اباق كەرەيدىڭ التاي اسۋى جانە ءتورت ءبي، تورە زاڭى

استانا. قازاقپارات - تاريح قالتارىسىنداعى بەيمالىم تۇستاردى ەلەپ- ەكشەپ، ونى اقيقات ءھام ۇلت مۇددەسى تۇرعىسىنان قورىتىپ، حالىق قازىناسىنا اينالدىرۋ -كوكىرەگى وياۋ، اردا ازاماتتاردىڭ اسىل بورىشى. وسىنداي ازاماتتىق ۇستانىمداعى ارىپتەسىمىز قىدىربەك قيىسحان ۇلى گازەتىمىزدىڭ وتكەن سانىندا جارىق كورگەن اباق كەرەي تايپاسىنىڭ ق ح ر- دىڭ س ۋ ا ر ولكەسىنە قونىستانۋى جانە اباق كەرەيدىڭ ەرەجەسى تۋرالى ماقالاسى قازاق وقىرمانىنىڭ تاريحي تانىمىن ارتتىراتىنى تالاسسىز شىندىق.

دەسەك تە، قيىسحان باۋىرىمىزدىڭ پەيىلى وڭ بولعانىمەن، تاريحتى تارقاتا ايتۋدا ءبازبىر كەمشىلىكتەرگە جول بەرگەن سەكىلدى. «بابا تاريح» قارعا تامىرلى قازاقتىڭ ورتاق ەنشىسى بولعاندىقتان، شىعىس تۇركىستان اۋماعىنا اباق كەرەيدىڭ قالاي اۋا كوشىپ بارعاندىعىن، سونداي-اق، ەجەلگى ادەت- عۇرىپ زاڭىنىڭ سارقىنشاعى «ءتورت ءبي، تورە زاڭى» تۋرالى ءبىز دە بىلەتىنىمىزدى وقىرمان تالقىسىنا سالۋدى ءجون كوردىك.

«كەرەي قايدا باراسىڭ؟» اتتى تولعاۋدىڭ استارىنداعى اقيقات بىرىنشىدەن، ماقالا يەسى «كەرەيدىڭ باتىرى جانىبەكتىڭ وتارشىلدىق ساياساتقا نارازى بولىپ، ءوز قاراماعىنداعى حالىقتى ەرتىپ شىڭجانعا كوشكەن...» دەگەن دەرەكتى ناقتى قانداي دەرەككوزدەن العانىن كورسەتپەپتى. ال س. تولىبەكوۆتىڭ: «ابىلمامبەت حاننىڭ تۇسىندا، 1742 - جىلى ورتا ءجۇزدىڭ بەدەلدىلەرى رەسەي بيلىگىنە قاراۋعا نارازى بولىپ، ءوز قاراماعىنداعى ەلدىڭ ءبىرازىن الىپ، شىعىس تۇركىستانعا كوشكەن» دەگەن تۇجىرىمىنا كەلەتىن بولساق، بۇل تاريحي نەگىزى ءدۇدامالداۋ قورىتىندى.

راس، 1742 - جىلى ورتا ءجۇزدىڭ بيلەۋشىلەرى رەسەي پاتشالىعىنا بودان بولۋعا انت بەرگەن. ءبىراق، شىن مانىندە، ورتا ءجۇز حالقى رەسەيگە ابىلاي حاننىڭ ولىمىنەن كەيىن باعىنا باستادى. ش. ءۋاليحانوۆ «ابىلاي حان» اتتى زەرتتەۋىندە قازاق حاندىعىنىڭ XVIII عاسىرداعى ساياسي احۋالىنا توقتالا كەلىپ، ابىلاي حان بىردە رەسەي پاتشاسىنا، بىردە قىتاي بوعدىحانىنا باعىندىم دەگەنىمەن، شىنتۋايتىندا ەشقايسىسىنا بودان بولعان ەمەس (شوقان ءۋاليحانوۆ شىعارمالارى. 1- توم. ابىلاي حان. 224-231 بەتتەر. «مادەني مۇرا» باعدارلاماسى. استانا 2010) دەپ تۇجىرىمدايدى. تەگىندە، رەسەيدىڭ اكىمشىلىك جۇيەسى ورتا جۇزگە 1822 - جىلى م. م. سپەرانسكييدىڭ «ءسىبىر قازاقتارىنىڭ جارعىسى» رەفورماسىنان سوڭ ورنىعا باستادى (قاراڭىز: ە. بەكماحانوۆ. كازاحستان ۆ 20-ە ي 40-ە گودى XIX ۆەكا. الماتى 1991).

وعان دەيىن، رەسەي پاتشالىعىنا ورتا ءجۇز حالقى ءسوز جۇزىندە عانا باعىنىشتى بولىپ كەلدى. ياعني، قيىسحان باۋىرىمىزدىڭ XVIII عاسىردىڭ ورتا شەنىندە ءومىر سۇرگەن كەرەيدىڭ باتىرى جانىبەكتىڭ ورىستىڭ وتارشىلدىق ساياساتىنا نارازى بولىپ، شىڭجانعا كوشتى دەگەن تۇجىرىمى نەگىزسىزدەۋ ايتىلعان.

