اسقار جاكۋليننىڭ اۋىرىپ جاتقاندا جازعان سوڭعى حاتى - كەسكىن
حات ءماتىنىن وقىعان - اقىن، قوعام قايراتكەرى الماس احمەتبەك. مارقۇم اسەكەڭ بۇل حاتىندا: «مەن ءۇشىن ومىرىمدەگى ەڭ كەرەمەت وقيعا - قازاقستاننىڭ تاۋەلسىزدىك الۋى، ەڭ ۇلى شەشىمىم - قازاقستانعا قونىس اۋدارۋىم»، - دەپ جازىپتى.
اسقار ءانۋار ۇلى ۇزاققا سوزىلعان ناۋقاستان 2016 -جىلى 2 - اقپان كۇنى قىتاي استاناسى بەيجىڭدە ماڭگىلىك ساپارعا اتتاندى.
ءومىرى تۋرالى ايتا كەتسەك، ءوزىنىڭ اتاسى جاكۋلا كۇشىك ۇلى 1885 -جىلى ومبىداعى فەلدشەرلىك تەحنيكۋمدى بىتىرگەن. سول زامانداعى پاتشا ارمياسىنىڭ اسكەري دارىگەرى بولعان. 1909 -جىلى سول كەزدەگى پروجيەۆسكيي (قىرعىز جەرىندە) گۋبەرنياسىنىڭ حاتشىسى دەڭگەيىمەن قىزمەتتەن بوساپ، تۋعان جەرى - اقسۋاتقا قايتقان. 20 -جىلدارى الاش قوزعالىسىمەن نيەتتەس، تىلەكتەس بولعانى ءۇشىن قۋدالانىپ، اقىرى بالالارىن- اۋىلىن الىپ، قارۋلى قارسىلىقپەن شاۋەشەككە وتكەن كىسى. 1933 -جىلى شاۋەشەكتە بەلگىسىز جاعدايدا وققا ۇشقان. جاكۋلانىڭ ءىنىسى - ءابىلماجىن دە 1912-1917 ج ج. ۆارشاۆا مال دارىگەرلىك ينستيتۋتىن بىتىرگەن كىسى. 1936 -جىلى الاششىل «حالىق جاۋى» رەتىندە اتىلعان.
ال اسقاردىڭ اكەسى ءانۋار، ونىڭ اعاسى ماعاۋيا قىتايداعى ءۇش ايماق ۇكىمەتىنىڭ بەلدى كادرلارى بولعان، ول جاقتا ىلە قازاق اۆتونوميالى وبلىسى قۇرىلاردا ەكەۋى ەكى ايماققا باسشى بولعان ادامدار. ال اناسى - ءباتيما جاكۋلينا دا ءوز عۇمىرىندا ۇلكەن لاۋازىمدى قىزمەتكە جەتكەن جازۋشى، شەشەن ءتىلدى اسا تاربيەلى، بەدەلدى ادام بولعان.
اسقار ءوزى قىتايدا تۋىپ- وسكەن، ءبىراز جىل گەرمانيادا تۇردى. كەيىن قىتايعا قايتا كەلىپ، پەكيندە ۇلكەن جەكە مەنشىك قۇرىلىس كومپانياسىن قۇرىپ، ءىرى عيماراتتار تۇرعىزدى. قىتايداعى ەڭ العاشقى «اۋىل» سايتىنىڭ نەگىزىن قالاۋشى. باي بولدى، ۇيلەندى. سويتە تۇرا ءسابيلى بولار ساتتەرىندە پەكيندى، بايلىقتى ءبارىن تاستاپ، جارى جاينانى جەتەلەپ، تاۋەلسىز قازاقستانعا - الماتىعا ءبىرجولاتا ورالدى. ونىمەن سۇحباتتاس، سىرلاس بولعان ازاماتتار ونىڭ سونشاما تەرەڭ ءبىلىمدى ەكەنىن، ەلىنە، ۇلتىنا، ۇلتتىق مەملەكەتىنە دەگەن سۇيىسپەنشىلىگى شەكسىز ەكەنىن، جانە ونىڭ بيىك مادەنيەتتى ءارى جايساڭ ازامات ەكەنىن بىلەدى. ول اتىمتاي جومارت، ۇلكەن مەتسەنات ەدى، ءارى كەرەمەت ىسكەر ۇيىمداستىرۋشى ەدى. قازاقستانعا كەلگەننەن كەيىن، ول «اساي» دەگەن كومپانيا قۇرىپ، ونى بيىك قارجىلىق مەكەمەگە اينالدىردى. ءىرى مادەني شارالاردى ۇيىمداستىردى.
اسقار جاكۋلين بىرنەشە تىلدە (قىتاي، نەمىس، اعىلشىن، تۇرىك جانە ءوز انا تىلىندە ) ەركىن سويلەيتىن. ەلگە ورالعان سوڭ قازىرگى كيريلليتسا جازۋىمەن قوسا ورىس ءتىلىن دە جاقسى مەڭگەرىپ الىپ ەدى. اردا ازاماتتىڭ ارتىندا ءبىر ۇل، ءبىر قىزى قالدى.
(2016- جىل)