قازاقستان مەن رەسەي پوليتسيا قىزمەتكەرلەرى شەكارالىق ىنتىماقتاستىق ماسەلەلەرىن تالقىلادى
پەتروپاۆل قالاسىندا شەكارالىق ىنتىماقتاستىق اياسىندا بىرلەسكەن ۇيلەستىرۋ توبىنىڭ وتىرىسى ءوتتى. ءىس-شاراعا سولتۇستىك قازاقستان وبلىسى مەن رەسەي فەدەراتسياسىنىڭ قورعان، ومبى جانە تۇمەن وبلىستارىنىڭ پوليتسيا قىزمەتكەرلەرى قاتىستى.
قاتىسۋشىلاردى سولتۇستىك قازاقستان وبلىسىنىڭ اكىمى ەرىك سۇلتانوۆ قۇتتىقتاپ، تاۋەلسىزدىكتىڭ 25 جىلدىعىندا مەملەكەتپەن بىرگە ىشكى ىستەر ورگاندارى دا جاڭعىرتىلعانىن اتاپ ءوتتى.
«سولتۇستىك قازاقستان وبلىسىنىڭ ىشكى ىستەر دەپارتامەنتى ءوز قىزمەتىن تۇراقتى تۇردە جەتىلدىرىپ كەلەدى جانە بۇگىندە قازاقستان رەسپۋبليكاسىنىڭ ىشكى ىستەر ورگاندارى جۇيەسىنىڭ الدىڭعى قاتارىنان ورىن الادى. وڭىردەگى وڭ جاعدايعا بايلانىستى ەكونوميكا جانە الەۋمەتتىك سالا دا دامىپ كەلەدى. قوعامدىق قاۋىپسىزدىك - بيزنەستى جۇرگىزۋ مەن وڭىرگە ينۆەستيتسيا تارتۋدىڭ تاعى بىر ارتىقشىلىعى. مىسال رەتىندە ايتاتىن بولساق، وتكەن جىلى وبلىسقا 155 ميلليارد تەڭگەلىك شەت ەل ينۆەستيتسياسى تارتىلعان. بۇل رەسپۋبليكانىڭ وزگە وڭىرلەرى اراسىندا ىلگەرى ورىنعا يە بولۋعا مۇمكىندىك بەردى»، - دەدى وبلىس اكىمى.
سونداي-اق، ەرىك سۇلتانوۆ قۇقىق قورعاۋ ورگاندارىنىڭ شەكارالىق ىنتىماقتاستىعى ۇلكەن مانگە يە ەكەنىن اتاپ ءوتتى. ەكسترەميزم مەن تەرروريزم، ەسىرتكى ساۋداسىمەن كۇرەس، زاڭسىز كوشى-قون ماسەلەلەرى بويىنشا كۇش بىرىكتىرۋدىڭ قاجەتتىلىگىنە توقتالدى. قازاقستان رەسپۋبليكاسى مەن رەسەي فەدەراتسياسىنىڭ قوعامدىق ءتارتىپ پەن قىلمىسقا قارسى كۇرەس ماسەلەسى جونىندە قۇقىق قورعاۋ ورگاندارى اراسىنداعى ىنتىماقتاستىقتى بەكىتۋ بويىنشا بەلسەندى جۇمىسى ءۇشىن سولتۇستىك قازاقستان وبلىسى اكىمى رەسەيدىڭ پوليتسيا قىزمەتكەرلەرى مەن قازاقستاننىڭ ىشكى ىستەر مينيسترلىگىنىڭ وكىلدەرىنە العىس حاتتار تابىستادى.
ومبى وبلىسى بويىنشا رەسەيدىڭ ءى ءى م ب باسشىسىنىڭ ۋاقىتشا مىندەتىن اتقارۋشى ليۋبوۆ اكسەنوۆا مەكەمە اتىنان ءوڭىر باسشىسىنا سولتۇستىك قازاقستان وبلىسى مەن ومبى وبلىسىنىڭ ەرتىس ماڭى وبلىستارىمەن ءوڭىرارالىق ىنتىماقتاستىقتى دامىتۋعا قوسقان جەكە ۇلەسى ءۇشىن العىسىن جەتكىزدى.
ءىس-شارا بارىسىندا ەكى مەملەكەتتىڭ ءتارتىپ قورعاۋ ورگاندارى ەكسترەميزم مەن تەرروريزم، ەسىرتكى ساۋداسىمەن كۇرەس، زاڭسىز كوشى-قون ماسەلەلەرى بويىنشا كۇش بىرىكتىرۋ ماسەلەلەرىن تالقىلادى.