ءبىز تاۋەلسىزدىكتىڭ بالا جاسىنان جىگىت جاسىنا شىقتىق - اكادەميك ساعاديەۆ
ەڭ باستىسى، وتكەنگە قۇرمەتپەن قاراپ، بۇگىنگى زامان تالابىنا ساي ارەكەت ەتسە بولعانى، دەپ حابارلايدى قازاقپارات ءتىلشىسى. «ءبىز ەگەمەن ەل بولۋدى ارماندادىق. تاۋەلسىز مەملەكەت بولۋدى ارماندادىق. الەمنىڭ الدىڭعى قاتارلى ەلدەرگە قوسىلۋدى ارماندادىق. مىنەكي، سول ارمان ورىندالا باستادى. شيرەك عاسىردىڭ ىشىندە ءبىز جاڭا مەملەكەت، جاڭا ساياسي بيلىك، جاڭا ەكونوميكانى قۇرىپ، سونىڭ بارلىعىن جەتىلدىرىپ كەلەمىز. قازاق ەلىن بۇرىن ەشكىم تانىمايتىن. 25 جىلدىڭ ىشىندە قازاقتار بۇكىل الەم ەلدەرىن جاقسىلاپ تۇرىپ، شارلاپ شىقتى. بىزگە دە تالايى كەلدى، ءبىزدىڭ ەل ەكەنىمىزدى كوردى. قازاقتىڭ رۋحاني مۇراسى مول ەكەنىن، تاريحتىڭ بار ەكەنىن ءتۇسىندى. ۇلكەن شارۋا وسى ەمەس پە؟ 218 ەلدىڭ ىشىندە كوبىسىن ارتقا تاستاپ، الدىڭعى قاتارعا جاقىندادىق. وسى ۇلكەن جەڭىس قۇتتى بولسىن! «ەلۋ جىلدا ەل جاڭا» دەمەكشى، كەلەسى 25 جىلدىقتا بۇدان دا جاقسى جەتىستىكتەرگە جەتەيىك! الدا ءالى تالاي اسۋلار بار. قازىر ءبىز تاۋەلسىزدىكتىڭ بالا جاسىنان جىگىت جاسىنا شىقتىق. ەندى، ازامات جاسى بار، اقساقال جاسى بار. «ماڭگىلىك ەل» جاسى بار. سوعان جەتە بەرەيىك! ۇلكەن اسۋلاردان ابىرويمەن اسا بەرەيىك!» - دەيدى ك. ساعاديەۆ. عالىمنىڭ ويىنشا، قازىرگى جاستارعا اعا بۋىن وكىلدەرى كورگەن قيىنشىلىقتاردى كورۋ مىندەت ەمەس.
الايدا ولار تاۋەلسىزدىكتىڭ قالاي كەلگەنىن ۇمىتپاۋى قاجەت. «شىنى كەرەك، جاستار ءبىز كورگەن قيىندىقتاردىڭ كوبىن كورگەن جوق. ەندى، ولار سونى جاقسى ءتۇسىنۋى ءۇشىن قيىندىقتى باستان كەشىرۋى كەرەك دەگىم كەلمەيدى. ونىڭ كەرەگى دە جوق. ءبىراق ەلىنىڭ تاريحىن، حالقىنىڭ وتكەن جولىن جاقسى ءبىلىپ، قازىرگى زاماننىڭ تالابىن جاقسى ءتۇسىنىپ، ەلىن ىلگەرى سۇيرەۋگە ەرەن ەڭبەكتەرىن اياماۋى قاجەت. بۇل زامان - ءبىلىمدىنىڭ زامانى، بۇل زامان - عىلىمنىڭ زامانى، بۇل زامان - جاڭاشىلدىقتىڭ زامانى. بۇگىنگى جاستار ساپالى ءبىلىم الىپ، الەمدەگى وزىق ۇلگىلەردى كورىپ جاتىر. بۇل جاستار بۇرىن ەشتەڭە كورمەي، اۋىلدا تۇرعان بىزدەر سياقتى ەمەس. سوندىقتان قازىرگى مۇمكىندىكتەردى ءتيىمدى پايدالانىپ، ەلدىڭ دامۋىنا ۇلەس قوسۋ قاجەت»، - دەپ اتاپ كورسەتتى ك. ساعاديەۆ.
اۆتور: ارمان اسقاروۆ