اقتوبە وبلىسىندا ءابىلقايىر حاننىڭ مەموريالدىق كەشەنى اشىلدى - فوتو

اقتوبە. قازاقپارات - ايماقتا قازاق حاندىعىنىڭ 550 جىلدىعىن مەرەكەلەۋ اياسىندا ايتەكە بي اۋدانىندا كىشى ءجۇزدىڭ ۇلى حانى، جوڭعارلاردان ازات ەتۋ كۇرەسىندە بىرىكتىرىلگەن قازاق حالقى جاساقتارىنا قولباسشى بولعان ءابىلقايىر حان جەرلەنگەن «حان مولاسى» ورتاعاسىرلىق قورىمىندا قازاقتىڭ ەڭ اتاقتى حاندارىنىڭ بىرىنە ارنالعان مەموريالدىق كەشەن اشىلدى.

ءابىلقايىر حان بابالارىنىڭ باستاۋىمەن قازاق جاۋىنگەرلەرى سايرام، تۇركىستان جانەتاشكەنت قالالارىن قورعاۋ جولىندا ەرەن ەرلىگىمەن كوزگە ءتۇستى. 1728 - جىلى قازاق اسكەرى جەڭىسكە قول جەتكىزدى. بۇل شايقاستار ۇلىتاۋ تاۋلارىندا، قاراسيىر جەرى مەن بۇلانتى وزەنىنىڭ بويىندا بولدى، مۇندا قازاقتار قونتايشىنىڭ ۇلى باسقاراتىن ەكسپەديتسيالىق كورپۋستى تالقاندادى. بۇل جەڭىستەن كەيىن حالىق كوكەيىندە جەڭىسكە قول جەتكىزۋگە بولادى دەگەن سەنىم ۇيالادى. باسقىنشىلارعا قارسى حالىق جۇمىلا كوتەرىلدى.

1730 - جىلى كوكتەمدە بالقاشتىڭ وڭتۇستىك شىعىسىنداعى يتىشپەس ەلدى مەكەنىندە ءابىلقايىر باستاعان قازاق اسكەرى جاۋلاردى تاعى تالقاندادى. جوڭعارلارعا قارسى ءجۇز جىلدىق سوعىستا قازاق حالقى وزگەرىستى كەزەڭگە اياق باستى، جەڭىسكە ءبىر تابان جاقىنداعانداي بولدى.

 اقتوبەدە مەرەيتويدى اتاپ ءوتۋ بارىسىندا ءابىلقايىر حاننىڭ ەسكەرتكىشىنە گۇل شوقتارىن قويۋ ءراسىمى، قولدانبالى ونەر شەبەرلەرىنىڭ حالىقارالىق جارمەڭكەسى، فوتوكورمە، ايماقتىق اقىندار ايتىسى، عىلىمي كونفەرەنسيا، سايرام شايقاسىنىڭ قاتىسۋشىسى، باتىر تىلەۋ ايت ۇلىنا ارنالعان ەسكەرتكىشتىڭ اشىلۋ سالتاناتى بولىپ ءوتتى.

 ايتەكە بي اۋدانىنداعى تولىباي اۋىلىندا ەلدىڭ بىرنەشە ايماعىنان جينالعان فولكلورلىق انسامبلدەر فەستيۆالى ءوتتى، ەتنواۋىل اشىلدى، كونسەرتتەر، ات سپورتى جارىسى جانە حالىق جارىستارىنىڭ باسقا تۇرلەرى ءوتىپ، ءابىلقايىر حاننىڭ مۇراجايى اشىلدى.

 مەموريالدىق كەشەننىڭ اشىلۋىنا ەلدىڭ كوپتەگەن ايماقتارىنان، كورشىلەس رەسەيدەن قوناقتار، قازاقستاننىڭ مەملەكەتتىك جانە قوعام قايراتكەرلەرى، پارلامەنت دەپۋتاتتارى، حان ۇرپاعى جينالدى.

شارا بارىسىندا اقتوبە وبلىسىنىڭ اكىمى بەردىبەك ساپاربايەۆ، قوستاناي وبلىسىنىڭ اكىمى ارحيمەد مۇحامبەتوۆ، ق ر پارلامەنت سەناتىنىڭ دەپۋتاتى ەلەۋسىن ساعىندىقوۆ، مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ، ق ر ۇلتتىق مۇراجاي ديرەكتورى دارحان مىڭباي، جوبانىڭ باس ساۋلەتشىسى بەك ىبىرايەۆ جانە تاعى باسقالارى ءسوز سويلەدى.