قازاقستان ب ۇ ۇ ينستيتۋتتارى مەن ورگاندارىن جەتىلدىرۋ ءۇشىن بارلىق جاعدايدى جاسايدى - ي. كارىموۆ
21:19, 07 - شىلدە 2016
استانا. قازاقپارات - ب ۇ ۇ قاۋىپسىزدىك كەڭەسىنىڭ 2017-2018-جىلدارداعى تۇراقتى ەمەس مۇشەلىگى سايلاۋىنداعى قازاقستاننىڭ جەڭىسىنە بايلانىستى وزبەكستان رەسپۋبليكاسىنىڭ پرەزيدەنتى يسلام كارىموۆ قۇتتىقتاۋ جولدادى، دەپ حابارلادى اقوردانىڭ باسپا ءسوز قىزمەتى.
ي. كارىموۆ جاھاندىق بەيبىتشىلىك پەن قاۋىپسىزدىكتى ساقتاۋ جونىندەگى وكىلەتتىك جۇكتەلگەن وسىنداي وكىلدى ورگاندا مۇشەلىك ەتۋ قازاقستاننىڭ حالىقارالىق ارەناداعى بيىك بەدەلىنىڭ الەمدىك قوعامداستىق تاراپىنان مويىندالۋى بولىپ سانالاتىنىن اتاپ وتكەن.
«قاۋىپسىزدىك كەڭەسىندەگى قىزمەتى كەزىندە قازاقستان ب ۇ ۇ ينستيتۋتتارى مەن ورگاندارىن جەتىلدىرۋ ءۇشىن، ونىڭ جالپىعا ورتاق تۇراقتىلىق پەن ورنىقتى دامۋدى قامتاماسىز ەتۋدەگى ءرولىن نىعايتۋ ءۇشىن بارلىق جاعدايدى جاسايتىنىنا نىق سەنىمدىمىن»، - دەلىنگەن جەدەلحاتتا.
ي. كارىموۆ نۇرسۇلتان نازاربايەۆقا مىقتى دەنساۋلىق، جۇمىسىنا تابىس، ال باۋىرلاس قازاقستان حالقىنا يگىلىك پەن باق-بەرەكە تىلەدى.