ال اباق كەرەيدىڭ سىر بويىنان شىعىسقا بەت تۇزەپ ۇدەرە كوشۋى تۋرالى احمەتوللا قالي ۇلى «سۋفيزم تاعىلىمىنىڭ شىعىس وڭىرلەرىنە تارالۋى» اتتى زەرتتەۋ جۇمىسىندا: «ابىلاي حاننىڭ وڭ تىزەسىن باسقان قازاقتىڭ بەلدى باتىرلارىنىڭ ءبىرى بەرداۋلەت ۇلى جانىبەك باتىردىڭ جوڭعاردى تۇرە قۋىپ، بۇل وڭىرگە اباق كەرەيدى كوشىرىپ الىپ كەلگەندىگىن ايتا كەلىپ، ەل اۋزىندا قالعان بۇقار جىراۋدىڭ «...كەرەي قايدا باراسىڭ» دەپ باستالاتىن تولعاۋىنان تەرەڭ تاريحي سىر شەرتەدى: «اباق كەرەي وسى مەكەندە (ءسىرا سىر بويى بولسا كەرەك. -م. ي.) جۇرگەندە ءبىر جىلى ۇلكەن توي بولادى. تويدا اباق ەلى مەن ارعىن ەلى سوعىسىپ قالادى. سوعىستا ءبىر قىدىرۋ ادام ەكى جاقتان دا جارالانادى.

سويىلعا جىعىلعانداردىڭ ىشىنەن ارعىننىڭ اقمىرزا دەگەن جىگىتى قازا بولىپ، جالاسى كەرەيگە قالادى. ارااعايىندار اراعا ءجۇرىپ، بۇل داۋدى قازاق زاڭى بويىنشا كەرەيدەن ارعىنعا قۇن الىپ بەرىپ، اباقتىنى ارعىننىڭ اياعىنا جىعىپ بىتىرمەك بولادى. بۇعان كەرەي جاعى: «ءبىز ادام ولتىرگەنىمىز جوق، ارعىننىڭ ءوز اراسىندا وشتىك بار. وسى ورايدا ءبىرىن-ءبىرى ءولتىرىپ، جالاسىن بىزگە جاۋىپ وتىر، اعايىننىڭ ءبارى ىرگەلى ارعىنعا بۇرىپ سويلەدى. ىرگەدەن جاۋ، بەلدەۋدەن داۋ شىقتى، وسى قاستىق قالىپ، وشتىك وشكەنشە موينى ۇزاق ءبىر جەرگە دالدالانا تۇرعانىمىز ابزال» دەپ اباق كەرەي بۇل ماڭنان اۋا كوشىپ جونەلەدى.

بۇل چيانلۇڭنىڭ 36 - جىلى ەكەن (قازاق ول تۇستا چيڭ پاتشالىعىنىڭ چيانلۇڭ حانىنىڭ جىلناماسىن قولدانعان. ال، بۇل 1771 - جىلى ەكەن). بۇل كەز قازاق پەن قىرعىز اراسىنداعى قاقتىعىس اياقتالىپ، قىرعىز حانى قىزى تۇماردى ابىلپەيىز حانعا بەرىپ، ەندى عانا تىنىشتىق ورناعان كەز ەكەن.

ول زاماندا ەل ءىشىنىڭ تىنىشتىعى، ىرگەنىڭ بۇتىندىگى، اعايىننىڭ تاتۋلىعى ەلدىڭ ەل بولۋىنىڭ نەگىزى ەدى. وسىنى ويلاعان ەل جاقسىلارى كوشكەن كەرەيدى توقتاتۋ ءۇشىن ارتىنان قۋىپ بارىپ اقىل ايتىپ قايتارۋعا بۇقاردى جىبەرەدى. بۇقار سىر بويىن جاعالاپ كوش ىزىنە ءتۇسىپ ەلدى قۋىپ جەتكەن سوڭ، ەلدىڭ بەتىن سۋىققا سالعان سۇرقىن بايقاپ «ەلدىڭ سۇرقى سۋىق ەكەن، كۇش بەرەر ءتۇرى جوق، ەندى قىزىل ءتىلدىڭ كۇشىمەن ءبىر ءىلىپ كورەيىن، ىلدىرسە ءىستىڭ وڭعانى، ىلدىرمەسە مىستىڭ قۇرىعانى» دەيدى دە ەلباسىلارىنىڭ جۇرەگىن شايلىقتىرماق، وي سالماق بولىپ:

« كەرەي قايدا باراسىڭ؟

سىردىڭ بويىن كەبەلەپ

سوڭىڭنان قۋىپ مەن كەلدىم،

تۇلپارىمدى جەبەلەپ.

ەندى الدىڭنان شىعايىن،

جاڭبىردايىن سەبەلەپ.

اقمىرزامدى ءولتىردىڭ،

اق سويىلمەن توبەلەپ.

تانىماساڭ سەن مەنى،

ارعىن دەگەن ارىسپىن،

ازۋى كەرە قارىسپىن.

سەن بۇزاۋ تەرىسى شونشىكسىڭ،

مەن وگىز تەرىسى تالىسپىن.

حان الدىندا بىتىسسەڭ،

قۇداندالى تانىسپىن.

حان الدىندا بىتپەسەڭ،

اتاسىن بىلمەس الىسپىن.

كوشىڭ كەتەر ءبىر جاققا،

مالىڭ كەتەر ءبىر جاققا،

كوش سوڭىنان جەتە الماي،

ەسىڭ شىعار سول شاقتا.

بۇل بەتىڭمەن كەتەرسىڭ،

باسقا لاشىق تىگەرسىڭ.

اۋزىڭنان اس كەتەر،

قارا كوزدەن جاس كەتەر.

