ەلباسى جاستاردى اۋىل شارۋاشىلىعىنا ۇلەس قوسۋعا شاقىردى

استانا. قازاقپارات - مەملەكەت باسشىسى نۇرسۇلتان نازاربايەۆ جاستاردى اۋىل شارۋاشىلىعى سالاسىنداعى عىلىمدى دامىتۋعا شاقىردى، دەپ حابارلايدى قازاقپارات.

«جەتى جىل بۇرىن «ديپلوممەن اۋىلعا» باعدارلاماسىنا باستاماشىلىق ەتكەن بولاتىنمىن. كوبىسى اۋىلدان قالاعا قونىستانا باستاعان كەزەڭ بولعان ەدى، ارينە، بارشا الەمدە بۇنداي جاعداي بار. ياعني ۇلكەن قالالار قالىپتاسادى، الىپ شاھارلار ادامداردى قىزىقتىرادى، وزىنە تارتادى. الايدا، جەرىمىز باي ءبىزدىڭ جاعدايدا قازاقستان بارشا الەم ءۇشىن ورگانيكالىق تازا ءونىمنىڭ ءوندىرۋشىسى بولا الادى. جەردەگى تۇرعىندار سانى ارتىپ كەلەدى، قازىر جەتى ميلليارد، ال الداعى ۋاقىتتا 9-10 ميلليارد ادامعا جەتەدى. اگرارلىق كەشەنگە، ازىق-تۇلىككە قاجەتتەلىك 30-40 پايىزعا ارتا تۇسەدى. اتاپ ايتقاندا، اۋىل شارۋاشىلىعى ءاردايىم سۇرانىسقا يە بولادى»، - دەپ توقتالدى ەلباسى تاۋەلسىزدىك سارايىندا رەسپۋبليكالىق جاستار فورىمىندا.

بۇل تۇرعىدا پرەزيدەنت قازاقستانداعى اۋىل شارۋاشىلىعىندا عىلىمدى دامىتىپ، قارقىندى ەنگىزگەن جاعدايدا وسى باعىتتىڭ بولاشاعى وراسان زور ەكەنىن اتاپ ءوتتى. «سوندىقتان دا «ديپلوممەن اۋىلعا» باعىتىندا مەنىڭ ۇرانىم بويىنشا 48 مىڭ جاس مامان باردى. ولارعا كوتەرمە اقى تولەندى. جوبانىڭ 20 مىڭعا جۋىق قاتىسۋشىسى نەسيەلەر الىپ، باسپانالى بولدى جانە قازىرگى كەزدە اۋىلدا قىزمەتىن جالعاستىرۋدا»، - دەدى ن. نازاربايەۆ.

اۋىلدىق جەرلەردە حالقىمىزدىڭ اۋقىمدى بولىگى تۇرىپ جاتقانىنا توقتالعان ەلباسى، وسى ورايدا اۋىلداعى جاستارعا دۇعاي سالەم جولداپ، جاقسىلىق پەن بەرەكە تىلەدى.

اۆتور: رۋسلان عابباسوۆ