ون سوتىق جەر: الداعى ەكى جىلدا جەر ۇيلەردىڭ ۇلەسى ارتادى

استانا. قازاقپارات - ق ر ۇلتتىق ەكونوميكا ءمينيسترى قۋاندىق بيشىمبايەۆ قوسىمشا قارجىعا جەكە تۇرعىن-ءۇي قۇرىلىسى ءۇشىن تارتىلاتىن ينفراقۇرىلىمنىڭ كولەمىن جاريالادى.

بۇعان دەيىن پرەمەر- مينيستر كارىم ءماسىموۆ جەر ماسەلەسى توڭىرەگىندەگى داۋ- دامايلار جايىندا ايتا كەلە، «10 سوتىق جەردى ءبولۋ باستاماسىنىڭ ول جاعدايدى شەشۋگە ءوز سەپتىگىن تيگىزەتىنىنى سەنىم بىلدىرگەن»، دەپ حابارلايدى Baq.kz ءتىلشىسى.

ءمينيستردىڭ ايتۋىنشا، بۇگىندە رەسپۋبليكا بويىنشا جەكە ءۇي قۇرىلىسى جالپى قۇرىلىس كولەمىنىڭ 50 پايىزىن قۇراپ وتىر. ماسەلەن، وتكەن جىلى 8,9 ميلليون شارشى مەتر باسپانا پايدالانۋعا بەرىلسە، سونىڭ جارتىسىنا جۋىعى - جەكە ۇيلەر. «بۇل دەگەنىمىز، حالىق جەكە ءوز ۇيلەرىن سالادى دەگەن ءسوز»، - دەيدى ق. بيشىمبايەۆ.

ونىڭ سوزىنە قاراعاندا، بۇگىندە جەكە ءوز ءۇيىن سالعىسى كەلەتىن ادامدار كوپ. دەگەنمەن، ولارعا جەر تەلىمدەرى بەرىلمەيدى. سەبەبى سۋ، جارىق، كارىزدىك قۇبىرلار سياقتى ينفراقۇرىلىم جەلىلەرى تارتىلماعان. وسىعان وراي، بيىل ەل بيۋدجەتىنەن 23 ميلليارد تەڭگە بولىنەدى دەگەن جوسپار بار.

«وسىنىڭ ارقاسىندا 1 مىڭ شاقىرىمعا جۋىق ينفراقۇرىلىم جەلىلەرى تارتىلادى. اتالعان جۇمىستىڭ ناتيجەسىندە 2017-2018 -جىلدارى 3 ميلليونعا جۋىق جەكە ۇيلەردى سالۋعا مۇمكىندىك تۋادى»، - دەپ اتاپ كورسەتتى ق. بيشىمبايەۆ بۇگىن حالىق الدىنداعى ەسەپ بەرۋ كەزدەسۋى كەزىندە.

ال اۋىل شارۋاشىلىعى ءمينيسترى اسقار مىرزاحمەتوۆتىڭ ايتۋىنشا، قازىرگى كەزدە وبلىس ورتالىقتارى ماڭايىندا جەكە تۇرعىن- ءۇي قۇرىلىسىنا بەرىلەتىن جەر جوق. ونىڭ ارعى - جاعى اۋىل شارۋاشىلىعى جەرلەرى. سول سەبەپتى زاڭعا ءتيىستى وزگەرىستەر ەنگىزۋ كەرەك.

«قازىر 10 سوتىق جەردى العىسى كەلەتىندەردىڭ سانى 1 ميلليون 400 مىڭ ادامنان اسىپ وتىر. ولاردىڭ قاتارى كوبەيىپ كەلەدى. دەگەنمەن، بۇگىندە وبلىستىق ورتالىقتاردىڭ ماڭايىندا بوس جاتقان جەرلەر جوق. سونىڭ باسىم بولىگى - اۋىل شارۋاشىلىعى جەرلەرى. اكىمدىكتەر ونى ساتىپ الا المايدى. سول جەردىڭ يەلەرىنە دە ونى تىكەلەي ءۇيدى سالعىسى كەلەتىن ادامعا دا ساتۋعا رۇقسات جوق. وسى پروبلەما شەشىلمەي جاتىر»، - دەدى ا. مىرزاحمەتوۆ حالىق الدىندا ەسەپ بەرگەن كەزدە.

ونىڭ سوزىنە قاراعاندا، اۋىل شارۋاشىلىعى جەرلەرىن ساتىپ الۋ ماسەلەسىن قاراستىرۋ قاجەت. ونى جەر رەفورماسى جونىندەگى رەسپۋبليكالىق كوميسسيانىڭ تالقىلاۋىنا شىعارۋ جوسپارلانىپ وتىر. دەگەنمەن، سوڭعى شەشىمدى پارلامەنت قابىلدايدى.

ايتا كەتەيىك، وسى اپتادا وتكەن ۇكىمەت وتىرىسىنان كەيىن ۇلتتىق ەكونوميكا ءمينيسترى قۋاندىق بيشىمبايەۆ 10 سوتىق جەر بەرۋ جۇمىسىمەن بارلىق ايماقتار قامتىلادى دەپ ايتقان.

فوتو:camonitor.kz