الماتى وبلىسىندا جەر رەفورماسى بويىنشا كوميسسيانىڭ وتىرىسى ءوتىپ جاتىر

الماتى. قازاقپارات - بۇگىن الماتى وبلىسىنىڭ تالعار اۋدانىنداعى ارقاباي اۋىلىندا ورنالاسقان «بايسەركە- اگرو» اگروحولدينگى بازاسىندا جەر رەفورماسى بويىنشا كوميسسيا مۇشەلەرىنىڭ وتىرىسى باستالدى.

 وعان ق ر پرەمەر- ءمينيسترىنىڭ ءبىرىنشى ورىنباسارى، كوميسسيا ءتوراعاسى باقىتجان ساعىنتايەۆ، ق ر پرەمەر- ءمينيسترىنىڭ ورىنباسارى- اۋىل شارۋاشىلىعى ءمينيسترى اسقار مىرزاحمەتوۆ، الماتى وبلىسىنىڭ اكىمى اماندىق باتالوۆ، سونداي- اق، الماتى وبلىسىنىڭ تۇرعىندارى، جەرگىلىكتى كاسىپكەرلەر قاتىسۋدا.

 وتىرىس بارىسىندا جەر رەفورماسى بويىنشا كوميسسيا مۇشەلەرى جەر زاڭناماسىنىڭ نورمالارىنا قاتىستى ۇسىنىستاردى قارايدى.

 «جەتىسۋ - قازاقستاننىڭ ەرەكشە ولكەسى. «جەتىسۋ - جەر ءجانناتى» دەپ بەكەرگە ايتىلماعان. ويتكەنى، تابيعاتى شارۋاعا جايلى، توپىراعى قۇنارلى. ونى قازىر ءوز كوزىمىزبەن كوردىك. ەندى، وسىنداي شارۋانى دوڭگەلەتىپ الىپ كەتۋ ءۇشىن جاعداي كەرەك. ال ول جاعدايدىڭ بارلىعى تەك رەفورما ارقىلى جۇرگىزىلەدى. جەر كودەكسىنە بايلانىستى ءبىراز داۋ- دامايلاردىڭ توڭىرەگىندە ۇسىنىستار ايتىلىپ جاتىر. ونى دا بۇگىن وزدەرىڭىزبەن بىرگە وتىرىپ تالقىعا سالۋعا كەلىپ وتىرمىز. بۇگىن ءبىز وزدەرىڭىزبەن تاعى دا وسى باعىتتا اشىق پىكىرتالاس وتكىزىپ، الماتى وبلىسى جۇرتشىلىعىنىڭ، شارۋالارىنىڭ وي- پىكىرلەرىن، ۇسىنىستارىن تىڭداعىمىز كەلەدى.

بۇگىنگى كۇنگە دەيىن، ءبىزدىڭ شتابتىڭ قاراماعىندا قۇرىلعان كولل- ورتالىعىنا 9500- دەي قوڭىراۋ شالىنعان. سونىڭ 73-75 پايىزى نەگىزىنەن 10 سوتىق جەرگە بايلانىستى بولىپ وتىر. الماتى وبلىسىنان كەلىپ تۇسكەن قوڭىراۋلاردىڭ سانى - 500-گە جۋىق. ونىڭ ىشىندە - 1,3 پايىزى عانا وسى جەر كودەكسىنە بايلانىستى بولعان. ال قالعان سۇراقتاردىڭ بارلىعى باسقا سالالارعا قاتىستى بولىپ وتىر»، - دەدى ءوزىنىڭ العى سوزىندە ق ر پرەمەر- ءمينيسترىنىڭ ءبىرىنشى ورىنباسارى، كوميسسيا ءتوراعاسى باقىتجان ساعىنتايەۆ.

 كوميسسيا وتىرىسى ودان ءارى جالعاسۋدا.

اۆتور: ايبوتا جاپپاربەرگەن