بەيجىڭدە ءۇيسىن تاريحىن ارقاۋ ەتكەن سپەكتاكل قويىلدى
60 ءارتىس قاتىسقان «قارا كوز» اتتى بۇل كولەمدى تاريحي قويىلىم، 2000 جىل بۇرىنعى ءۇيسىن ەلىندەگى تاريحي وقيعانى ارقاۋ ەتكەن. سونىمەن بىرگە تاريحي- مادەني مۇرالارعا باي «سەگىز قىرلى قالا» اتانعان كورىكتى تەكەستى، وسى اۋدان اۋماعىنداعى دۇنيەجۇزىلىك مادەني مۇرالار قاتارىنا ەنگىزىلگەن تەكەستىڭ اتاقتى قاراجون جايلاۋىندا ءومىر سۇرگەن ءۇيسىن ەلىنىڭ سىرتقى مەملەكەتتەرمەن اراداعى قارىم- قاتىناسى وزەك بولعان.
وسىلايشا ۇلتتىق ءتۇس العان، ءوڭىردىڭ وتكەنى مەن بۇگىنىن ساحناعا شىعارعان «قارا كوز» بەيجىڭدەگى كورەرمەندەردىڭ ىقىلاسىنا بولەندى. تاريحي- مادەني قۇندىلىعىمەن ەرەكشەلەنگەن تۋىندى الداعى ۋاقىتتاردا وسى قالادا تاعى دا 5 رەت قويىلماق. سونداي- اق، قىتايدىڭ باسقا دا ىشكى قالالارىندا كورسەتۋ جوسپارلانىپ وتىر.
قىتايدىڭ شىنجاڭ ولكەسىندەگى تەكەس اۋدانىنىڭ دۇنيە جۇزىندەگى ەڭ ۇلكەن، ەڭ كەمەلدى باگۋا (قازاقشا: سەگىز قىرلى) قالاشىق دەگەن اتاعى بار. 2001 -جىلى گيننەستىڭ رەكوردتار كىتابىنا ەنگەن. اۋدان ورتالىعى گەومەتريالىق سەگىز قىرلىلىعىمەن دە ايگىلى، جالپى ساۋلەتى دوڭەس فورماسىندا كەلىپ، كوشە جولدارىنىڭ ورنالاسۋ ەرەكشەلىگى وردا ءتارىزدى، جولدارى ورمەكشىنىڭ تورىنداي تۇتاسىپ جاتادى. سونىمەن قاتار، ۇلتتىق ەرەكشەلىگى، تاريحي مادەنيەتى، تابيعي كورىنىستەرى، شىعىستىق ساۋلەت ۇلگىسىنىڭ ارقاسىندا قىتاي تۋريزمىندە وزىندىك ورنى بار وڭىرگە اينالدى. بۇل ايماق ەجەلگى ءۇيسىن مادەنيەتى مەن سالت- ءداستۇرى، ۇلتتىق قۇندىلىقتارى توعىسقان جەر.
ايتا كەتەر جايت، ىلە قازاق اۆتونوميالى وبلىسى قاراۋىنداعى وسى اۋداندا قازاقتار ءجيى شوعىرلانعان.
اۆتور: باقىتجول كاكەش