شياننان جىبەك جولى جولباعىتى بويىنشا اتتانعان كەرۋەندى جامبىلدىق ءۇشبۇلاق اۋلىندا سالتاناتپەن قارسى الۋعا ازىرلىك جۇرگىزىلۋدە - فوتو
بۇل جەر ەجەلگى تارازعا كىرەبەرىستەگى ۇلى جىبەك جولىنىڭ بۇرىنعى ماڭىزدى بۋىنى بولعان.
ەسكە سالا كەتەيىك، 2014-جىلعى قىركۇيەكتە شياننان ەجەلگى ساۋدا جولىمەن «قىتاي - قازاقستان: ۇلى جىبەك جولىنىڭ شاي مادەنيەتى» دوستىق جانە ىنتىماقتاستىق كەرۋەنى جىبەك جولىنىڭ ەكونوميكالىق بەلدەۋىن قۇرۋ يدەياسىن قولداۋ ماقساتىندا جولعا شىققان بولاتىن.
كەرۋەن شانشي پروۆينتسياسىندا وسىرىلەتىن فۋتسا ەمدىك ديان تاقتاشايىن اكەلە جاتىر جانە تارازعا قازاق مەملەكەتتىلىگىنىڭ 550 جىلدىق مەرەيتويىن مەرەكەلەۋ باستالۋىنا جەتۋى ءتيىس.
«شيان-تاراز» دوستىق جانە ىنتىماقتاستىق كەرۋەنى 5 مىڭ شاقىرىم جول ءجۇرىپ، جامبىل جەرىنە جەتتى، - دەپ حابارلادى تەلەفون ارقىلى «قازاقپارات» ح ا ا تىلشىسىنە «جاڭا جىبەك جولى» حالىقارالىق اكادەمياسى» و ف پرەزيدەنتى، «قازاقستان دۇنگەندەرى قاۋىمداستىعى» ەتنومادەني بىرلەستىگىن باسقاراتىن حۋسەي داۋروۆ. - كەرۋەن قۇرامىندا 55 تۇيە بار، بۇل قازاق حاندىعى قۇرىلۋىنىڭ 550 جىلدىعىن بەينەلەيدى. سونىمەن بىرگە 20 وتە ادەمى اتتار بار. جۇزدەن استام كەرۋەنشىلەر تاڭ اۋلەتى داۋىرىندەگى كيىمدەر كيىپ، كۇزەتشىلەرى ەرتەدەگى ۇزىن ساپتى نايزالارمەن قارۋلانعان».
26- قىركۇيەكتە كەرۋەندى جامبىل جانە الماتى وبلىستارىنىڭ شەكاراسىندا قازاقستاندىق قوناقجايلىلىقپەن قارسى الدى. قورداي اۋىلىندا كيىز ۇيلەر تىگىلىپ، بالالارعا ارنالعان ويىن-ساۋىق الاڭقايلارى جاسالدى. قوناقتارعا قازاقتىڭ ۇلتتىق تاعامدارى ۇسىنىلدى، كونسەرتتىك باعدارلاما قويىلىپ، ۇلتتىق ويىندار كورسەتىلدى. كەرۋەننىڭ كەلەسى كەزدەسۋى جامبىل جەرىندەگى ءۇشبۇلاق اۋىلىندا 2- قازاندا بولادى، دەپ اڭگىمەلەدى ح. داۋروۆ.
قاشىقتىعى 5 مىڭ شاقىرىمنان اساتىن ساياحاتتى ۇيىمداستىرۋعا قازاقستاننىڭ دۇنگەن قاۋىمداستىعى مەن «ي-زە فۋتسا» كومپانياسى (شيان، قىتاي) باستاماشى بولدى حالىقارالىق ەكسپەديتسيانىڭ قازاقستاندىق بولىگىنىڭ باس وپەراتورى الماتى وبلىسى كاسىپكەرلەر پالاتاسى مەن «جاڭا جىبەك جولى» مادەني جانە ەكونوميكالىق ىنتىماقتاستىق حالىقارالىق اكادەمياسى» و ف. شارا ۇيىمداستىرۋشىلارى - شيان قالاسىنىڭ اكىمشىلىگى، الماتى جانە جامبىل وبلىستارىنىڭ، الماتى قالاسىنىڭ اكىمدىكتەرى.