جانات ءادىلحان قىزى جەڭىلگەن جوق، ۇلكەن ساحناعا جول سالدى

استانا. قازاقپارات - وتكەن تۇندە جارتى جىلعا سوزىلعان ۇلتتىق ارنانىڭ «قازاقستان داۋسى» جوباسى اياسىنداعى ءان بايقاۋى مارەگە جەتتى. ۇمىتكەرلەر اراسىنان ۇزدىكتەردىڭ ۇزدىگى اتانىپ فينالعا شەتەلدەن كەلگەن ەكى بىردەي قانداسىمىز شىقتى. ونىڭ ءبىرى ماڭعوليادان كەلگەن باۋىرىمىز - مۇراتبەك قايرولدا. ال ەكىنشىسى قىتايدان كەلگەن قارىنداسىمىز - جانات ءادىلحان قىزى.

ەكەۋى دە بىرىنەن ءبىرى وسال ەمەس. ەكەۋىنىڭ ونەرىنە دە ءتانتى بولدىق. وعان ەل كۋا! ءبىراق، شەشۋشى سىندا مۇراتبەكتىڭ باعى جانىپ باس جۇلدەنى يەلەندى. باۋىرىمىزعا جۇلدە قۇتتى بولسىن دەيمىز. قۋانىشى ۇزاعىنان بولىپ، ەڭبەگىنىڭ جەمىسى تەك يگىلىكتى ىستەرگە جۇمسالعاي...

ال ەندى قازاقتىڭ قاراكوز قىزى جانات ءادىلحان قىزىنا كەلەيىك. جانات اتا-جۇرتىنا تابان تىرەگەنى كەشە عانا بولاتىن. جىلعا جەتپەيتىن ۋاقىت. جانە ءبىرىنشى رەت كەلۋى. قازاق ەلى ونىڭ ءوزىن دە، ونەرىن دە ءبىرىنشى رەت كوردى...

قانداي كەرەمەت تۇلعا بولسا دا، كەز-كەلگەن ونەر يەسى بۇرىن وزىنە بەيمالىم ورتاعا كەلىپ، ءبىر كۇندە جارق ەتىپ، جۇلدىز بولا المايدى. بۇل ءومىر شىندىعى. ءوزىن دالەلدەۋ ءۇشىن قانشاما اي-جىلدارىن سارپ ەتىپ جاتادى. ال جانات نەبارى 14 اپتا دا وتانداستارىنىڭ ىستىق ىقىلاسىنا بولەنە ءبىلدى. بۇل قىتايدان كەلگەن قارىنداسىمىزدىڭ ونەرىنىڭ ورەسى بيىك ەكەنىن بىردەن بايقاتادى.

ايتالىق، العاشقى ىرىكتەۋدە جانات ءتورت تالىمگەردى وزىنە جالت قاراتتى. ءتىپتى، تالاستى. كورەرمەن قاۋىم دا «مىنا ءانشى قىز وسىعان دەيىن كورىنبەي قايدا جۇرگەن، قاي جاقتىڭ بالاسى» دەپ تاڭ-تاماشا بولدى. كەيىن جانات ءوزىن تانىستىرعان دا بارىپ، ءبىراق ءبىلدى. سودان بەرى، ياعني «قازاقستان داۋىسى» بايقاۋى اياقتالعانشا ءوزىن ءار قىرىنان تانىتا ءبىلدى، كورسەتە ءبىلدى، كورەرمەندەرىن وزىنە ءتانتى ەتە ءبىلدى...

العاشىندا ءوزى ءمادينانى تاڭدادى. الايدا ول ءوز توبىندا ۇزاق ۇستامادى. ودان كەيىن، نۇرلان قامقورلىعىنا الدى. ول دا ۇزاق ۇستامادى. ءۇشىنشى رەت رۇستەم توبىنا قوستى. جانات رۇستەمنىڭ جەتەكشىلىگىمەن ۇزاققا شاپتى. فينالعا جەتتى. بۇل جەردە رۇستەمنىڭ الىستان ءان بايقاۋىنا كەلگەن قارىنداسىنىڭ ونەرىن شىنايى باعالاي بىلگەنىنە العىس ايتا كەتەيىك. ال سوڭعى اينالىمدار دا جانات تالىمگەرىنىڭ تاڭداۋىمەن ەمەس، تازا كورەرمەن قاۋىمنىڭ قولداۋىمەن جارىس جولىن جالعاستىرىپ وتىردى. بۇل جاناتتىڭ رۇستەمنىڭ ءۇمىتىن دە، حالىقتىڭ ءۇمىتىن دە تولىقتاي اقتاعانى...

