تارازدا شوگەن ويىنىنان قازاقستانداعى العاشقى جارىس ءوتتى

تاراز. قازاقپارات - كەشە تارازداعى «اتشابار» يپپودرومىندا جامبىل جانە وڭتۇستىك قازاقستان وبلىستارىنىڭ قۇرامالارى شوگەن ويىنىن كورسەتتى.

بۇل ويىندى وتكىزۋ ءۇشىن جۋىردا «اتشابار» يپپودرومى قالىپقا كەلتىرىلگەن. ول ەكى مىڭ كورەرمەندىك ورىن، ۆ ي پ- ورىن، سپورتتىق جولدارمەن قامتىلدى.

جولداستىق كەزدەسۋ كورەرمەندەردىڭ كوڭىلىنەن شىقتى.

سونىمەن قاتار، «اتشابار» يپپودرومىندا 2,4 كيلومەتر قاشىقتىققا جارىس، 21 شاقىرىمعا توپ بايگە جانە 31 شاقىرىمعا الامان بايگە ءوتتى.

«ۇلى دالا ويىندارى» ۇلتتىق سپورت تۇرلەرى بويىنشا جارىستاردىڭ سىيلىق قورى 32,3 ميلليون تەڭگەنى قۇرادى. ءبىرىنشى ورىن ءۇشىن بايگەدە 10 ميلليون تەڭگە، ەكىنشى ورىنعا 5 ميلليون تەڭگە، ۇشىنشىگە 2 ميلليون تەڭگە قاراستىرىلعان. بارلىق قارجى دەمەۋشىلەردەن الىندى.

سونداي-اق، «اتشابار» يپپودرومىندا كوكپارشىلار مەن ساداق اتۋشىلار مۇمكىندىكتەرىن كورسەتتى.

بۇگىن تارازدا قازاق حاندىعىنىڭ 550 جىلدىعى مەرەكەلىك شارالار باستالدى. وعان قازاقستان وبلىستارى مەن شەتەلدەردەن ەكى مىڭنان استام قوناق كەلدى.