رايىڭنان قايتپاساڭ،

كەۋدەڭدەگى دۋلىعالى باس كەتەر»،

دەپ قاتاڭ ءسوز قوزعاپتى. سوندا اباقتىڭ البىرت باتىرلارىنىڭ ءبىرى ۇلكەندەر ءسوز باستاعانشا، وراعىتىپ العا ءتۇسىپ:

«ارىسىڭدى ايتىپ اپتىقپا،

كەلەمىز ءبىلىپ ساقتىقتا.

كورسەتپە كەلە قۇقاي كۇش،

جايىڭدى ايت، اتتان ءتۇس.

شاڭىرقاپسىڭ شالاپ ءىش،

بىتەر سون سوڭ قالعان ءىس»، -دەپ دۇرسە قويا بەرىپتى. ۇلكەندەر بۇقاردى اتتان ءتۇسىرىپ، كۇتىپ، قالعان ەلدىڭ باۋىرمالدىعىنا ءسۇيىنىپ «ەلدىڭ ەلدىگىنە، ەردىڭ ەرلىگىنە باس»، « ارعىننىڭ قىلىعىنا ءتيدى-اۋ، كەرەيدىڭ مالىنا سۇراۋ بولماعان سوڭ وكپەلەپ اۋدىق، ەندى قايىرىلا المايمىز، كوڭىلدەرىڭە قاياۋ الماڭدار» دەپ ءمان-جايدى ۇعىندىرىپ، بۇقاردى جولعا سالادى. اۋعان كوش قالبا، ماڭراق، كىشكەنە تاۋ... دەگەن تاۋلارى، جايساڭ كول (ورىس تىلىنە ۇندەسىپ، كەيىن زايسان كول اتانىپ كەتكەن)، كىشكەنە كول دەگەن كولدەرى بار وڭىردەن ىرگە تەۋىپ، شىعىسى ساۋىر تاۋىنىڭ شىعىس تۇمسىعى، ۇلىڭگىر كولى، ۇلىڭگىر وزەنى بويىنا دەيىن كەڭ كوسىلىپ ورنىعادى.

ءاسىلى بۇل كەرەي تايپاسىنىڭ جوڭعار جاۋگەرشىلىگى زامانىنان بۇرىنعى قارا قونىسى ەدى، كەيىن شاپقىنشىلىقتار تۇسىندا ىرگە اۋدارىپ، ىعىسىپ كەتكەن- دى. اباق كەرەي سول مەكەنگە قايتا ورالادى (احمەتوللا قالي ۇلى. سۋفيزم تاعىلىمىنىڭ شىعىس وڭىرلەرگە تارالۋى. تۇركىستان مادەنيەتى مەن تاريحى. تۇركىستان 2000).

قىتاي قازاقتارىنا 2005 - جىلى ساپارلاي بارعانىمىزدا، بۇقار جىراۋدىڭ «كەرەي قايدا باراسىڭ؟» اتتى تولعاۋىن ءاربىر اۋىلدىڭ اقساقالى كەرەيدىڭ شەجىرەسىن تارقاتقاندا جاتقا ايتاتىنىن ەستىپ كورگەن ەدىك. دەمەك، احمەتوللا قالي ۇلى اباق كەرەيدىڭ كوشى تۋرالى فولكلورلىق دەرەككە ارقا سۇيەگەنىمەن، بۇقار جىراۋدىڭ «كەرەي قايدا باراسىڭ؟» اتتى تولعاۋىن باسقاشا قورىتۋ مۇمكىن ەمەس سياقتى. سوندىقتان، «كەرەيدىڭ باتىرى جانىبەكتىڭ وتارشىلدىق ساياساتقا نارازى بولىپ، ءوز قاراماعىنداعى حالىقتى ەرتىپ شىڭجانعا كوشكەن...» دەگەن تۇجىرىمدى تاريحي شىندىق ەمەس دەپ قابىلداعان ءجون.

ءور التايعا ابىلاي حاننىڭ ايلاكەرلىگىنىڭ ارقاسىندا قول جەتكىزدىك

ەكىنشىدەن، ماقالا يەسى: « ۇيعىر ءتىلى ⅩⅨ عاسىردا التاي ولكەسىندەگى قازاق، ۇيعىر، دۇنگەندەردىڭ ورتاق تىلدەرىنىڭ ءبىرى بولىپ كەلگەن» دەپ قاتەلىككە بوي الدىرعان. ۇيعىر ءتىلى التاي قازاق حالقىنىڭ ەشقاشان ورتاق ءتىلى بولعان ەمەس. اۆتور، بۇل جەردە شاعاتاي تىلىمەن ۇيعىر ءتىلىن شاتاستىرىپ تۇرعان ءتارىزدى. ال، شاعاتاي ءتىلى ورتالىق ازيا مۇسىلماندارىنىڭ ورتا عاسىرلارداعى كىتابي ءتىلى بولىپ كەلگەنى بەلگىلى. سونىمەن بىرگە، قيىسحان باۋىرىمىز: « باسقا بىرەۋدىڭ جەرىندە ءجۇرىپ، ول ەلدىڭ ەمەۋىرىنەن قورىقپاي، ءوز جارعىسىن جاساپ، ءوز ىشىندە بيلەۋشىسىن سايلاعان ات توبەلىندەي قازاق بالاسىنىڭ مۇنداي ەرلىگى كەيىنگى ۇرپاققا تاتىمدى ناسيحات ەكەنى ءسوزسىز» دەپ اباق كەرەيدىڭ قۇتتى قونىسى ءور التايدىڭ كۇنگەي بەتكەيىن قارا قىتايعا تەلىمدەي سالىپتى.

