اڭساۋ نەمەسە التايدىڭ ارجاعىنان كەلگەن حات

استانا. قازاقپارات - عالامتوردىڭ جەتپەيتىن جەرى جوق. ايدىڭ ارعى بەتىندە نە بولىپ جاتقانىن كورىپ، ءبىلىپ وتىراسىز. شەكارانىڭ شەتىندە قالعان اعايىننان ەلەكتروندى پوشتاما كولدەي حات ءتۇستى. اۆتورى - جاپ-جاس جىگىت. ەسبولات مۇحامەتجان دەگەن وتىزعا تولماعان، جيىرمانى جىرلاعان جىگىتپىن دەپ تانىستىرىپتى ءوزىن. ازاماتتىڭ ۇزىن-ىرعالى سالەمىنەن تۇيگەنىم - ەلگە دەگەن كولدەي ساعىنىش ەكەن. ءبىراق ول «اتاجۇرتتى ساعىندىم»، «الماتىعا بارسام عوي» دەپ ەزىلىپ، ەگىلمەپتى. جان-دۇنيەسىن يدىرگەن ساعىنىشىن شاعىن اڭگىمە، وقيعامەن بەرىپتى.

***

سىزدەردە «قارا شاڭىراق» دەگەن تەلەسەريال ءتۇسىرىلىپتى عوي. ءبىز كۇندە كەشكە ينتەرنەتتەن سونى كورەمىز. اتام مەن اپام، اكە-شەشەم، اعام مەن باۋىر-قارىنداستارىم - ءبارىمىز جاتا-جاستانىپ تاماشالايمىز. ءتىپتى جەڭگەلەرىم دە ۇرلانىپ ءجۇرىپ، سەريالعا «كىرىپ» الدى. ءبىر وكىنىشتىسى، عالامتوردا وتىرعاندار اپتاسىنا 4 ءبولىمىن عانا سالادى. الدە، بۇل فيلم سىزدەردە دە تولىق كورسەتىلمەگەن بە؟ ءشولىمىز قانباي ءجۇر.

الماتىعا بارماساق تا، شەكارادان اتتاماساق تا، قازىر قازاقستاننىڭ ەل-جەر، قالا اتاۋلارىمەن، حالىقتىڭ تۇرمىسىمەن، ارتىستەرمەن سىرتتاي تانىس بولىپ قالدىق. ءتىپتى كەيبىر قالىپتاسقان اتاۋلاردىڭ ءوزىن وسى فيلمنەن ەستىپ، جاتتاپ الدىق. جالپى، سىزدەردە ءتىل تازالىعى جاقسى ەكەن. سونداي-اق بۇرىنعى كينولارمەن سالىستىرعاندا، «قارا شاڭىراق» كورۋگە تۇراتىن دۇنيە بولىپ شىعىپتى. ءارتىستىڭ شەبەرلىگى، فيلمنىڭ وقيعاسى، جەلىسى - ءبارى كىسىنى جالىقتىرمايدى.

***

ءبىزدىڭ اۋىلعا الماتىدان بولاتبەك دەگەن اسابا جىگىت كەلدى. قوينى-قونشى تولعان كىتاپ، گازەت-جۋرنال. بۇكىل اۋىل بولىپ، الگى الماتىلىق جىگىت اكەلگەن گازەت-جۋرنالدى جاستانىپ وقىدىق. ارتىق ايتقانىم ەمەس، گازەتتىڭ قاي بەتىندە نە بار، قاي بەتىندە قانداي سۋرەت سالىنعانىن ۇيقىدان وياتىپ سۇراساڭىز، جاڭىلماي ايتىپ بەرەمىن.

قوناقتىڭ قورجىنىندا كەلىپ، بىزگە ازىق بولعان باسىلىم - «قازاق ادەبيەتى»، «ەگەمەن قازاقستان»، «جاس قازاق»، «تۇركىستان»، «ايقىن»، «جەتىسۋ». جۋرنالدار - «جۇلدىز»، «جامبىل»، «اڭىز ادام» سياقتى تاماشا باسىلىمداردىڭ بىرنەشە سانى. اۋىلدا كيريلليتسانى بىلەتىن ادام از ەدى. قازاق «باسقا تۇسسە، باسپاقشىل» دەگەن عوي. ورىس ءارىبىن ەجىكتەپ وقيتىن مەن سياقتى بىرنەشە جىگىت ءبىر-اق كۇندە «ۇستاز» بولىپ شىقتىق. اۋىلداعى توي-تومالاق، سوعىمباسى سياقتى جيىنعا ەل مەنى شاقىرادى. مەنىڭ قولىم تيمەسە، «شاكىرتتەرىم» بارىپ، ءبىر قورجىنباس گازەت-جۋرنالدى تاڭ اتقانشا وقىپ ءجۇر.

جاراس كەمەلجان

«جاس قازاق گازەتى»