قازاقستاننىڭ دارىندى وقۋشىلارى ماشات شاتقالىنداعى جازعى لاگەردە دەمالاتىن بولادى
09:55, 10 - تامىز 2015
شىمكەنت. قازاقپارات - جۇزدەگەن اتىراۋلىق بالالار وڭتۇستىك قازاقستان وڭىرىندەگى لاگەردە دەمالىپ جاتىر.
تابيعاتى اسەم ماشات شاتقالىنداعى لاگەر تاۋدىڭ ەتەگىندە، تازا تاۋ وزەنىنىڭ ماڭىندا ورىن تەپكەن. اتىراۋلىق جاس ورەندەر مۇندا 12 كۇن بويى دەمالادى.
«بىزدە مۇنداي تاۋلار جوق. ەرتەگىلەر ەلىنە تاپ بولعانداي اسەردە ءجۇرمىز»، - دەيدى اتىراۋلىق وقۋشى الەكساندر يۋگاي.
لاگەر اۋماعىندا باسسەين، سپورت الاڭى بار. بالالاردىڭ ۋاقىتتارىن ءتيىمدى ءارى كوڭىلدى وتكىزۋى ءۇشىن بارلىق جاعداي جاسالعان.
قازىرگى كەزدە لاگەردە اتىراۋدان كەلگەن 300 بالا دەمالۋدا. جاز سوڭىنا دەيىن تاعى سونشا ورەن كەلمەك. دەمالۋشىلاردىڭ ىشىنەن اسا بەلسەندىلىك تانىتقاندارى لاگەردىڭ جابىلۋ سالتاناتىنا شاقىرىلاتىن بولادى.
كەلەسى جىلدان باستاپ قازاقستاننىڭ دارىندى وقۋشىلارى دا ماشات شاتقالىندا دەمالاتىن بولادى دەپ جوسپارلانۋدا.