسا باستادى. ءوز قالاسىنداعى جاعدايى تومەن وتباسىلارعا كومەك قولىن سوزدى. جىل سايىن ول بىرنەشە وتباسىن تاڭداپ الىپ، ولارعا ءۇيدى جاقسى تۇرعىزۋ تۋرالى كەڭەس بەرە باستادى. بۇل قالانى ادەمىلەندىرە تۇسەدى. بۇگىندە مەن وسى كىتاپتى جازىپ جاتقاندا، تريشا بانكتە كاسسير بوپ جۇمىس ىستەپ ءجۇرىپ، الدىنا جوسپار قۇرىپ، ديزاينەر رەتىندەگى رەپۋتاتسياسىن قالىپتاستىرۋ ۇستىندە. بانكتە سەگىز جىل جۇمىس ىستەگەن ول ءوز كارەراسىن دەرەۋ وزگەرتۋگە دايىن. مەن تريشانى قولداپ، ونىڭ العاشقى ساتتىلىگىن اسىعا كۇتۋدەمىن.