ەلباسى استانا اكىمى اسەت يسەكەشەۆتىڭ قازاقشاسىن تۇسىنە المادى
مەملەكەت باسشىسى نۇرسۇلتان نازاربايەۆ مونۋمەنتتىڭ اشىلۋىنا جينالعان حالىقتى تاۋەلسىزدىك كۇنىمەن قۇتتىقتاپ، قازاقستان مەن استاناداعى ساۋلەتتى مونۋمەنتتەردىڭ جىلناماسىنا توقتالىپ ءوتتى. ال، تاۋەلسىزدىكتىڭ 25 جىلدىعىن اڭعارتاتىن جانە 2017 -جىلداعى باستى الاڭ - ەكسپو كورمەسىنىڭ ماڭىندا ورنالاسقان بيىك مونۋمەنتتىڭ ماڭىزدىلىعىنا توقتالعان ەلباسى ورتاعا مونۋمەنت اۆتورلارىن شاقىردى.
ءبىراق، مونۋمەنت اۆتورلارى ورتادان تابىلماعان سوڭ، مەملەكەت باسشىسى استانا قالاسىنىڭ اكىمى اسەت يسەكەشەۆتى جانىنا شاقىردى. «نەگىزى، بۇگىن سەن (اسەت يسەكەشەۆ) بۇكىل جايدى بايانداۋ كەرەك ەدىڭ، ءبىراق، ايازدا مەن بايانداما جاسادىم»، - دەپ قالجىڭداعان مەملەكەت باسشىسى اسەت يسەكەشەۆپەن بىرگە ورتاعا شىققان قۇرىلىس كومپانياسىنىڭ وكىلىن تىڭدادى. مونۋمەنتتى سالعان قۇرىلىس كومپانياسى ەسەپ بەرگەن سوڭ، ەلوردا اكىمى اسەت يسەكەشەۆ حالىقتى قۇتتىقتاۋ ءۇشىن دايىنداپ كەلگەن بايانداماسىن وقي باستادى. «اسا مارتەبەلى ەلباسى! قادىرلى سالتاناتقا جينالعان قاۋىم! ەلىمىزدىڭ ەڭ ۇلىق تا قاسيەتتى مەرەكەسى - تاۋەلسىزدىكتىڭ 25 جىلدىق مەرەيتويى قۇتتى بولسىن. وسى شيرەك عاسىر ىشىندە ارمان- مۇراتى ايقىن، جاسامپاز ەلگە اينالدىق»، - دەپ بايانداماسىن باستاعان اسەت يسەكەشەۆتى ەلباسى توقتاتىپ، «تۇسىنىكسىز، ورىسشا جالعاستىرا بەر»، - دەدى. استانا اكىمى قۇتتىقتاۋىن رەسمي تىلدە جالعاستىردى.
ايتا كەتەيىك، بۇگىن مەملەكەت باسشىسى نۇرسۇلتان نازاربايەۆ استانادا تاۋەلسىزدىكتىڭ 25 جىلدىعىنا ارنالعان مونۋمەنتتىڭ اشىلۋىنا قاتىستى.
اۆتور: كەنجەكەي توقتامۇرات قىزى