استانادا «كوڭىلدى كوكتەم مەيرامى» اتتى گالا- كونسەرتتە قىتايلىق ونەرپازدار ونەر كورسەتتى - فوتو

استانا. قازاقپارات - استاناداعى «بەيبىتشىلىك جانە كەلىسىم» سارايىندا قىتاي ەلشىلىگىنىڭ ۇيىمداستىرۋىمەن «كوڭىلدى كوكتەم مەيرامى» اتتى گالا- كونسەرتى ءوتتى.

 قىتايدىڭ ءداستۇرلى جاڭا جىلىنىڭ قارساڭىندا وتكىزىلىپ وتىرعان ءىس- شاراعا ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن قازاقستانداعى قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى چجان حان حۋەي ارنايى كەلىپ قاتىستى. سونداي- اق، قىتاي مادەنيەتىنە قىزىعۋشىلىق تانىتقان قازاقستاندىقتار، قىتاي ازاماتتارى جانە استاناداعى وزگە دە ەلشىلىكتەر وكىلدەرى مەرەكەلىك كەشتى تاماشالادى.

گالا- كونسەرتتىڭ اشىلۋ سالتاناتىندا ءسوز العان قىتاي ەلشىسى چجان حان حۋەي ۇلتتىق ءتول مەيرامنىڭ شەتەلدە وسىلاي تويلانىپ جاتۋىنىڭ ماڭىزدىلىعىنا توقتالدى. «كوكتەم مەيرامى - قىتايدىڭ ءداستۇرلى مەرەكەسى. ول 4000  جىلدان بەرى تويلانىپ كەلە جاتىر. بۇل مەيرام - قازاق ەلىنىڭ ناۋرىز مەيرامى سياقتى بەرەكە مەن بىرلىكتى وزەك ەتكەن مەرەكە. سوندىقتان دا، ءداستۇرلى مەيرامدى بىرلىكتە اتاپ ءوتۋ، قىتاي حالقىنىڭ قازاق ەلىمەن جانە الەم حالىقتارىمەن قۋانىشتى بىرگە تويلايتىن، بەيبىتشىلىك سۇيگىش ەل ەكەندىگىنىڭ ءبىر كورىنىسى» ، - دەپ اتاپ ءوتتى قىتاي ەلشىسى.

 ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوز كەزەگىندە قىتاي حالقىن جاڭا جىلدارىمەن قۇتتىقتاي وتىرىپ، كوكتەمنىڭ كوڭىلدى مەيرامى «ءشۇن جيە» وسى ەلدەگى ەڭ اۋقىمدى تويلاناتىن، سالتاناتتى داستۇرلەرىنىڭ ءبىرى ەكەندىگىن ايتتى. «ۇلى جىبەك جولى بويىنا ورىنالاسقان ەكى ەلدىڭ ساۋدا جانە مادەني قارىم- قاتىناستارى ەجەلدەن- اق قالىپتاسقان. بۇگىنگى جاھاندانۋ جاعدايىندا ونى ودان ارى دامىتا ءتۇسۋ - ورىندى ءىس. ءبىز وسكەلەڭ ۇرپاققا دوستىق پەن ىزگىلىكتىڭ رۋحىن، كەلىسىم مادەنيەتىن ءداستۇر رەتىندە مۇرا ەتىپ قالدىرۋعا ءتيىسپىز» ، - دەدى ارىستانبەك مۇحامەدي ۇلى.

 ايتا كەتەيىك، قىتايدىڭ كوكتەم مەيرامى استانادا قاتارىنان 6- رەت ۇيىمداستىرىلىپ وتىر. گالا- كونسەرتتە «چجەنچجوۋ» ءبي جانە ءان تەاترىنىڭ ارتىستەرى، «شاولين تاگوۋ» جاۋىنگەرلىك ونەر مەكتەبىنىڭ وقۋشىلارى قازاقستاندىق كورەرمەندەر الدىندا ءداستۇرلى قىتاي بيلەرىن ورىنداپ، شاولين كۋنگ- فۋ ونەرىن كورسەتتى.

 كونسەرتتە شاوليننىڭ 18 قارۋ جاراعى مەن ۋ- شۋدىڭ شەبەرلەرلىك ادىستەرى كورەرمەنگە ۇسىنىلدى. ەرحۋ، سۋونا اسپاپتارىندا قىتاي تۋىندىلارىمەن قاتار قازاقتىڭ دا اۋەندەرى ويناتىلدى.

 

 باقىتجول كاكەش