بيۋدجەتتىك سالا قىزمەتكەرلەرى ق ر تاۋەلسىزدىك كۇنىنە وراي سىياقى الادى
بيۋدجەتتىك جانە الەۋمەتتىك سالا قىزمەتكەرلەرىنە، مەملەكەتتىك قىزمەتكەرلەرگە ءبىر ەڭبەكاقى تولەۋ ءۇشىن بيۋدجەتتەن 1 ميلليارد 900 ميلليون تەڭگەگە جۋىق قارجى بولىنەدى. سونداي-اق، كوممۋنالدىق كاسىپورىنداردىڭ جۇمىسكەرلەرىنە دە سىياقى بەرىلەدى.
سونىمەن قاتار، 2016-جىلدىڭ 16- جەلتوقسانىندا تاۋەلسىزدىك كۇنىنە وراي 1986-جىلعى جەلتوقسان وقيعالارىنا قاتىسۋشىلارعا 70 مىڭ تەڭگەدەن ءبولۋ جوسپارلانعان. بۇعان قوسا، از قامتىلعان ازاماتتارعا (18 جاسقا دەيىنگى بالالارعا تاعايىندالىپ، تولەنەتىن مەملەكەتتىك جاردەماقى الۋشىلار قاتارىنان) جاردەماقىلار تولەنەدى.
حالىقتىڭ الەۋمەتتىك قورعالماعان توپتارىنا اقشالاي جانە باسقا دا كومەك تۇرلەرى استانا اكىمى جاريالاعان «استانا - مەيىرىمدى قالا» اكسياسى شەڭبەرىندە دە كورسەتىلۋدە، بۇل شارا جەلتوقسان ايىنىڭ سوڭىنا دەيىن جالعاسادى.
اي باستالعالى اكىمدىكتىڭ، بيۋدجەتتىك ۇيىمداردىڭ قىزمەتكەرلەرى، مەملەكەتتىك قىزمەتكەرلەر، ەڭبەك ۇجىمدارى جانە قايىرىمدى جاندار بالالار ۇيلەرىنە، سوعىس جانە ەڭبەك ارداگەرلەرىنە، كوپ بالالى وتباسىلارعا، مۇگەدەكتەرگە جانە ت. ب. كومەك كورسەتۋدە.
اتالعان اكسياعا كاسىپكەرلەر قاۋىمى دا قولداۋ كورسەتۋدە. ەسكە سالساق، «استانا - مەيىرىمدى قالا» اكسياسىنا نيەت بىلدىرگەن كەز كەلگەن ادام قاتىسا الادى. اكسيا تۋرالى تولىق اقپاراتتى جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنان الۋعا بولادى.