كەدەن ءىسى - اتا كاسىبىمىزدىڭ ءبىرى - فوتو

استانا. قازاقپارات - بۇگىن قازاقستاننىڭ كەدەن ورگاندارىنىڭ قۇرىلعانىنا 25 جىل تولۋىنا وراي سالتاناتتى جيىن ءوتتى.

بۇل تۋرالى قازاقپارات ق ر قارجى مينيسترلىگىنىڭ مەملەكەتتىك كىرىستەر كوميتەتىنە سىلتەمە جاساپ حابارلايدى. سالتاناتتى جيىندى اشقان ق ر قارجى ۆيتسە-ءمينيسترى ارداق تەڭگەبايەۆ قازاقستان اۋماعىنداعى كەدەن قىزمەتىنىڭ تاريحى تەرەڭدە ەجەلگى تۇركىلەر زامانىندا جاتقاندىعىن اتاپ ءوتتى. كەدەن ءىسىنىڭ قالىپتاسۋى ۇلى جىبەك جولى باعدارىندا ساۋدانىڭ دامۋىمەن تىعىز بايلانىستى ەكەندىگىن ەسكە سالدى. «سوندىقتان دا، كەدەن ءىسىن اتا كاسىبىمىزدىڭ ءبىرى دەپ ايتا الامىز!»، - دەدى قارجى ۆيتسە- ءمينيسترى.

سالتاناتتى جيىنعا كەدەن ورگاندارىنىڭ بۇرىنعى باسشىلارى عاني قاسىموۆ، ماراتقالي نۇكەنوۆ، قوزى-كورپەش كاربۋزوۆ قاتىستى. ال اقتوبە وبلىسىنىڭ اكىمى بەردىبەك ساپاربايەۆ ءوزىنىڭ بۇرىنعى ارىپتەستەرىن بەينەجولداۋ ارقىلى قۇتتىقتادى.



 ق ر ق م مەملەكەتتىك كىرىستەر كوميتەتى ءتوراعاسىنىڭ ورىنباسارى گوسمان امرين قازاقستاننىڭ 25 جىل تاۋەلسىزدىگىندە كەدەننىڭ قول جەتكىزگەن تابىستارى تۋرالى ايتىپ بەردى. «قازاقستان رەسپۋبليكاسىنىڭ كەدەن قىزمەتى ءوزىنىڭ 25 جىلدىق جۇمىسى بارىسىندا ايتارلىقتاي جەتىستىكتەرگە جەتىپ، كەڭەستىك وداقتان كەيىنگى اۋماقتا ماڭىزدى ءرول اتقارادى»، - دەدى ول.

اۆتور: مارلان جيەمباي