قازاقستان مەن رەسەي ەۋرازيالىق ەكونوميكالىق ىقپالداستىقتىڭ قوزعاۋشى كۇشى

استانا. قازاقپارات - پارلامەنت ماجىلىسىندە كەشە، 5- قازاندا حالىقارالىق ىستەر، قورعانىس جانە قاۋىپسىزدىك كوميتەتى مەن رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ وتانداستارمەن بايلانىس جانە ەۋرازيالىق ينتەگراتسيا، ت م د ىستەرى جونىندەگى كوميتەتىنىڭ العاشقى بىرلەسكەن وتىرىسى ءوتتى.

اتالعان كوميتەتتەر باسشىلارى ماۋلەن اشىمبايەۆ پەن لەونيد سلۋتسكي ءتوراعالىق ەتكەن جيىندا پارلامەنتتەر وكىلدەرى ەۋرازيالىق كەڭىستىكتەردە ينتەگراتسيالىق پروتسەستەردى ودان ءارى دامىتۋدىڭ وزەكتى ماسەلەلەرىن تالقىلادى. بۇل تۋرالى پالاتانىڭ باسپا ءسوز قىزمەتىنەن حابارلاندى.

تەڭ ءتوراعالاردىڭ اتاپ وتكەنىندەي، مۇنداي جيىن حالىقارالىق دەڭگەيدەگى ماڭىزدى ماسەلەلەر توڭىرەگىندە وي-پىكىر الماسىپ، ورتاق شەشىم قابىلداۋعا مۇمكىندىك بەرەدى. م. اشىمبايەۆ ءوز سوزىندە، ەۋرازيالىق ەكونوميكالىق ىسكە كىرىسكەن توعىز ايدىڭ ىشىندە ۇتىمدىلىعىن كورسەتىپ كەلە جاتقانىن، قازاقستان ءۇشىن زور مۇمكىندىكتەرگە جول اشاتىنىن ايتتى. «بۇل ءبىزدىڭ الەمدىك ەكونوميكادا باسەكەگە قابىلەتتىلىگىمىزدى كۇشەيتەدى. وسى جولدا ءبىزدىڭ ەلدەرىمىز باسشىلارى كوپ جۇمىستار اتقارۋدا، ءبىز ءوز كەزەگىمىزدە پارلامەنتارالىق بايلانىستارىمىزدى نىعايتا وتىرىپ، قولداۋ كورسەتۋىمىز كەرەك، - دەدى دەپۋتات.

ءوز كەزەگىندە لەونيد سلۋتسكي دە سىندارلى پىكىرىن ءبىلدىرىپ، قازاقستان مەن رەسەيدى ەۋرازيالىق ەكونوميكالىق ينتەگراتسيانىڭ قوزعاۋشى كۇشىنە تەڭەدى. تالقىلاۋ بارىسىندا ەكونوميكا، گۋمانيتارلىق، ءبىلىم سالالارىندا ۇلتتىق زاڭنامالاردى ۇندەستىرۋ ماسەلەسىنە كوڭىل ءبولىندى. قاتىسۋشىلار ءبىرقاتار حالىقارالىق باستامالارعا قاتىستى ءوز قولداۋلارىن ءبىلدىردى. ماسەلەن، قازاقستاندىق جانە رەسەيلىك دەپۋتاتتار قازاقستان پرەزيدەنتى نۇرسۇلتان نازاربايەۆتىڭ 2016-جىلى حالىقارالىق قۇقىق جونىندە كونفەرەنسيا وتكىزۋ تۋرالى ۇسىنىسىن جۇزەگە اسىرۋعا بەلسەنە قاتىسپاق. ونىڭ ىشىندە پارلامەنت وكىلدەرى تۇراقتى ەكونوميكالىق دامۋ باعىتىن ىسكە اسىرۋعا باسا نازار اۋدارادى.

جيىن بارىسىندا كوميتەتتەر اراسىندا ىنتىماقتاستىق بەلسەندىلىگىن ارتتىرۋعا قاتىستى كەلىسىمگە قول جەتكىزىلدى. م. اشىمبايەۆتىڭ ايتۋىنشا، كوميتەتتەر قازاقستان مەن رەسەي پارلامەنتتەرى پالاتالارىنىڭ ءوزارا ءىس-قيمىلىن ۇيلەستىرۋشى ءرولىن اتقارا الادى. وسى رەتتە كوميتەت ءتوراعاسى ە ا ە و جانە جىبەك جولى ەكونوميكالىق بەلدەۋى قىتايلىق جوباسىنىڭ ءتۇيىسۋى، ە ا ە و پەن ە و ءتۇيىسۋى، سونداي-اق، ۋكرايندىق ارىپتەستەرمەن ءۇن قاتىسۋ ورناتۋ باسىم باعىتتاردىڭ ءبىرى ەكەنىن اتاپ ءوتتى.

الداعى ۋاقىتتا ەكى ەل دەپۋتاتتارى قورعانىس-ونەركاسىپ سالاسى ماسەلەلەرىن تالقىلاۋدى مەجەلەپ وتىر. سونداي-اق، جەمقورلىققا قارسى ءىس-قيمىل جونىندەگى قۇقىقتىق بازانى قالىپتاستىرۋ باعىتىندا ىنتىماقتاستىق تۋرالى قۇجات ازىرلەپ، قول قويۋ تۋرالى دا ۇسىنىس ايتىلدى.

اۆتور: قانات مامەتقازى ۇلى