بيلىكتە وتىرعانداردىڭ ءبارىن قارالاۋعا بولمايدى - ا. مىرزاحمەتوۆ
«مىناۋ جاڭا بايقايمىن، جالپى بيلىككە ۇلكەن سىن ايتىلىپ جاتىر. مەن ايتقان بولار ەدىم، بۇل جەردە ءبارىن جاپپاي قارالاۋعا بولمايدى. بيلىكتەگىلەردىڭ ءبارى مەملەكەتتىك مۇددەنى ويلاماي وتىر دەپ ايتۋعا بولمايدى، حالىقتىڭ مۇددەسىن ويلاماي وتىر دەپ ايتۋعا بولمايدى. سىزدەر ايتىپ وتىرعان ارگۋمەنتتەر، سىزدەر ايتىپ وتىرعان قاۋىپ- قاتەرلەردى ءبىزدى بىلمەيدى دەپ ايتۋعا بولمايدى. ونىڭ ءبارىن ءبىز دە جاقسى بىلەمىز. ويتكەنى ءبىز دە وسى ەلدىڭ ازاماتىمىز، وسى جەردە تۋدىق، وسى جەردە... مۇنى ەندى، اللا تاعالا بىلەر، وسى جەردە مۇمكىن، جاڭاعى سول... ءومىرىمىز وسى جەردە وتەتىنىنە ەشقانداي كۇمان جوق. سوندىقتان دا جاڭاعى كەيبىر سوزدەردى ايتقان كەزدە استارلاتىپ، اۋىر سوزدەرگە بارماي، سونى ەسكەرىپ ايتقانىمىز ورىندى سياقتى. مەن وتكەندە مۇحتار تايجانمەن كەزدەسكەن كەزدە دە كوميسسيانىڭ سول ءبىرىنشى وتىرىستارىندا وسى جۇمىسقا تاعايىندالۋىما بايلانىستى ايتقان بولاتىنمىن، مەيلى، كوميسسيا قۇرىلدى عوي، قۇرىلماعان جاعدايدىڭ وزىندە دە ءبىز اۋىل شارۋاشىلىعى مينيسترلىگى رەتىندە مىنا كوتەرىلىپ جاتقان ماسەلەلەردى، قولدانىستاعى زاڭداردىڭ كەمشىلىكتەرى مەن شيكىلىكتەرىن كورىپ وتىرمىز. ونسىز دا سونى رەتتەۋگە كۇش سالامىز دەپ ايتقانبىز»، - دەدى ا. مىرزاحمەتوۆ.
ايتا كەتكەن ءجون، كوميسسيا وتىرىسى بارىسىندا قوعام قايراتكەرى مۇحتار تايجان بۇرىنعى ءتوراعا باقىتجان ساعىنتايەۆتىڭ جۇمىستى اياعىنا دەيىن جەتكىزۋىن قالايتىنىن جەتكىزگەن. وسى كەزدە ب. ساعىنتايەۆ: «ءسىز جاڭا ءتوراعاعا سەنىمسىزدىك تانىتىپ وتىرسىز با؟»، - دەپ كۇلىپ سۇرادى. «جوق، ماسەلە وندا ەمەس. جۇمىستى بىرگە باستاعاننان كەيىن بىرگە اياقتاۋ قاجەت. سوندىقتان ءسىزدىڭ قالعانىڭىز دۇرىس»، - دەدى م. تايجان.
دەگەنمەن، كوميسسيانىڭ تىزگىنى جاڭا ءتوراعاعا تاپسىرىلدى. ا. مىرزاحمەتوۆ وتىرىستاردى اپتا سايىن ەمەس، ەكى اپتادا ءبىر رەت وتكىزۋدى ۇسىندى.
فوتو:saigez.kz