قىتايدىڭ شيان قالاسىنان شىققان تۇيەلەر كەرۋەنى تاراز كەرۋەن سارايىنا جەتتى - فوتو
ەسكە سالا كەتەيىك، 2014 - جىلعى قىركۇيەكتە شياننان ەجەلگى ساۋدا جولىمەن «قىتاي - قازاقستان: ۇلى جىبەك جولىنىڭ شاي مادەنيەتى» دوستىق جانە ىنتىماقتاستىق كەرۋەنى جىبەك جولىنىڭ ەكونوميكالىق بەلدەۋىن قۇرۋ يدەياسىن قولداۋ ماقساتىندا جولعا شىققان بولاتىن. كەرۋەن قۇرامىندا 55 تۇيە بار، بۇل قازاق حاندىعى قۇرىلۋىنىڭ 550 جىلدىعىن بىلدىرەدى. جۇزدەن استام كەرۋەنشىلەر تاڭ اۋلەتى داۋىرىندەگى كيىمدەر كيىپ، كۇزەتشىلەرى ەرتەدەگى ۇزىن ساپتى نايزالارمەن قارۋلانعان. كەرۋەن ءشانشي پروۆينتسياسىندا وسىرىلەتىن فۋتسا ەمدىك شايىن اكەلدى.
قاشىقتىعى 7 مىڭ شاقىرىمنان اساتىن ساياحاتتى ۇيىمداستىرۋعا قازاقستاننىڭ دۇنگەن قاۋىمداستىعى مەن قىتايلىق «ي- زە فۋتسا» كومپانياسى (شيان) نيەت تانىتتى.
«قازاق حاندىعىنىڭ 550 جىلدىعىنا ارنالعان شارالارعا قاتىسۋ مەن ءۇشىن ۇلكەن مارتەبە، - دەدى «ي- زە فۋتسا» كومپانياسىنىڭ پرەزيدەنتى ما حىن گون. - قازاقستان پرەزيدەنتى مەن حالقىنا باقىت پەن دەنساۋلىق تىلەيمىن. ۇلى جىبەك جولىن جانداندىرۋ بويىنشا شارالار العا قويىلعان ماقساتتارعا جەتكىزەدى، ەلدەرىمىزدىڭ ساۋدا- ەكونوميكالىق ءدالىزىن جاڭارتىپ، قازاقستان مەن قىتاي اراسىندا ءوزارا ءتيىمدى جانە تاتۋ كورشىلىك قاتىناستى نىعايتاتىنىنا سەنەمىن».
تارازدىڭ باتىس بولىگىندە ورنالاسقان تورتكۇل كەرۋەن سارايىن 2008 - جىلى ءا. مارعۇلان اتىنداعى ارحەولوگيا ينستيتۋتىنىڭ ماماندارى قازدى. 80 شارشى مەتر اۋماقتا قوناق ۇيلەر، مونشالار جانە ۇلى جىبەك جولىنىڭ كەرۋەن سارايلارىن قامتىعان بارلىق ينفراقۇرىلىمى بار ەجەلگى كەرۋەن سارايدىڭ قالدىقتارى تابىلدى.
2010 - جىلى جۇرگىزىلگەن قالىپقا كەلتىرۋ جۇمىستارىنا قازىنادان 97 ميلليون تەڭگە ءبولىنىپ، 5 مەترلىك قابىرعالار كوتەرىلدى، ىشكى ينتەرەر جاڭادان قۇراستىرىلدى.