ال قىتايداعى قازاق تاريحىن تەرەڭ زەرتتەپ جۇرگەن ن. مۇحامەتحان ۇلى: «چيڭ پاتشالىعى XVІІІ عاسىردىڭ ورتا شەنىندە جوڭعار حاندىعىن جويىسىمەن-اق، ءوزىنىڭ باتىس تەرىستىك شەكارا قاراۋىلىن بەلگىلەدى. ەرتىستەن ىلە وزەنىنە دەيىنگى ارالىققا تاس ءۇيىپ قاراۋىل تۇرعىزادى. بۇل ءوڭىر نەگىزىنەن سوناۋ باتىس حان پاتشالىعى كەزىندە قازاقتىڭ ارعى تەگى مەكەندەگەن اتاقونىس جەرلەرى ەدى» (ن. مۇحامەتحان ۇلى. ديپلوماتيالىق قاتىناستار جانە قىتايتانۋ ماسەلەلەرى. الماتى 2010. 29 بەت) دەپ، بۇگىنگى ش ۋ ا ر- عى قازاق حالقى مەكەن ەتكەن ءوڭىردى ەجەلدەن اتا- قونىسىمىز بولعانىن سارالاپ وتەدى.

زادىندا، جوڭعار حاندىعى 1757 - جىلى جويىلعاننان كەيىن اباق كەرەي مەن نايمان رۋلارى ولاردان بوس قالعان القاپقا ابىلاي حاننىڭ پارمەنىمەن كوشىپ بارىپ، قونىستانا باستادى. ابىلاي حان ىلە، تارباعاتاي، ءور التاي وڭىرىنە قازاق كوشىن اگرەسسيالىق جولمەن ەمەس، ديپلوماتيا- لىق جولمەن قونىستاندىردى.

ادەپكىدە، جوڭعارلاردان بوساعان ايماقتى قازاق رۋلارىنىڭ يەمدەنۋىنە چيڭ ۇكىمەتى ادا- كۇدە قارسى تۇردى. ابىلاي حان قازاقتىڭ اتا- قونىسىن قايتارىپ الۋ ءۇشىن كەنجەعارا باستاعان ەلشىلەرىن جىبەرگەندە، چيڭ بيلەۋشىسى: «سەندەر جىبەرگەن ەلشىلەردىڭ مالىمدەمەسىندە تارباعاتاي ءبىزدىڭ بۇرىنعى كوشىپ- قونىپ جۇرگەن جەرىمىز ەدى. ءبىز سىزدەن ءوزىڭىزدىڭ ءىلتيپاتىڭىزدى ءبىلدىرىپ، وسى جەردى بىزگە بەرسەڭىز» دەگەن سوزدەر بار ەكەن. بۇل جەردى ءبىز جاڭادان تىنىشتاندىردىق، كۇنى بۇگىنگى دەيىن بوس تۇر.

ءاسىلى، مەن ول جەردى قيمايتىن ەدىم. دەگەنمەن، سەندەر بىزگە ەندى عانا كەلىپ باعىندىڭدار، ءالى ەشقانداي ەڭبەكتەرىڭ سىڭگەن جوق. مۇنداي جاعدايدا (تالاپ ەتكەن جەردى) وسىلاي بەرە سالساق، مەملەكەتىمىزدىڭ تارتىبىنە ساي كەلمەيدى. ەگەر سەندەر وپاسىز قىلمىسكەر ءامىرسانانى ۇستاپ اكەپ بەرسەڭدەر، وندا مەن ءوز ءىلتيپاتىمدى كورسەتىپ (تالاپ ەتكەن جەردى) سىيلار ەدىم» (مۇحان يساحان، ەلبول رايحان ۇلى. قىتايداعى قازاق قوعامىنىڭ قالىپتاسۋ تاريحى. قازاقستان- Zaman, 13 -شىلدە، 2007 - جىل. چيڭ پاتشاسى گاۋزۇۋن پاتشالىعىنىڭ وردا ەستەلىگى. تايپەي. 1964, 548 توم، 9-10 بەتتەر) دەپ جاۋاپ قاتتى.

بۇدان كەيىن ابىلاي حان اشىق ۇرىسقا بارماۋ ساياساتىن ۇستانا وتىرىپ، بوس جاتقان وڭىرگە بىرتىندەپ ۇلى ءجۇز بەن ورتا ءجۇزدىڭ كەيبىر رۋلارىن كوشىرە باستادى. مۇنى ەستىگەن چيڭ ورداسى، قورعانىس ءمينيسترى ا. گۇيگە بەرگەن جارلىعىندا: «...دەرەۋ اسكەر جىبەرىپ تارباعاتايعا قونىس تەپكەن قازاقتاردى شەكارادان اسىرىپ قۋىڭدار، ابىلايعا ادامدارىن دەرەۋ قايتارىپ اكەتۋدى ايت» (چيڭ پاتشاسى گاۋزۇۋن پاتشالىعىنىڭ وردا ەستەلىگى. تايپەي. 1964, 609 توم، 18 بەت) - دەپ بۇيىردى.

