شىمكەنتتە ءتۇسىرىلىپ جاتقان «قازاق ەلى» مۋلتفيلمى حالىقارالىق بايقاۋعا ۇسىنىلادى - فوتو، ۆيدەو
بۇدان بۇرىن حابارلاعانىمىزداي «قازاق ەلى» اتتى تولىقمەتراجدى تۋىندىدا ەلدىڭ تاريحى، كەرەي مەن جانىبەكتىڭ بالالىق شاعى، ونداعى حانداردىڭ بيلىك قۇرعان ءداۋىرى كورىنىس تاپپاق.
باراق حاننىڭ بەينەسىن، ونىڭ حانعا ءتان قىراعىلىعى مەن تۇلعاسىن، ەلى ءۇشىن ەتكەن ەڭبەگىن انيماتور ءجانادىل بايداربەكوۆ سۋرەتتەپ جاتىر. ماماننىڭ سوزىنە سەنسەك، الىپ كەيىپكەردىڭ ءاربىر سەكۋندىق قيمىلىن جاساۋ ءۇشىن كەمىندە 25 سۋرەت سالىنادى.
«حاننىڭ ءاربىر قيمىلىن قاعازعا، كومپيۋتەردە سالماس بۇرىن ونىڭ وبرازىنا ەنەمىز، سونىڭ قىلىقتارىن جاساپ كورەمىز. ءرولدى ءوزىمىز ويناپ شىعامىز. اكتەر بولىپ، سونى جاساي وتىرىپ، كەيىپكەرگە جان بىتىرەمىز»، - دەيدى انيماتور ءجانادىل بايداربەكوۆ.
تۋىندىنىڭ رەجيسسەرى باتىرحان داۋرەنبەكوۆتىڭ ايتۋىنشا، وقيعالار كوپشىلىككە جاڭا جۇيە بويىنشا ۇسىنىلادى.
«مۋلتفيلمدە ءبىز تابيعاتتىڭ كورىنىسىن D3 فورماتى ارقىلى كورسەتىپ، قولمەن سالىنعان سۋرەتپەن قوسىپ، قولدانىپ جاتىرمىز. مۇنداي جاڭالىق قازاقستاندا ءالى كۇنگە بولماعان. رەسەيدە دە قولدانىلماعان. ءبىراق ءبىز قازىر وسىنى قولدان كەلگەنشە كاسىبي تۇردە جاساپ جاتىرمىز»، دەيدى رەجيسسەر.
«قازاق ەلى» تولىقمەتراجدى مۋلتيحيكاياسىنىڭ دايىندالۋى وسىدان 9 اي بۇرىن باستالعان. ول ءۇشىن بۇگىندە 50 دەن استام مامان كۇندىز- ءتۇنى اۋىسىممەن «ساق» كينوستۋدياسىندا قىزمەت ەتۋدە.
ايتا وتەيىك، 1 ساعاتتىق مۋلتحيكيكايا جاساۋ جۇمىستارى جەلتوقسان ايىندا اياقتالىپ، تاۋەلسىزدىك كۇنىندە تۇساۋى كەسىلەدى دەپ كۇتىلۋدە. ودان سوڭ «قازاق ەلى» تولىقمەتراجدى تۋىندىسى حالىقارالىق بايقاۋعا ۇسىنىلادى، دەپ حابارلايدى otyrar.kz.
ەسكە سالايىق، فيلمگە ارنايى جازىلعان «قاراقشىلار» ءانىن نۇرلان ابدۋللين، ساكەن مايعازييەۆ (مۋزارت توبى) سىندى كاسىبي انشىلەرمەن قاتار نۇرجان تولەندييەۆ («الداراسپان» تەاترى) ، بەرىك تۇرسىنبەكوۆتەي («شىمكەنت- شوۋ» تەاترى) ەلگە ازىلىمەن تانىلعان ازاماتتار ورىندايدى.