قانداستارىمىز قاقاعان قىسقا قاراماي ۇلتتىق قۇندىلىقتارىمىزدى جارقىراتتى

استانا. قازاقپارات - قىتايدا تۇراتىن قاندارستارىمىز جىل سايىن «قار-مۇز ساياحات مەرەكەسى» دەپ اتالاتىن ءدۇبىرلى قيمىل وتكىزىپ تۇرادى.

بۇل ءبىر جاعىنان شىنجاڭنىڭ ساياحات سالاسىن دامىتۋ ۇرانىن تۋ ەتكەن اۋقىمدى شارا.

مەرەكەنىڭ كوركى - قىزىقتى قىسقى سپورتتىق ويىندار جانە ەڭ باستىسى قازاق حالقىنىڭ ءداستۇرىن ۇلىقتايتىن ءار الۋان كورسەتىلىمدەر، قويىلىمدار، كونسەرتتىك باعدارلامالار.

«5- رەتكى قار-مۇز ساياحات مەرەكەسىن» بيىل قىتايعا قاراستى التاي ايماعىندا تۇراتىن قانداستارىمىز بۇرىنعى سارسۇمبە، قازىرگى التاي قالاسىنداعى «گەنەرال تاۋ قار-شاڭعى الاڭىندا» قارسى الدى.

اق قار جامىلعان كورىكتى تاۋ قالاسى التايدا مەرەكەنى كوڭىلدى وتكىزگەن قانداستارىمىز قىستىڭ سۋىعىنا قاراماي ۇلتتىق قۇندىلىقتاردى، قازاقتىڭ ءداستۇرىن، تەرەڭ تامىرلى تاريحىمىزدى، اتامەكەندەرىنىڭ ەرەكشەلىكتەرىن كورسەتۋدە بارىن سالعان ەكەن. مەرەكەلىك شارانىڭ ەڭ ءماندى تۇسى دا وسى بولسا كەرەك.

«اعاجاي التاي» تورابىنىڭ حابارلاۋىنشا، سالتاناتتى شاراعا التاي ايماقتىق ءۋالي مەكەمەسى، ايماقتىق ۇگىت ءبولىمى، اۆتونوميالى رايوندىق ساياحات مەكەمەسىنەن جانە كورشىلەس اۋدان، قالالاردان كەلگەن باسشىلار قاتىناسقان.

مۇرات الماسبەك ۇلى

Baq.kz