قازاق-قىرعىز شەكاراسىنىڭ اشىلۋى قازاقستان ينۆەستورلارى ءۇشىن جاقسى بيزنەس كوكجيەگىن اشادى - ن. ءابىلشايىقوۆ
وسىنداي ويىمەن الماتى قالالىق كاسىپكەرلەر پالاتاسىنىڭ ەكونوميكالىق ساراپتاما ءبولىمىنىڭ باسشىسى ناريمان ءابىلشايىقوۆ ءبولىستى.
ونىڭ ايتۋىنشا، قىرعىز رەسپۋبليكاسى - قازاقستان ءۇشىن ستراتەگيالىق ماڭىزى جوعارى كورشىلەس ەل.
«2015-جىلدىڭ ەكىنشى جارتىسىنان قىرعىز ەلى ە ا ە و- عا ەنۋگە تالپىنىس ءبىلدىرىپ جاتىر. قازىرگى تاڭدا ە ا ە و- عا 5 ەل كىرىپ وتىر. قىرعىزستان - قازاقستان ءۇشىم ماڭىزدى ستراتەگيالىق كورشى ەل. ەڭ الدىمەن، مۇنىڭ ەكونوميكالىق تۇرعىدان ءتيىمدى تۇستارى باسىمىراق. البەتتە، ە ا ە و- نىڭ قۇرىلۋى ساياسي مۇددەلەردى كوكسەمەيدى. ەكى ەلدىڭ قارىم قاتىناسى وتە جاقسى دامىعان. اسىرەسە، جەڭىل ونەركاسىپ سالالارى مەن تاماق ونەركاسىبى سالالارى وتە بايلانىستى. رەسەيدە 145 ميلليون ادام تۇرسا، قىرعىز ەلىندە 5 ميلليون ادام ءومىر سۇرەدى. بۇل قازاقستانعا قوسىمشا نارىق جانە قازاقستاندىق ينۆەستورلار ءۇشىن وتە جاقسى مۇمكىندىك. ءبىزدىڭ كاسىپكەرلەرگە قىرعىز ەلىندە ءوز كومپانيالارىنىڭ فيليالدارىن اشىپ كەڭەيۋىنە مۇمكىندىك بار»، - دەدى ول.
ساراپشى وتاندىق تاۋارلاردىڭ باسەكەگە قابىلەتتىلىگىن ارتتىرۋ ءۇشىن ساۋدا جانە جەڭىل ونەركاسىپ سۋبەكتىلەرىن مەملەكەتتىك قولداۋ شارالارىن وزگەرتۋ كەرەك دەپ سانايدى.
«ارينە، ەلىمىزدە بيزنەستى قولداۋدىڭ كوپتەگەن مەملەكەتتىك باعدارلامالار جۇمىس ىستەپ تۇر. يندۋستريالاندىرۋ كارتاسى، «بيزنەستىڭ جول كارتاسى-2020» باعدارلامالارىندا ساۋدا جانە قىزمەت كورسەتۋ سالالارىنا باسىمدىق بەرىلمەگەن. ال الماتى قالاسىنىڭ ج ءا و سانايتىن بولساق، وندا تابىستىڭ باسىم كوپشىلىگى قىزمەت كورسەتۋ مەن ساۋدا سالاسىنان ءتۇسىپ جاتىر. قىرعىز-قازاق شەكاراسىنىڭ اشىلۋىنىڭ ءوزارا ساۋدانىڭ دامۋىنا تيگىزەر ىقپالىن ەسكەرە وتىرىپ، ارزان تاۋاردىڭ سوققىسىنان وتاندىق كاسىپكەرلەرىمىزدى قورعاۋىمىز كەرەك. ولارعا دەمەۋ قارجى بەرۋ، مەملەكەتتىك كەپىلدەندىرۋ، گرانت بەرۋدى كەڭەيتە ءتۇسۋ كەرەك»، - دەدى ن. ءابىلشايىقوۆ.
ساراپشى قوس ەل اراسىنداعى شەكارانىڭ اشىلۋىنىڭ قاۋىپ تۋدىراتىن تۇستارىن دا اتاپ ءوتتى. ونىڭ ايتۋىنشا، ارزان تاۋاردىڭ اعىنى قازاقستان نارىعىن جاۋلاپ الۋى عاجاپ ەمەس.
«جالپى بۇل ماسەلەدە قاۋىپ بار. ءبىراق، قازىرگى تاڭدا قازاقستاندا، اسىرەسە الماتىدا جەڭىل ونەركاسىپ جاقسى دامىعان. سوندىقتان، وتاندىق ونىمدەر دە باسەكەگە قابىلەتتى دەپ سانايمىن. سونداي-اق، كورشى ەلدەن ارزان جۇمىس كۇشىنىڭ اعىنى ارتادى. قازىر ق ر ەلىمىزگە الماتىعا اقشا تابۋ ءۇشىن ەڭبەك ميگرانتتارى كەلەدى دەپ قورقىنىش تۋىنداپ وتىر. قازىردىڭ وزىندە زاڭسىز ەڭبەك ميگرانتتارىنىڭ ماسەلەسى ۋشىعىپ تۇر. كوشى-قون پوليتسياسىنىڭ جۇمىسىن وسى باعىتتا كۇشەيتە ءتۇسۋ كەرەك دەپ سانايمىن»، - دەدى ناريمان باقتىباي ۇلى.
ايتا كەتەيىك، قىرعىز رەسپۋبليكاسىنىڭ ەۋرازيالىق ەكونوميكالىق وداققا (ە ا ە و) مۇشە ەلدەرمەن شەكاراسىندا كەدەندىك باقىلاۋ بەكەتتەرىن الىپ تاستاۋ ءراسىمى 12- تامىزعا بەلگىلەنگەن.
قىرعىز رەسپۋبليكاسى مەن قازاقستان اراسىندا كەدەندىك شەكارانىڭ سالتاناتتى اشىلۋ راسىمىنە ەكى ەل باسشىسى قاتىسادى.
ەسكە سالا كەتسەك، قىرعىز بيلىگى كەدەندىك وداققا كىرۋ تۋرالى شەشىمدى 2011-جىلدىڭ كوكتەمىندە قابىلداعان بولاتىن. 2014-جىلدىڭ جەلتوقسانىندا ماسكەۋدە تاراپتار رەسپۋبليكانىڭ ە ا ە و- عا قوسىلۋى تۋرالى كەلىسىمگە، ال مامىردا ونىڭ ءۇش حاتتاماسىنا قول قويدى.
اۆتور: گۇلميرا عوسمانالي