تۇڭعىش رەت «ەۋرازيا بارىسى» تۋرنيرى الماتىدا وتەدى
وسىمەن ءتورتىنشى مارتە جالاۋىن جەلبىرەتكەلى وتىرعان ءدۇبىرلى دوداعا سەگىز ەلدەن، ءارقايسىسىنان 8 بالۋاننان قاتىسادى دەپ جوسپارلانعان. اتاپ ايتار بولساق، قازاقستان قۇراماسىنان بولەك، گرۋزيا، موڭعوليا، پولشا، رەسەي، يران، وزبەكستان جانە تۇركيا مەملەكەتى قاتىسادى.
اتالعان ەلدەردىڭ بارلىعى وسىعان دەيىن دە قازاق كۇرەسىنىڭ سايىسىندا باق سىناپ كورگەن. ەستەرىڭىزدە بولسا، تۋرنير العاش رەت 2013-جىلى تاراز قالاسىندا باستالعان بولاتىن. قازاقستان قۇراماسى العاشقى جارىستا جانە 2015-جىلى جەڭىمپاز اتانعان. تەك 2014-جىلى التىن «تايقازان» موڭعوليا بالۋاندارىنا جول تارتتى.
جارىستىڭ كوركىن قىزدىرىپ، جەڭىل سالماقتاعى بالۋاندارعا مۇمكىندىكتى ارتتىرۋ ءۇشىن قازاق كۇرەسىندە سالماق دارەجەلەر سانى ارتىپ كەلەدى. باستاپقىدا «ەۋرازيا بارىسىنا» قاتىسۋشى كوماندالار بەس بالۋاننان جارىسقا قوسا، 2015-جىلى جەتى، ال بيىل سەگىز بالۋاننان بەلدەسپەك.
ءۇش جىل بويى حالىقارالىق دودا «تاراز ارەنادا» ءوتىپ، كورەرمەن تاراپىنان ۇلكەن سۇرانىسقا يە بولدى. بيىل ۇيىمداستىرۋشىلار سول قىزىعۋشىلىقتى بارىنشا قاناعاتتاندىرىپ، كورەرمەن سانىن ارتتىرۋ ماقساتىندا تۋرنيردى وڭتۇستىك استاناعا اۋىستىرۋدى ءجون ساناپتى. سونداي-اق، بيىل «قازاقستان بارىسى» قازاق كۇرەسىن دامىتۋ قورىنىڭ ۇيىمداستىرۋى مەن الماتى قالاسى اكىمشىلىگىنىڭ قولداۋىمەن وتكەلى وتىرعان «ەۋرازيا بارىسى 2016» حالىقارالىق تۋرنيرى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ورايلاستىرىلىپ وتىر.
بيىلعى جارىسقا قاتىسۋشىلار قاتارىندا اتى الەمگە ايگىلى بالۋاندار از ەمەس دەيدى ۇيىمداستىرۋشىلار. گرۋزيا قۇراماسىنىڭ ساپىندا سامبودان ءتورت دۇركىن الەم چەمپيونى ۆاحتانگ چيدراشۆيلي، ەكى دۇركىن ەۋروپا چەمپيونى داۆيد لاريوشۆيلي، سونىمەن قاتار الەم جانە ەۋروپا بىرىنشىلىكتەرىنىڭ جۇلدەگەرلەرى بار.
باستى فاۆوريتتەردىڭ ءبىرى سانالاتىن موڭعوليا كومانداسىندا سامبودان الەم چەمپيونى ا. باياراا، دزيۋدودان الەمدىك گران-پري تۋرنيرلەرىنىڭ بىرنەشە دۇركىن جۇلدەگەرى ح. گانبولد سىندى جانە 2014-جىلى «ەۋرازيا بارىسى» باسەكەسىندە توپ جارعان بالۋاندار بوز كىلەمگە شىعادى.
سونىمەن قاتار، قاتىسۋشى باسقا دا كوماندالاردىڭ قۇرامىندا ۇلتتىق جەكپە-جەك تۇرلەرى، سونىڭ ىشىندە كۇرەش، بەلدىك كۇرەس جانە تاعى باسقالارىنان الەم چەمپيوندارى قازاقستانعا كەلەدى. ءار كوماندا تورەشى، جاتتىقتىرۋشى جانە سەگىز بالۋاننان قۇرالادى. سپورتشىلار كەلەسى سالماق دارەجەلەرى بويىنشا كۇرەسەدى: 55 كەلى، 60 كەلى، 66 كەلى، 74 كەلى، 82 كەلى، 90 كەلى، 100 كەلى جانە 100 كەلىدەن جوعارى اسا اۋىر سالماق. بالۋاننىڭ جاسى 18 جاستان ۇلكەن، سونىمەن قاتار ءوزى نامىسىن قورعايتىن ەلدىڭ ازاماتى بولۋى مىندەتتى. جارىس الدىندا قاتىسۋشىلار مەديتسينالىق تەكسەرۋ، سالماق ولشەۋ، دوپينگ-تەكسەرۋ جانە دايىندىق جاتتىعۋلارىنان ءوتۋى كەرەك.
جارىستىڭ بەدەلىن ارتتىراتىن ءداستۇرلى قوماقتى جۇلدە قورى دا بار. جەڭىمپاز كوماندا 10 ميلليون تەڭگە يەلەنسە، ەكىنشى ورىنعا 6 ميلليون، ءۇشىنشى ورىنعا 4 ميلليون تەڭگە قاراستىرىلعان. «ەۋرازيا بارىسى» حالىقارالىق تۋرنيرىنە قاتىساتىن قازاقستان قۇراماسى تۋرنيرگە بىرنەشە كۇن قالعاندا انىقتالماق. تۋرنيردەن ون كۇن بۇرىن قوس قۇرامداعى وتاندىق بالۋاندار الماتىدا وقۋ-جاتتىعۋ جيىنىن وتكىزەدى. جيىننىڭ قورىتىندىسى بويىنشا ەل نامىسىن قورعايتىن ۇزدىك سپورتشىلار انىقتالادى.
اۆتور: كۇنسۇلتان وتارباي