قوماقتى ينۆەستيتسياسىز اۋىل شارۋاشىلىعىن لايىقتى دامىتۋ مۇمكىن ەمەس - ە. ءابىلماجىن ۇلى

الماتى. قازاقپارات - الماتى وبلىسىنىڭ تالعار اۋدانىنداعى اراقاباي اۋىلىندا ورنالاسقان «بايسەركە- اگرو» اگروحولدينگى بازاسىندا جەر رەفورماسى بويىنشا رەسپۋبليكالىق كوميسسيا مۇشەلەرىنىڭ وتىرىسى ءجۇرىپ جاتىر.

وندا جەر رەفورماسى بويىنشا كوميسسيا مۇشەلەرى جەر زاڭناماسىنىڭ نورمالارىنا قاتىستى جەرگىلىكتى تۇرعىنداردىڭ، كاسىپكەرلەردىڭ ۇسىنىستارىن قاراۋدا.

ءوز سوزىندە الماتى وبلىسى اقساقالدار القاسىنىڭ ءتوراعاسى ەرمەك ءابىلماجىن ۇلى اقساقالدار اتىنان ءسوز سويلەپ ءوز پىكىرىن ءبىلدىردى.

 «سوڭعى 13 جىل ىشىندە وسى اينالىستا جۇرگەن جەردىڭ تەك 1,3 پايىزى عانا نەمەسە 1,3 ميلليون گەكتارى عانا جەكە مەنشىككە بەرىلىپتى. بۇل اۋىل شارۋاشىلىعىنىڭ ءالى دە جەتىلىكتى دامىماي جاتقانىن كورسەتەدى. ال دامىتۋ ءۇشىن قوماقتى ينۆەستيتسيا قاجەت. ءبىر عانا ۇكىمەتتىڭ دەمەۋ قارجىسىمەن اۋىلدى وركەندەتۋ قيىن»، - دەدى ك. ءابىلماجىن ۇلى.

سونىمەن قاتار، ول ەگەر قورعانىس، قاۋىپسىزدىك مەحانيزمدەرى ەنگىزىلسە، جەردى شەت ەلدىكتەرگە جالعا بەرۋگە بولاتىندىعىن ايتتى.

«شەتەلدىكتەرگە جەردى جالعا بەرەر كەزدە اسىرەسە شەكارا ماڭىنداعى جەرلەردى ەسكەرۋمىز قاجەت. ياعني، مەنىڭشە شەكارادان 100-200 شاقىرىم جەردەگى جەر تەلىمدەرىن شەت ەلدىكتەرگە جالعا بەرۋگە بولمايدى. ال قالعان جەرلەر بويىنشا ءتيىستى تالاپتار قويۋ قاجەت. ەگەر مەملەكەت قاۋىپسىزدىگى قامتاماسىز ەتىلەتىن بولسا، جەردى جالعا بەرۋگە بولادى. ودان قورقۋدىڭ قاجەتى جوق»، - دەدى ە. ءابىلماجىن ۇلى.

اۆتور: ايبوتا جاپپاربەرگەن