سانسىزباي ەسىلوۆ استانا قالاسىنىڭ قۇرىلىسى «ايقاي-شۋمەن» باستالعانىن ايتتى

استانا. قازاقپارات - استانا قالاسىنىڭ ەڭ ءبىرىنشى اكىمى ادىلبەك جاقسىبەكوۆتىڭ ورىنباسارى بولعان، قازىردە قالالىق ارداگەرلەر كەڭەسىنىڭ ءتوراعاسى سانسىزباي ەدىلوۆ ەلوردانىڭ سول جاعالاۋى قالاي سالىنعانىن ەسكە سالدى، دەپ حابارلايدى قازاقپارات ءتىلشىسى.

سانسىزباي ەسىلوۆ ءوزىنىڭ ەستەلىگىن استانا قالاسىنىڭ اكىمدىگىندە وتكەن سالتاناتتى جيىندا ايتىپ بەردى. «وسىندا وتىرعان سىزدەرگە قازاقستاننىڭ ەلورداسى وزگەرگەن كەزدەگى قيىن دا قۋانىشتى ساتتەردى ەسكە سالايىن. بۇل وسىدان 19 جىل بۇرىن ەدى. مەملەكەت باسشىسىنا بايلانىستى ءبىر ەپيزود ەسىمدە قالىپتى. 1999 -جىلدىڭ اياعى 2000 -جىلدىڭ باسى بولۋ كەرەك. سول كەزدە اكىم بولعان ادىلبەك رىسكەلدى ۇلى جينالىستاردى ۇنەمى كەشكە وتكىزەتىن. جىل سوڭىنا قاراي كەشكە جاقىن ول (استانانىڭ العاشقى اكىمى - ءا. جاقسىبەكوۆ) ورىنباسارلارىن جينادى دا، «مەن جاڭا عانا پرەزيدەنتتىڭ قابىلداۋىنان شىقتىم. پرەزيدەنت مەنەن «جاڭا استانامىزدى سالاتىن ۋاقىت كەلگەن ءتارىزدى» دەپ سۇرادى.

ارينە، ول كەزدە ەسكى قالانىڭ پروبلەماسى كوپ ەدى: قالا تۇرعىندارىنا جىلۋ جەتپەيتىن، اپتا سايىن جىلۋ قۇبىرلارى جارىلاتىن، قالا ادامدارى كۇنى بويى سۋسىز وتىرعان كەزدەر بولدى. سوندىقتان، سول جينالىستا ورىنباسارلاردىڭ بارلىعى ءبىراۋىزدان جاڭا قالاعا قارسى شىعىپ، الدىمەن ەسكى قالانى رەتتەپ الايىق دەدىك. كەلەسى كۇنى ادىلبەك رىسكەلدى ۇلى ءسال اشۋلى كوڭىل-كۇيمەن كەلىپ، قول استىنداعىلارعا ەسكەرتۋ جاسادى دا نۇرسۇلتان نازاربايەۆتىڭ جاڭا قالا سالۋ تۋرالى نىق تاپسىرماسىن جاريا ەتتى. بىزگە ەلباسىنىڭ ءوزى قولمەن سىزعان «بايتەرەك» مونۋمەنتىنىڭ ۇلگىسىن ۇسىندى»، - دەپ ەسكە الدى س. ەسىلوۆ.

ءسوزىن اياقتاي كەلە سانسىزباي ەسىلوۆ استاناعا قۇيىلعان ينۆەستيتسيا قازىر ون ەسەلەپ قايتىپ جاتقانىن اتاپ ءوتتى.

اۆتور: كەنجەكەي توقتامۇرات قىزى