قىتايدا تۇراتىن قانداسىمىز كاسىپقوي بوكستان ءوز سالماعىندا كوش باستادى - فوتو
بەيسەنبى ءناسيوللا ۇلى 2015-جىلدىڭ سوڭعى جەكپە-جەگىن وسىدان ءبىر اپتا بۇرىن يۋنان ولكەسى كۇنميڭ قالاسىندا وتكىزىپ، 8- راۋندتىق جەكپە-جەكتە قارسىلاسىن باسەكەنىڭ ءبىرىنشى مينۋتىندا سۇلاتىپ تاستادى. وسى جەڭىسىنەن كەيىن ول ق ح ر بويىنشا ءوز سالماعىندا كوش باستادى.
ەستەرىڭىزگە سالا كەتەيىك، بەيسەنبى ءناسيوللا ۇلى قانات يسلام تۋعان قىتايدىڭ التاي ايماعى قابا اۋدانىندا 1994-جىلى دۇنيەگە كەلگەن. ول بىردەن كاسىپقوي بوكستا باعىن سىناپ، فيليپپين، تايلاند، قىتاي ەلدەرىنىڭ ساڭلاقتارىن سان سوقتىرىپ، الىستا جۇرسە دە قازاقتىڭ ابىرويىن بيىكتەردەن كورسەتىپ ءجۇر.
ول بيىل قىتايدىڭ ىشكى قالالارىندا ۇيىمداستىرىلعان ازيالىق كاسىپقوي جارىستارعا سەگىز رەت قاتىسىپ، بارلىعىندا جەڭىسكە قول جەتكىزدى. ونىڭ بىرەۋىندە عانا ۇپاي سانىمەن باسىم تۇسسە، وزگە ايقاستارىنىڭ بارلىعىن مەرزىمىنەن بۇرىن ايقىن باسىمدىقپەن اياقتاعان.
بەيسەنبى قازىر قىتايداعى «جوڭ-ۆەي» كومپانياسىمەن كەلىسىمشارتقا وتىرىپ، ليابىڭ دۇڭ ەسىمدى فيليپپيندىك باپكەردىڭ قول استىندا جاتتىعىپ، شەبەرلىگىن شىڭداپ ءجۇر. سالماعى - 147,4 فۋنت (66,8 كەلى)، بويى 180 سانتيمەتر. قازىر ول جالپى رەيتينگتە وسى سالماق دارەجەسىندە دۇنيەجۇزى بويىنشا 270-ورىندا تۇر.
كۇنسۇلتان وتارباي