ال ابىلاي حان التاي مەن تارباعاتاي جانە ىلە وڭىرىنە كوشكەن قازاقتى كەرى قايتارۋدىڭ ورنىنا چيڭ پاتشالىعىنا ەلشىلەر اتتاندىرىپ، قالىپتاسىپ وتىرعان جاعدايدى مويىنداۋعا شاقىرادى. وسىعان وراي، 1760 - جىلى چيڭ پاتشاسىنىڭ ورداسى ابىلاي حانعا جاۋاپ حاتىندا: «...سەنىڭ ەلشىلەرىڭنىڭ ايتۋى بويىنشا جوڭعار جەرى قازىر يەن بوس جاتىر. ابىلپەيىستىڭ قول استىنداعى تاڭاتار، قارقارالى، ەسەنگەلدى، جولىمبەت رۋلارى الىن، قاراتال، بارلىقتا تۇرىپ جاتىر، سوندا سەندەر پاتشا جارىلقاعان ۇستىنە جارىلقاي ءتۇسسىن دەپ، ىلەگە بارىپ، قونىستانسىن دەگەن ەكەنسىڭ. تارباعاتاي ءوڭىرى ەجەلدەن جوڭعاردىڭ جەرى. پاتشا ول جەردى قالىڭ قولىمەن بارىپ تىنىشتاندىردى. قازاقتار سەندەردىڭ جەرلەرىڭ ۇلان- عايىر بولعاندىقتان، ءبىزدىڭ شەكارامىزدان وتۋىمىزگە جول جوق. تارباعاتايدى پاتشا ساعان بەرمەگەن ەدى عوي، سەن قالايشا ءوز بىلگەنىڭمەن شىعىسقا قاراي ءورىس جايىپ وتىرسىڭ. جوڭعارلار ول جەردى كەزىندە كۇشپەن تارتىپ العاندا، سەندەر ولاردىڭ ماڭايىنا كەلە الماعان ەدىڭدەر. پاتشا ىلەنى تىنىشتاندىرعاننان كەيىن، سەندەر بەيبىت ءومىر سۇرۋگە مۇمكىندىك الدىڭدار. وسىنى نەگە قاناعات تۇتپايسىڭدار؟» (چيڭ پاتشاسى گاۋزۇۋن پاتشالىعىنىڭ وردا ەستەلىگى. تايپەي. 1964, 613 -توم، 17 -بەت) دەپ جازدى.

چيڭ پاتشالىعىنىڭ بۇلاي شىر- پىر بولۋىنان ابىلاي حاننىڭ ەلدى شىعىسقا قاراي كوشىرىپ، چيڭ پاتشاسىنىڭ مۇنداعى بيلىگىن مويىنداماي وتىرعاندىعىن كورە الامىز. چيڭ پاتشالىعىنىڭ شەكارا بەلگىلەرى رەتىندە ورناتقان باعانالارىن مۇنداعى قازاقتار مويىنداعىسى كەلمەدى. سەبەبى، جوعارىدا ايتىپ وتتىك، التاي مەن تارباعاتاي جانە ىلە بويىن ەجەلدەن قازاقتىڭ كەرەي مەن نايمان جانە البان تايپالارى قونىس ەتكەن بولاتىن.

كوشپەلى وركەنيەتتە شەكارا بەلگىسى بولىپ، اتا-بابالاردىڭ جاتقان زيراتى سانالعان. بۇل وڭىرلەردە كەرەي مەن نايمان جانە البان تايپاسىنىڭ جوڭعارلار جاۋلاپ العانعا دەيىن ءومىر سۇرگەن قانشاما اتا-باباسى جەرلەنگەن بولاتىن. سوندىقتان دا، قازاقتار چيڭ پاتشالىعىنىڭ شەكارا باعانالارىنا پىسقىرىپ تا قارامادى.

قازاقتاردىڭ كوشىپ كەلىپ جاتقان قالىڭ ءنوپىرىن كەرى قايتارۋعا كۇشى كەلمەيتىنىن تۇسىنگەن چيڭ پاتشالىعى اقىرىندا التاي مەن تارباعاتاي جانە ىلە ءوڭىرىن رەسمي تۇردە مۇندا كەلىپ ورنىققان قازاقتارعا بەكىتىپ بەردى. بۇل تۋرالى چيڭ پاتشالىعىنىڭ ابىلاي حانعا جولداعان مىنا حاتىندا ايتىلادى: «...سەندەر بىرنەشە ونداعان جىلداردان بەرى ەپتەپ ىشكەرىلەپ جىلجىپ ەنىپ كەلەسىڭدەر. ءبىزدىڭ گەنەرال شونجارلارىمىزدىڭ ءوتىنىشى بويىنشا ءاسىلى سەندەردى جازاعا تارتۋ كەرەك ەدى. ءبىراق، پاتشا سەندەرگە كەڭپەيىلدىك جاسادى. سەندەردىڭ شەكارا قاراۋىمىزدىڭ بەر جاعىندا جاتقان يەن جەرلەرگە كەلىپ مال باعۋلارىڭا رۇقسات جارلىعىن جاريالادى. بۇنىڭ ءبارى سەندەردىڭ بىزبەن ەلدەسكەندەرىڭ ءۇشىن پاتشانىڭ جاساعان شاپاعاتى. وزدەرىڭ ءوسىپ- وركەندەۋمەن قاتار كورشىلەس ەلدەرمەن دە تاتۋ تۇرىپ، پاتشانىڭ مەيىر- شاپاعاتىنا ماڭگى بولەنە بەرىڭدەر» (چيڭ پاتشاسى گاۋزۇۋن پاتشالىعىنىڭ وردا ەستەلىگى. تايپەي. 1964, 793-توم، 20-بەت) .

