قازاقستان مەديتسيناسىن الەمدىك دەڭگەيگە كوتەرگەن ەكى دارىگەر بار - ەلباسى
دەپ حابارلايدى قازاقپارات ءتىلشىسى.
«بىزگە جاقىن- الىس شەت ەلدەردەن ناۋقاستار كەلىپ جاتىر، بۇيرەك، باۋىر، وكپە، جۇرەك سياقتى اعزا مۇشەلەرىن ترانسپلانتاتسياسىنا ارنالعان كۇردەلى وپەراتسيالاردىڭ ءبارى وزىمىزدە جاسالادى. قازىر ءاربىر وبلىس ورتالىعىندا جۇرەككە اشىق وپەراتسيا جاسايتىن بولدى. وسىنىڭ بارلىعى - دارىگەرلەردىڭ دايىندىعى مەن ەڭ ۇزدىك قوندىرعىلاردىڭ ارقاسى. قانشاما ادامنىڭ ءومىرىن الىپ قالدىق. بۇرىن جۇرەك اۋرۋلارى ءبىرىنشى ورىندا تۇراتىن. 10 مىڭ ادام كەزەكتە تۇردى. ونى باتىسقا بارىپ، كۆوتا جاساپ كەلۋدىڭ باعاسى، تۇرعانى مەن جۇرگەنىن ساناعاندا، 50-60 مىڭ دوللارعا شىعاتىن. قازىر مەملەكەت تاراپىنان جاسالىپ جاتىر»، - دەدى نۇرسۇلتان نازاربايەۆ قازاقستان تاۋەلسىزدىگىنىڭ 25 جىلدىعىنا ارنالعان سالتاناتتى جيىندا.
مەملەكەت باسشىسىنىڭ ايتۋىنشا، بۇگىندە قازاقستان جاساندى جۇرەك ورناتۋ جاعىنان الەم بويىنشا گەرمانيا مەن ا ق ش- تان كەيىنگى ءۇشىنشى ورىندا تۇر.
«ەلىمىزدىڭ مەديتسيناسىن الەمدىك دەڭگەيگە كوتەرگەن ەكى دارىگەر بار. ولار - يۋريا پيا جانە سەرىك اقشولاقوۆ. ەكەۋى دە كۇردەلى زەرتتەۋلەر جاساپ، تىڭ جاڭالىقتار اكەلدى. وتاندىق مەديتسينانى الەمگە تانىتتى. ولاردىڭ بىرەۋى كەشە عانا قيىن ءبىر وپەراتسيا جاساپ، بالا مەن ونىڭ اناسىن قۇتقارىپ قالدى. سوندىقتان ەكەۋىنە دە «ەڭبەك ەرى» اتاعىن بەرگەنىم دۇرىس بولدى دەپ سانايمىن»، - دەپ اتاپ كورسەتتى نازاربايەۆ.
اۆتور: ارمان اسقاروۆ