تاۋەلسىزدىكتىڭ شيرەك عاسىر تويى شەتەلدىكتەرمەن بىرگە تويلاندى

استانا. قازاقپارات - تاۋەلسىزدىكتىڭ شيرەك عاسىر تويى ەلدەن تىسقارى جەرلەردە دە اتالىپ وتۋدە.

ۇلى بريتانياداعى ۋوريك ۋنيۆەرسيتەتىندە وقيتىن قازاق ستۋدەنتتەر قوعامداستىعىنىڭ ۇيىمداستىرۋىمەن وتكەن شارادا شەتەلدىكتەرگە قازاقستان تۋرالى مول ماعلۇمات بەرىلىپ، ۇلتتىق مادەنيەتىمىز بەن اس ءمازىرى تانىستىرىلدى.

بۇل كۇنى كىسى قاراسى كوپ جينالاتىن ۋنيۆەرسيتەتتىڭ Piazza ورتالىق الاڭىنا كىشىگىرىم قازاق اۋىلى كوشىپ كەلگەندەي بولدى. دۇنيەنىڭ تۇكپىر-تۇكپىرىنەن ءبىلىم قۋىپ كەلگەن شەتەلدىكتەر قازاقتىڭ اۋەزدى ءانى مەن كۇمبىرلەگەن كۇيىن، ادەمى ءبيىن تاماشالاپ، قۇرت، جەنت، باۋىرساق سياقتى ۇلتتىق تاعامداردان اۋىز ءتيدى.

سونىمەن قاتار، ۇلى بريتانياداعى قازاقستان ەلشىلىگىنەن اكەلىنگەن ارنايى كورنەكىلىكتەر كوپشىلىك نازارىن اۋداردى. اعىلشىن تىلىنە اۋدارىلعان ەلباسىنىڭ «كوشباسشى جولى» جيناعى، ەكسپو-2017، قىسقى ۋنيۆەرسيادا قارساڭىندا دايىندالعان پرومو ماتەريالدار مەن كادەسىيلاردى قۋانا قابىلداعان شەتەلدىك دوستارىنا قازاق جاستارى ەلىمىز تۋرالى اڭگىمەلەپ بەردى. ولاردىڭ قازاقستان تۋرالى، اسىرەسە، ەلىمىزدىڭ اشىق ۆيزا ساياساتى، ينۆەستيتسيالىق مۇمكىندىكتەر تۋرالى بىلە تۇسۋىنە BBC تۇسىرگەن قىسقا فيلم دە اسەر ەتتى دەۋگە بولادى.

ۋوريك قازاقستان ستۋدەنتتەرى قاۋىمداستىعىنىڭ جەتەكشىسى نۇرحان تىلەۋمۇراتوۆتىڭ ايتۋىنشا، شارا تاۋەلسىزدىكتىڭ 25 جىلدىعىن تويلاۋ كونتسەپتسياسىنا ساي «نۇرلى بولاشاق» تاقىرىبىنا ورايلاستىرىلىپ وتىر.

ويتكەنى مۇنداعى ستۋدەنتتەردىڭ باسىم كوپشىلىگى - «بولاشاق» شاكىرتاقىسىنىڭ يەگەرى. سونداي-اق ءوز قاراجاتتارىن جۇمساپ نەمەسە ۇلى بريتانيانىڭ Сhevining  شاكىرتاقىسىنا وقىپ جاتقان ستۋدەنتتەر دە جەتكىلىكتى. ولار كەلەشەكتە باسەكەگە قابىلەتتى مامان بوپ ورالىپ، ەل دامۋىنا بارىنشا ۇلەس قوسۋدى ماقسات تۇتادى.