ءسويتىپ، ابىلاي حاننىڭ تىنىمسىز تسين چيڭ يمپەرياسىمەن جۇرگىزگەن ديپلوماتيالىق قاجىرلى ساياساتىنىڭ ارقاسىندا كەرەي مەن نايمان جانە البان تايپالارى ءوز اتا- قونىستارىنا قول جەتكىزدى. شامامەن اراعا عاسىرعا جۋىق ۋاقىت سالىپ بارىپ، التاي تاۋىنىڭ كۇنگەي تۇسى مەن تارباعاتاي تاۋى جانە ىلە وزەنىنىڭ جوعارى تۇسىنا دەيىنگى وڭىرىمەن اتا- بابالارىمىز قايتا قاۋىشتى. ءبىراق، وكىنىشتىسى، بۇل جەڭىستى بۇگىنگى «قازاقستان تاريحى» ابىلاي حاننىڭ باعىندىرعان بيىك اسۋلارىنىڭ ءبىرى ءھام XVIII عاسىردىڭ ەكىنشى جارتىسىنداعى الاش بالاسىنىڭ وڭ جامباسىنا كەلگەن ءساتتى جەڭىسى رەتىندە باعالاپ جۇرگەن جوق.

ابىلاي حان ولگەن 1781 - جىلدان كەيىن ونىڭ ۇلدارى قازاق حاندىعىنىڭ تۇتاستىعىن ۇستاپ تۇرا المادى. ابىلمامبەت حاننىڭ ۇلى ابىلپەيىس پەن ابىلايدىڭ ۇلى ءادىل سۇلتاندار التاي مەن تارباعاتاي جانە جەتىسۋ جەرىنە جەكە- دارا يەلىك ەتىپ، سىرتقى جاعدايدا تسين يمپەرياسىنىڭ قۇزىرىنا كىرىپتار بولدى. 1790 - جىلداردان باستاپ، چيڭ يمپەرياسىنا ءور التايدىڭ كۇنگەي تۇسىن مەكەندەگەن اباق كەرەي رۋىنىڭ بيلەۋشىسى ابىلپەيىستىڭ ۇلى كوگەداي حان عانا تىكەلەي باعىنىشتى بولدى.

ال قىزاي مەن ءتورترۋىلدى بيلەگەن ءادىل سۇلتاننىڭ ۇلى ساما تورە ىلە پروۆينسياسىنىڭ گۋبەرناتورىنا باعىندى. بۇل كەزدە چيڭ يمپەرياسى بۇل ايماقتارعا «جاڭا ولكە» (شينجياڭ) دەگەن اتاۋ بەرىپ،قازىرگى شىڭجاندى رەسمي يەمدەنە باستادى. (اسقار تاتاناي ۇلى. تاريحي دەرەك، كەلەلى كەڭەس. شىنجاڭ حالىق باسپاسى. 1993 - جىل)

شىعىس تۇركىستاندا تايپيندەر كوتەرىلىسى بولعان ەمەس

ۇشىنشىدەن، « 1850-1865 - جىلدارى قىتايدا اتاقتى تايپيندەر كوتەرىلىسى بولىپ، ول ءشۇرشىت ەلىنىڭ گانسۋ، نەنسي پروۆينسيالارى مەن شىنجاڭدى تۇگەل قامتىدى» دەگەن دەرەكتە دە اسىرەلەۋ بار.

ءاسىلى، تايپين كوتەرىلىسى گانسۋ مەن نەنسي پروۆينسياسىنداعى جەرگىلىكتى قىتاي شارۋالارىنىڭ چيڭ بيلەۋشىلەرىنىڭ وتارلىق ساياساتىنا نارازىلىعىنان تۋىنداعان بولاتىن. ءبىراق، تايپين كوتەرىلىسى شىنجاڭدى تۇگەل قامتىعان ەمەس. زەرتتەۋشىلەر كوتەرىلىس ايماعى رەتىندە گانسۋ مەن نەنسي پروۆينسيالارىن عانا كورسەتەدى (قاراڭىز: شي سياويۋن. تايپين- تەونگونىڭ كوتەرىلۋى جانە جويىلۋى. حاربين. 2000).

ال «شىنجاڭداعى مۇسىلمان كوتەرىلىسشىلەرى التاي، تارباعاتاي، ىلە قاتارلى ايماقتاردىڭ كوپ جەرىن باسىپ العانى تۋرالى تاريحتا بار. كوتەرىلىس شيەلەنىسە باستاعان كەزدە التاي قازاعىنىڭ كەي بولىگى تەرىسكەيدەگى قوبدا بەتىنە كوشۋگە ءماجبۇر بولدى» دەگەن تۇجىرىممەن كەلىسۋگە بولادى. تاريحتا « دۇنگەندەر كوتەرىلىسى» دەپ اتالاتىن بۇل باس كوتەرۋ تۋرالى زاردىحان قينايات ۇلى: « 1862 - جىلدان باستالعان، باسىندا چيڭ ۇكىمەتىنىڭ وتارشىلىق ساياساتىنا قارسى باعىتتا وربىگەن بۇل كوتەرىلىس بارا- بارا مۇسىلماندىق بەتپەردە جامىلىپ، باتىس قىتاي ولكەسىن جاپپاي قامتىعان ەدى.

كوپتەگەن قازاق اۋىلدارى وسى قاقتىعىستىڭ سالدارىنان جايىلىم جەرىنەن ايىرىلىپ، ىشتەي قونىس اۋدارۋعا ءماجبۇر بولدى. دۇڭگەندەر كوتەرىلىسى شەنسي، گانسۋ سياقتى قىتايدىڭ باتىس ايماقتارىن، شىنجاڭنىڭ كەيبىر ەلدى مەكەندەرىن، قاشقاردى قامتىپ، نايماننىڭ بايجىگىت اۋىلىن تالقانداپ، 1870 - جىلى مۇڭعىل اسىپ، موڭعوليانىڭ باتىس شەبىنە اياق باستى» (زاردىحان قينايات ۇلى. موڭعولياداعى قازاقتار. دۇنيەجۇزى قازاق- تارىنىڭ قاۋىمداستىعى. الماتى 2001. 58-59 بەتتەر) دەپ ساباقتايدى.

