ەلوردادا «قازاق ەلى - ەركىن ەل اتانعاندا» اتتى ادەبي كەش ءوتتى
استاناداعى قازاق ءتىلى مەن ادەبيەتىن تەرەڭدەتىپ وقىتاتىن 77№ مەكتەپ-گيمنازيانىڭ وقۋشىلارى اقىن، قازاقستان جازۋشىلار وداعىنىڭ مۇشەسى، حالىقارالىق «الاش» ادەبي سىيلىعىنىڭ لاۋرەاتى نۇرلان قالقامەن كەزدەستى.
اتالعان ءىس-شارانىڭ ماقساتى - وسكەلەڭ ۇرپاقتى پاتريوتيزم رۋحىندا تاربيەلەۋ، وقۋشىلاردىڭ شىعارماشىلىق بەلسەندىلىگىن ارتتىرۋ، ۇلى وتانىمىزعا دەگەن سۇيىسپەنشىلىك جانە ماقتانىش سەزىمىن قالىپتاستىرۋ، قازاق ءتىلى مەن ادەبيەتىن تەرەڭ مەڭگەرۋگە، قازاق حالقىنىڭ ۇلتتىق مادەنيەتى مەن داستۇرىنە دەگەن قىزىعۋشىلىقتارىن وياتۋ.
كەزدەسۋ كەزىندە نۇرلان قالقا شىعارماشىلىعى تۋرالى جان-جاقتى اڭگىمەلەپ، وقۋشىلاردىڭ سۇراقتارىنا جاۋاپ بەردى. وقۋشىلار اقىننىڭ انا ءتىلى، وتان، تاۋەلسىزدىك، تۋعان جەر، دوستىق، اۋىل، استانا، ت. ب. تاقىرىپتاردى قامتىعان جىرلارىن جاتقا وقىپ، شاعىن كونسەرت ۇيىمداستىردى.
كەزدەسۋ سوڭىندا اقىن وقۋشىلارعا قولتاڭباسى قويىلعان كىتاپتارىن سىيلادى. سونداي-اق، ەل تاۋەلسىزدىگىنىڭ 25 -جىلدىق مەرەيتويىنا وراي ماڭىزدى ءىس-شارا وتكىزگەندەرى ءۇشىن مەكتەپ ديرەكتورى گۇلجامال بايمەنوۆا، ديرەكتوردىڭ وقۋ ءىسى جونىندەگى ورىنباسارى نازىم جەتپىسبايەۆا باستاعان ۇجىم مەن وقۋشىلارعا ءوز ريزاشىلىعىن ءبىلدىردى.
«تاۋەلسىزدىكتىڭ قادىرىن تەرەڭ ءتۇسىنىپ، ونى كوزدىڭ قاراشىعىنداي قورعاۋعا ءارقايسىمىز ءوز سالامىز بويىنشا ۇلەس قوسساق، ەلىمىز ودان ءارى دامي بەرەتىنى انىق»، دەپ تولعاندى ءسوز سوڭىندا اقىن ن. قالقا.
مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ تە ءسوز الىپ، مەكتەپ ۇجىمىنا العىسىن ايتىپ، وقۋشىلارعا ەلباسى دەمەۋشىلىگىمەن جارىق كورگەن 2 تومدىق «ءتاتتى الما» كىتابىن سىيعا تارتتى.
تاعلىمى مول، مازمۇندى كەزدەسۋدى مەملەكەتتىك ءتىلدى دامىتۋ قورى الەۋمەتتىك سەرىكتەسى - «Samruk-Kazyna Trust» قورىمەن بىرلەسىپ وتكىزىپ وتىر.
اقىن تۋرالى دەرەك: نۇرلان نۇراحمەت ۇلى قالقا الماتى وبلىسىنىڭ اسى جايلاۋىندا دۇنيەگە كەلگەن. مەكتەپ قابىرعاسىندا ءجۇرىپ ەرتەگى، نوۆەللا، اڭگىمە-ولەڭدەر جازۋمەن شۇعىلدانعان. «اكە» اتتى العاشقى ولەڭى 1948-جىلى «قازاقستان پيونەرى» (قازىرگى «ۇلان») گازەتىندە جارىق كورگەن. اقىننىڭ «اققۋ-جۇرەك»، «جىل - ون ەكى اي»، «وتىز بەسىنشى شىلدە»، «ميزام شۋاق» اتتى جىر كىتاپتارى، «اكە، سەنى ساعىندىم» اتتى اڭگىمەلەر جيناعى جارىق كورگەن.
ولەڭدەر توپتاماسى «قازاقستان جاس اقىندارىنىڭ انتولوگياسى»، «قوس ىشەك»، «جىر مارجانى» (قازاق پوەزياسىنىڭ انتولوگياسى)، «ازاتتىعىم - عاجاپ كۇنىم» (انتولوگيا)، ەلباسى العى سوزىمەن جارىق كورگەن «ءتاتتى الما» جىر جيناقتارىنا، اڭگىمەلەرى «ارمان قاناتىندا» جيناعىنا ەنگەن. 2016-جىلى «ميزام شۋاق» اتتى جىر جيناعى ءۇشىن قازاقستان جازۋشىلار وداعىنىڭ حالىقارالىق «الاش» ادەبي سىيلىعىنا يە بولدى.