وسىنداي ءىرى باسەكەلەردە كەزدەيسوق جەڭىسكە جەتىپ جاتاتىندار كوپ كەزدەسەدى. ءبىراق جاناتتىڭ فينالعا جەتۋى كەزدەيسوقتىق ەمەس. ءوزى بىلمەيتىن، تانىمايتىن، ءتىپتى، ءالى ەشكىممەن تولىق تانىسىپ، دوستاسىپ تا ۇلگەرمەگەن جاس ءانشىنىڭ حالىقتان وسىنشاما داۋىس جيناۋى كىم-كىمدى دە تاڭعالدىرماي قويمايدى.

بۇدان نەنى بايقاۋعا بولادى؟ بۇدان حالىقتىڭ ونەرگە دەگەن ادالدىعىن بايقاۋعا بولادى. نەگە؟ جانات كەشە عانا قىتايدان كەلدى. ول ءبىزدى، ءبىز ونى تانىمايمىز. مۇمكىن، وزىمەن ىلەسە كەلگەن تانىس ءۇش-ءتورت دوسى، قۇربىسى بار شىعار؟! ءبىراق، ولاردىڭ قولداۋى، ولاردىڭ بەرگەن داۋىسى مۇنداي ءىرى جوبادا، مۇنداي ءىرى دودادا ەشتەڭە شەشپەيتىنى انىق. جانات ونەرىن حالىقتىڭ جۇرەگىنە جەتكىزە ءبىلدى. ال حالىق سول ونەردى جۇرەگىمەن باعالاي ءبىلدى. داۋىس بەردى. سونىڭ ناتيجەسىندە «كورەرمەندەر داۋىسمەن» وسىنداي دەڭگەيگە جەتتى. ءبىر سوزبەن ايتقاندا ونەرىنە ءتانتى بولعان جۇرت الىستان «اۋىزىنا ءان تىستەپ كەلگەن قارلىعاشىنان» داۋىستارىن اياعان جوق. ءبىراق، جەڭىسكە جەتۋگە كىشكەنە عانا باعى جانباي قالدى. ول وكىنىش ەمەس...

سەبەبى، جانات سەن مۇراتبەك سياقتى اتا-جۇرتىڭا كەلگەلى ون بەس جىل بولعان جوق. وسى جاقتا وقىپ، وسى جاقتا ورتا قالىپتاستىرىپ، دوستار جيىپ ۇلگەرە قويعان جوقسىڭ. سەن كەشە عانا كەلدىڭ. كەلدىڭ دە «جىعىلساڭ ناردان جىعىل» دەپ قازاقستاننىڭ ەڭ ءىرى جوبالارىنىڭ بىرىنە بىلەك سىبانىپ كىرىپ كەتتىڭ. ءوزىڭدى كورسەتتىڭ، فينالعا جەتتىڭ! بۇل - ۇلكەن جەڭىس. سەن مۇراتبەكتەي ازاماتقا مىقتى قارسىلاس بولا ءبىلدىڭ. ءتىپتى، ول جەڭىستى سەن الىپ كەتەمە دەپ قاتتى ۇرەيلەندى... مۇنى ول باۋىرىمىز مويىندايدى دەگەن ۇمىتتەمىز...

جانات! سەن جەڭىلگەن جوقسىڭ. سەن وسى «قازاقستان داۋسى» جوباسى ارقىلى ۇلكەن ساحناعا شىعاتىن جول جاسادىڭ. بولاشاعىڭ نۇرلى بولسىن جاس تالانت...!!!!

كۇنسۇلتان وتارباي