سونىمەن بىرگە، زاردىحان اعامىز تايپين كوتەرىلىسىنە قاتىسىپ جازالانعان قىتاي شارۋالارى شىنجاڭعا جەر اۋدارىلىپ، ولارعا قازاق جايىلىمدارىنان جەر ءبولىنىپ بەرىلە باستاعانىن: «ءمانجۋ- چين ءامىرشىسى التايدا جەر تارىلا باستاعانىنا بايلانىستى قازاقتىڭ كەيبىر اۋىلدارىن التايدان شەتكەرىلەتىپ، ءتاڭىرتاۋعا، ەرەنقابىرعاعا، تارباعاتايعا قونىس اۋدارۋ تۋرالى جارلىق شىعاردى. جارلىق بويىنشا ءتاڭىرتاۋعا قونىستانۋ تىزىمىنە تەك قانا جادىكتەن 800 ءتۇتىن، قاراقاستان 150، سارباستان 200 ءتۇتىن ىلىنگەن ەكەن.

كوشپەندى قازاقتار ءۇشىن ەرەنقابىرعا، ءتاڭىرتاۋ ءوتىپ، قىتاي، دۇڭگەنگە قويان- قولتىق كىرگەننەن گورى قوبدا اسۋى الدەقايدا ىڭعايلى، مالىنا جايلى بولاتىن. ءسويتىپ، التايدىڭ كۇن بەتىندە جەردەن تارلىق كورە باستاعان اباق كەرەيدىڭ ءبىر توبى التايدىڭ تەرىسكەي بەتى، بۇرىن جوڭعارلار مەكەندەگەن كەڭ جايىلىمعا قاراي باياۋ جىلجىپ، مالىن وتارلاتا جايلاپ، سوڭىنان قىستاپ قالا باستادى» (زاردىحان قينايات ۇلى. موڭعولياداعى قازاقتار. دۇنيەجۇزى قازاقتارىنىڭ قاۋىمداستىعى. الماتى 2001. 59 بەت) دەپ اباق كەرەي رۋىنىڭ قوبداعا ءوتۋىن تاريحي تۇرعىدان ءدال زەردەلەيدى. ياعني، «تايپين كوتەرىلىسى شىنجاڭدى تۇگەل قامتىدى» دەگەن وي- تۇجىرىم اسىرە ايتىلعانىمەن، وسى كوتەرىلىستىڭ سالدارىنان ءور التايدى مەكەندەگەن قازاقتاردىڭ تەرىسكەي قوبدا بەتىنە قونىس اۋدارعانى تاريحي شىندىققا جاناسادى.

« اباق كەرەي ەرەجەسى» ەمەس،

« ءتورت ءبي، تورە زاڭى» تورتىنشىدەن، ماقالا يەسى اباق كەرەيدىڭ ادەت- عۇرىپ زاڭىن «ەرەجە» دەگەن اتپەن بەرىپتى. سونداي-اق، «1830 - جىلى ءتورت ورىن سايلانعان» دەپ، ەرەجەنىڭ قابىلدانۋ مەزگىلىنە قاتىستى دا جاڭساق دەرەك كورسەتىلگەن. تەگىندە، بۇل زاڭناما 1836 - جىلى « ءتورت ءبي، تورە زاڭى» دەگەن اتپەن قابىلدانعان.

جوعارىدا ايتىپ وتكەن اباق كەرەيدىڭ بيلەۋشىسى كوگەداي 1820 - جىلى قايتىس بولعاننان كەيىن، ورنىنا بالاسى اجى تورە سايلانادى. اجى تورە اكەسىندەي الىمدى بولماعان سوڭ، اباق كەرەيدىڭ بەلدى بيلەرى ەل باسقارۋ ىسىندە تورەلەردىڭ بيلىگىن شەكتەيتىن كونستيتۋتسيالىق مونارحيا ءتۇزىمىن ەنگىزەدى.

بۇل تۋرالى «ءتورت ءبي، تورە زاڭىن» زەرتتەۋشى بيداحمەت مۇقاي ۇلى ءوز ەڭبەگىندە مىناداي دەرەك كەلتىرەدى: «وسكەن ەل ىشىندەگى جادىك، جانتەكەي رۋلارى اجى گۇڭ جول كورسەتىپ، اباق كەرەيدەن ەل باسقاراتىن بيلەر سايلاۋدى ورتاعا قويادى. اقىرى، اباق كەرەيگە سۇيەنىپ كۇن كورىپ كەلە جاتقان اجى گۇڭ وزىنە قولقانات بولماسا ەل باسقارۋدىڭ قيىنعا تۇسەتىنىن سەزىنىپ، 1836 - جىلى بۋىرشىننىڭ «ءۇشتاس» جايلاۋىندا «ءتورت ءبي سايلاۋى» جيىنىن وزدىرادى.

ولار دۇنيە تورتكە توقتايدى دەي كەلىپ، ءتورت ءبي سايلاۋ بەكىمىنە كەلگەن سوڭ، جانتەكەيدىڭ كوكەن مومىت ۇلى، توپان ساتاي ۇلى، جادىكتەن بەيسەنبى دونەنباي ۇلى، قۇلبەك جانتەلى ۇلى قاتارلى ادامدارى «ءتورت بيگە» سايلايدى» (بيداحمەت مۇقاي ۇلى. ءتورت ءبي، تورە زاڭى. مارقۇم تاريحشى ەلبول رايحان ۇلىنان 1949 - جىلى زاڭنامانىڭ توتە جازۋمەن جازىلعان نۇسقاسىن 2005 - جىلعى ءىسساپارىمىزدا كوشىرمەسىن العان بولاتىنبىز).

