ەلوردادا تاۋەلسىزدىك قۇرداستارىن قابىلداۋ شاراسى ءوتتى
استانا قالاسىنىڭ جاستار ساياساتى ماسەلەلەرى باسقارماسى مەن «جاس وتان» جاستار قاناتى ۇيىتقى بولعان شاراعا 1991-جىلى دۇنيەگە كەلگەن، بۇگىندە ءارتۇرلى سالادا جەتىستىككە جەتكەن تانىمال جاستار مەن مەكتەپتىڭ جوعارى سىنىپ وقۋشىلارى قاتىستى.
«سىزدەرمەن بۇگىن كەزدەسىپ وتىرعانىما قۋانىشتىمىن جانە وسى ءساتتى پايدالانىپ بارشاڭىزدى الدا كەلە جاتقان مەرەكەلەرمەن قۇتتىقتايمىن. شىنىمەن دە 25 جىل دەگەنىمىز ءبىراز كەزەڭ. ادام ءومىرى رەتىندە الىپ قارايتىن بولساق، دۇنيەگە كەلگەننەن باستاپ قالىپتاسۋ كەزەڭ دەسەك تە بولادى. 25 جىلعا دەيىن قالىپتاسقان ادامنىڭ كەيىن وزگەرۋى دە قيىن. مىنەزى، كوزقاراسى، جۇرتپەن سىيلاستىعى قالىپ قويادى. ناشار ادام بولىپ ءجۇرىپ، ءبىر كۇننىڭ ىشىندە وزگەرىپ كەتەدى دەگەندى ەستىگەن ەمەسپىن. ءدال سولاي كەرەمەت ادام بولىپ ءجۇرىپ، 25 جىلدان كەيىن ءبىر مەزەتتە ناشار ادام دا بولىپ كەتپەيدى. ءبىزدىڭ ەلىمىزدە دە نەگىزگى مەملەكەتكە قاجەتتى بارلىق شارتتار قالىپتاستى»، - دەدى تاۋەلسىزدىك قۇراستارىمەن كەزدەسۋ بارىسىندا «اتامەكەن» ۇلتتىق كاسىپكەرلەر پالاتاسى ءتورعاسىنىڭ ورىنباسارى مۇرات ابەنوۆ.
ايتا كەتەرلىگى، شارا اياسىندا ب ا ق وكىلدەرىنە سۇحبات بەرگەن استانا قالالىق جاستار ساياساتى باسقارماسى باستىعىنىڭ مىندەتىن اتقارۋشى ەربول رىسپايەۆ ءوزى باسقاراتىن مەكەمەدە ەلوردا جاستارى اراسىنداعى جۇمىسسىزدىقتى جويۋ، مادەني-سپورتتىق شارالارعا تارتۋ باعىتىندا جۇمىستار جۇرگىزىلىپ جاتقانىن ايتتى.
اۆتور: مارلان جيەمباي