ەرجەت باستاعان قىتاي ەلىنىڭ كومانداسى ۇلكەن جەڭىسكە جەتتى
بۇل تۋرالى «حالىق تورابى» حابارلادى. الا دوپتا الىنباعان ەسەسى بار قىتايلاردىڭ بۇل جەڭىسى ارينە ەلەڭ ەتكىزەر جاڭالىق. ونىڭ ۇستىنە ارمەنيانى جەڭىپ وتىر. الايدا، ءبىزدىڭ ايتپاعىمىز بۇل ەمەس.
ەستەرىڭىزدە بولسا قىتايدىڭ وليمپيادالىق فۋتبول قۇراماسىنا قابىلدانعان قازاق قانداسىمىز تۋرالى ايتىلعان ەدى. ول - ەرجەت ەرزات ۇلى. مىنە، ارمەنيامەن بولعان ويىندا قىتايلاردى جەڭىسكە جەتەلەپ، اسەرلى ويىن كورسەتكەن دە سول ەرزات. قۇرامانىڭ نەگىزگى قاقپاشىسى بولىپ ويناعان ول ماتچتا باستان- اياق شەبەرلىك تانىتىپ، بەتپە- بەت كەلگەن تالاي دوپتى قايتارعان. قاقپا الدىنا اكەلگەن تالاي دوپتى ەرجەتتىڭ قولىنا تابىستاپ بەرگەن قارسىلاستارىنىڭ ساعى ابدەن سىنعانى بەلگىلى. قاقپاشى باۋىرىمىز دوپتى قايتارىپ قانا قويماي، ويىننىڭ ءساتتى ورىلۋىنە دە ۇيتقى بولعان.
ايتا كەتەرلىگى ەرجەتتىڭ تالانتىن تانىعان ەۋروپالىقتار ونى ءوز قۇراماسىنا تارتقان بولاتىن. پورتۋگاليانىڭ ءۇشىنشى ليگاسىندا وينايتىن «Gondomar s.c»كومانداسىمەن جارتى جىلدىق كەلىسىمگە قول قويعان. ەرزات ەۋروپا ەسىگىن اشقان تۇڭعىش شىنجاڭدىق فۋتبولشى. پورتۋگالدىق ۇجىمنىڭ قاقپاسىن قورعاۋدى مىندەتىنە العان ول الداعى ۋاقىتتا ءوزىن جاقسى قىرىنان تانىتا السا، ەۋروپا الاڭدارىنا جول اشىلۋى ابدەن مۇمكىن دەگەنبىز. ەرجەت سول ۇمىتتەن شىعىپ، ءوزىن كورسەتە الدى. وسىعان وراي پورتۋگالدىق كلۋب وعان بەرەتىن سىياقىنى جوعارىلاتىپ، بىلتىرعى مامىر ايىندا كەلىسىمدى تاعى ءبىر جىلعا سوزىپ، بيىلعى ماۋسىم ايىنا دەيىن ۇزارتقان بولاتىن.
قازىرگى كۇنى فۋتبولدا الەمدىك ارەنادا كوش باستاپ تۇرعان كريشتيانۋ رونالدۋدىڭ ەلىندە ونەر كورسەتىپ جۇرگەن ەرجەت پورتۋگالدىق فۋتبول سۇيەر قاۋىمنىڭ جاقسى باعاسىنا يە بولىپ ۇلگەردى. وزگە قۇرلىقتا جۇرسە دە قازاق اتىن الەمگە تانىتۋعا كۇش سالعان باۋىرىمىزعا اقجول تىلەيمىز!
ەرجەت 1993 - جىلى شىنجاڭنىڭ تارباعاتاي ايماعىندا تۋىلعان. 2009 - جىلى استانادا وتكەن «پرەزيدەنت كۋبوگىندا» قىتاي جاستار قۇراماسى اتىنان قاتىسىپ، جاقسى قىرىنان تانىلعان. قىتاي پرەمەر ليگاسىنداعى ءبىرقاتار كوماندالاردىڭ جاساعان ۇسىنىستارىنا قاراماي، پورتۋگاليانىڭ تومەنگى ليگا كومانداسىن تاڭداۋىنىڭ سەبەبىن ول «ەۋروپادا ويناۋ - بۇرىننان بەرگى ارمانىم. سول ءۇشىن ەۋروپاعا بارامىن» ، - دەپ تۇسىندىرگەن.
ايتا كەتەيىك، «Gondomar s.c»كومانداسى 1921 - جىلى قۇرىلعان. پورتۋ ايماعىنداعى Gondomar قالاسىنا ورنالاسقان. بۇل كوماندا بۇرىن پورتۋگاليانىڭ ا دارەجەلى ليگاسىندا ويناعان. كەيىن كەلىسىلگەن ماتچتارعا قاتىسى بار دەگەن شەشىمنەن سوڭ تومەنگى ليگاعا تۇسىرىلگەن.
دايىنداعان مۇرات الماسبەك ۇلى