ال التاي قازاقتارىنىڭ تاريحىن زەرتتەۋشى قوستاي جاقيا ۇلى «بۋىرشىننىڭ ۇشتاس دەگەن جەرىندە بولعان «ءتورت ءبي، تورە زاڭى» القالى قۇرىلتايى 1841 - جىلى بولعان» دەپ كورسەتەدى (قوستاي جاقيا ۇلى. التاي ايماعىنداعى قازاقتاردىڭ ادەپ- عۇرىپ زاڭى تۋرالى. شىنجاڭ قوعامدىق عىلىمى جۋرنالى. № 1. 1992 ج). ايتسە دە، ەكى زەرتتەۋشىنىڭ دەرەگىندە حرونولوگيالىق سايكەسسىزدىك بولعانمەن، اباق كەرەي تايپاسى بۋىرشىننىڭ ءۇشتاسىندا القالى جيىندى وتكىزگەنى انىق.

قازاق قوعامىنداعى ەل باسقارۋ ىسىندە بيلەرگە ايرىقشا مارتەبە بەرىلگەن «ءتورت ءبي، تورە زاڭىنىڭ» نەگىزى «جەتى جارعىدان» الىنعانمەن، بۇل زاڭناما اباق كەرەيدىڭ سول كەزدەگى ىشكى احۋالىنان حابار بەرەتىن قۇندى قۇجات.

«ءتورت ءبي، تورە زاڭى» قازاقتىڭ اتا زاڭدارىنىڭ ىشىندە تورە مەن قاراشانىڭ اراسىنا جارىقشاق تۇسىرمەي، اقسۇيەك پەن قاراپايىم جۇرتشىلىقتى «تەڭدىك» پرينتسيپىنە جۇگىندىرگەن تۇڭعىش زاڭناما. سونىمەن بىرگە، «ءتورت ءبي، تورە زاڭى» كوشپەلى ءومىر قاتىناسىن ءداۋىر تالابىنا ساي رەتتەگەن زاڭناما بولدى دەسەك، قاتەلەسپەيمىز.

ويتكەنى، بۇل قۇقىقتىق قۇجاتتا سول كەزدەگى قازاق قوعامىنىڭ بارلىق ەرەكشەلىكتەرى قامتىلعان. بيداحمەت مۇقاي ۇلى ايتۋىنشا، اباق كەرەي تايپاسىنىڭ 1949 - جىلى قىتايدا كوممۋنيستىك ءتۇزىم ورناعانعا دەيىن «ءتورت ءبي، تورە زاڭىنا» جۇگىنىپ كەلگەن (بيداحمەت مۇقاي ۇلى. ءتورت ءبي، تورە زاڭى. جوعارىدا كورسەتىلگەن ءماتىن). ياعني، «ءتورت ءبي، تورە زاڭى» -التاي قازاقتارىنىڭ عاسىردان استام ۋاقىت قوعامدىق قاتىناستارىن رەتتەپ كەلگەن قۇقىقتىق ەسكەرتكىش.

دەمەك، بۇل زاڭنامانى باعا جەتپەس تاريحي جادىگەر دەپ باعالاعانىمىز ابزال.

ءتۇيىن: تاريح ەرىككەننىڭ ەرمەگى ەمەس. ەگەر، تاريح قويناۋىنا قوزعاۋ سالعىمىز كەلسە، «بابا تاريحقا» وڭ قاباقپەن قاراپ، دۇرىس مەيىرلەنە ءبىلۋىمىز قاجەت. كوگەداي مەن ونىڭ ۇرپاقتارىنىڭ چيڭ پاتشاسىنان گۇڭ (كنياز) مانسابىن الۋى جانە اباق كەرەيدىڭ «ءتورت ءبي، تورە زاڭىن» قابىلداۋى، سونداي-اق، وزگە تايپالار سەكىلدى پروۆينسيا گۋبەرناتورىنا ەمەس، تىكەلەي چيڭ پاتشاسىنا پروتەكتورات جاعدايىندا باعىنا وتىرىپ «سارى نوقتانىڭ اتى» جاساۋى، اباق كەرەيدىڭ ەگەمەندىگى بار شاعىن يەلىك بولعانىن كورسەتەدى.

ءدال وسىنداي شاعىن حاندىق وسى كەزدە قازاق دالاسىنىڭ باتىس وڭىرىندەگى ەدىل مەن جايىق اراسىندا رەسەيگە سىرتىن بەرە وتىرىپ، «بوكەي ورداسى» دەگەن اتپەن قۇرىلعاندىعى بەلگىلى. وكىنىشتىسى، «بوكەي ورداسىن» بۇل ءبىزدىڭ حاندىق، ءبىزدىڭ تاريحىمىز دەپ بىلەمىز. ءبىراق، «اباق كەرەي» يەلىگىن ءبىزدىڭ حاندىق، ءبىزدىڭ ءتول تاريحىمىز دەپ باعامداي الماي ءجۇرمىز. ءاسىلى، «قازاقستان تاريحى» ەلىمىزدىڭ بۇگىنگى شەكاراسىمەن شەكتەلمەۋى ءتيىس. ال وعان كەڭ ارنادا قاراي ءبىلۋ، تاريحشى قاۋىمنىڭ اسىل مىندەتى...

kerey.kz