جەر كودەكسىنىڭ نورمالارىنا موراتوريدى كوزدەگەن زاڭ قابىلداندى - پارلامەنت
ەندى قۇجات مەملەكەت باسشىسىنىڭ قول قويۋىنا جولدانادى.
زاڭ جوباسى قازاقستان رەسپۋبليكاسى پرەزيدەنتىنىڭ 2016 -جىلعى 6 -مامىرداعى «جەر زاڭناماسىنىڭ كەيبىر نورمالارىن قولدانۋعا موراتوري ەنگىزۋ تۋرالى» №248 -جارلىعىن ورىنداۋ ماقساتىندا ازىرلەندى.
زاڭنىڭ نەگىزگى ماقساتى جەر كودەكسىنىڭ جەر پايدالانۋ جونىندەگى اۋىل شارۋاشىلىعى ماقساتىنداعى جەر بەرۋدى (جالعا الۋ) رەتتەيتىن جەكەلەگەن ەرەجەلەرىنىڭ قولدانىلۋىن 2016 -جىلدىڭ 31 -جەلتوقسانىنا دەيىن توقتاتا تۇرۋ بولىپ تابىلادى. سونداي- اق، 2015 -جىلعى 2 -قاراشاداعى «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭنىڭ كەيبىر نورمالارىنىڭ جانە جەر كودەكسىنىڭ جەكەلەگەن نورمالارىنىڭ قولدانىسى 2016 -جىلدىڭ 31 -جەلتوقسانىنا دەيىن توقتاتىلا تۇراتىن بولادى.
اتاپ ايتقاندا، بىرىنشىدەن، كودەكستەگى شەتەلدىكتەرگە، ازاماتتىعى جوق ادامدارعا، شەتەلدىك زاڭدى تۇلعالارعا، جارعىلىق كاپيتالىنداعى شەتەلدىكتەر مەن ازاماتتىعى جوق ادامداردىڭ، شەتەلدىك زاڭدى تۇلعالاردىڭ ۇلەسى ەلۋ پايىزدان اساتىن زاڭدى تۇلعالارعا اۋىل شارۋاشىلىعى ماقساتىنداعى جەر ۋچاسكەلەرىن جالداۋ شارتتارى مەن ۋاقىتشا جەردى پايدالانۋ قۇقىعىن بەرۋمەن، سونىمەن قاتار، قازاقستان رەسپۋبليكاسىنىڭ ازاماتتارىنا جانە مەملەكەتتىك ەمەس زاڭدى تۇلعالارعا مەملەكەتتىك مەنشىكتەگى اۋىل شارۋاشىلىعىنداعى جەر ۋچاسكەلەرىنە جەكە مەنشىك قۇقىعىن بەرۋمەن بايلانىستى نورمالارىنىڭ قولدانىسقا ەنگىزۋ مەرزىمى توقتاتىلادى.
اۆتور: قانات مامەتقازى ۇلى