قىتايداعى قازاق بالالارىنا ارنالعان باسىلىم قايتا جاڭعىردى

استانا. قازاقپارات - ىلە جاستار-ورەندەر گازەت-جۋرنال مەكەمەسى جاعىنان شىعارىلاتىن ءبىر گازەت، ەكى جۋرنالدىڭ اتى وزگەرەتىنى جىل باسىنان بەرى باسپا سوزدە ايتىلىپ كەلگەن ەدى.

سول يگى ءىس ورىندالىپ، 2016-جىلدىڭ باسىندا گازەتتىڭ اتى «شينجياڭ قازاق ورەندەرى» بولىپ وزگەرىپ، تۇڭعىش سانى جارىق كورىپتى.

1959-جىلدان باستاپ وقىرماندارعا جول تارتقان بۇرىنعى «ىلە ورەندەرى» گازەتى 2014-جىلى قىركۇيەكتەن باستاپ ءتۇرلى-ءتۇستى بولىپ شىعارىلسا، 2015-جىلى قىركۇيەكتەن باستاپ، اپتاسىنا ءبىر رەت 8 بەت بولىپ جارىق كورىپ كەلەدى دەپ حابارلايدى «اعاجاي التاي» تورابىنىڭ ءتىلشىسى سەنبەك اۋەسقان ۇلى.

جاڭا مازمۇنمەن بايىعان باسىلىم «باقىتتى بالالىق شاق»، «جاڭا جىلدا جاڭا بەينە»، «ويلان دا تاپ»، «قوس ءتىل -  قوس قاناتىڭ»، «شاشۋ»، «وقىرمان وتاۋى» ايدارشالارى تولىعىپ، بالدىرعان وقىرمانداردى باۋراپ الاتىنداي كەمەلدەنىپتى.

شىنجاڭداعى بارلىق مەكتەپتەرگە تارالىپ، قازاق ورەندەرىنىڭ سۇيىكتى باسىلىمىنا اينالعان گازەت وقۋشىلارعا دا قۋانىش باعىشتاپ وتىر. بۇعان ۇستازدار قاۋىمى دا ريزا. قۇلجا قالالىق 27 باستاۋىش مەكتەپتىڭ ساقا وقىتۋشىسى قالبىنۇر قوقىمبەك قىزى «شينجياڭ قازاق ورەندەرى» گازەتىنىڭ تۇڭعىش سانى قولىمىزعا ءتيىپ مارە-سارە بولىپ وتىرمىز. بۇل گازەت ءبىزدىڭ كاسىپتىك جاقتاعى قولعاناتىمىز، ودان بالالار عانا ەمەس، ءبىز دە مول ءبىلىم الامىز» دەسە، وسى مەكتەپتىڭ وقۋشىسى ميلا تولەگەن قىزى جاڭا اتاۋعا يە بولعان گازەتكە ءوزىنىڭ جانە باسقا ساباقتاستارىنىڭ تالاسا-تارماسا جازىلىپ جاتقانىن ايتادى. قازاق ورەندەرىنىڭ كوز قۋانىشى، مۇعالىمدەردىڭ كومەكشىسى بولا بىلگەن جاڭا باسىلىمنىڭ عۇمىرى ۇزاق بولعاي.

مۇرات الماسبەك ۇلى

Baq.kz