قىتايدا قازاق تىلىندەگى باسىلىمدار سانىن كوبەيتۋ ماسەلەسى قولعا الىنباق

بەيجىڭ. قازاقپارات - قىتايدا قازاق تىلىندەگى باسىلىمدار سانىن كوبەيتۋ ماسەلەلەرى زەردەلەنۋدە. بۇل تۋرالى اسپان استى ەلى استاناسىندا بولعان قازاقستاندىق جۋرناليستەرمەن كەزدەسۋ بارىسىندا ق ح ر شەت تىلدەردە شىعاتىن ادەبيەت باسپاسى باسقارماسىنىڭ باستىعى چجوۋ مينۆەي حابارلادى.

«قىتايدا قازاق تىلىندە باسىلىمدار از شىعاتىنى وكىنىشتى. قىتاي تۋرالى قازاق ءتىلدى باسىلىمدار سانىن كوبەيتكىمىز كەلەدى. مۇنى شەشۋدىڭ ەكى ءتيىمدى جولى بار دەپ ويلايمىن. ءبىرىنشىسى - ءبىزدىڭ باسقارمانىڭ قازاقستاندىق باسپالارمەن ىنتىماقتاستىعىن دامىتۋ. ەكىنشى جولى - ەكى ەلدىڭ ۇكىمەتتەرى تاراپىنان مەملەكەتتىك قولداۋ الۋ»، - دەدى ول، قازاقستاننان كەلگەن قوناقتاردىڭ سۇراعىنا جاۋاپ بەرۋ بارىسىندا.

«ارينە، قىتاي، قازاق تىلدەرىن جەتىك بىلەتىن اۋدارماشىلار قاجەت»، - دەپ تۇيىندەدى ءسوزىن.

ق ح ر شەت تىلدەردە ادەبيەت شىعاراتىن باسپا جىل سايىن 11 تىلدە 5 مىڭنان استام كىتاپ جانە باسقا دا ماتەريالدار شىعارادى، ونىڭ باسشىلىعىمەن 27 جۋرنال شىعارىلادى، ءتۇرلى باعىتتاعى 33 ۆەبسايت جۇمىس ىستەيدى.

ەسكە سالساق، «حابار»، 24.kz تەلەارنالارى، «قازاقستان» ت ر ك، «ەگەمەن قازاقستان»، «كازاحستانسكايا پراۆدا»، «ەكسپرەسس ك»، «ليتەر»، «كاراۆان»، «ۆرەميا»، «دەلوۆوي كازاحستان» گازەتتەرى، «قازاقپارات» ح ا ا باسپا ءسوز تۇرىن بەيجىڭ، شانحاي، چۋنتسين قالالارىندا «جىبەك جولى بويىنداعى ەكونوميكالىق بەلدەۋ» باستاماسىن ىسكە اسىرۋ اياسىندا مەديالىق سالادا ەكى ەلدىڭ ىنتىماقتاستىعىن نىعايتۋ ماقساتىندا ق ر-داعى ق ح ر ەلشىلىگى، مەملەكەتتىك كەڭەس باسپا ءسوز كەڭسەسى، قىتايداعى شەت تىلدەردە ادەبيەت شىعاراتىن باسقارما ۇيىمداستىردى.