قىتايدا «قازاق تاريحىنىڭ دەرەكتەرى» كىتابى جارىققا شىقتى
مۇناي ءابىلباي ۇلى شاكىرتىنە كىتاپتى كوركەمدەۋدىڭ قىر سىرىن ۇيرەتىپ جاتىر. قىزىعى مەن شىجىعى قاتار جۇرەتىن باسپادا جۇمىس ىستەگەلى وتىز جىلعا جۋىقتادى. قازىر قازاقشا كىتاپتىڭ ساۋاتتى شىعۋىنا جاۋاپتى - اعا رەداكتور. بيىل رەداكسيا «قازاق تاريحىنىڭ دەرەكتەرى» دەگەن 3 تومدىقتى شىعاردى. بۇل وسى جىلدىڭ ەڭ سۇبەلى ەڭبەگى بولدى دەپ وتىر.
مۇناي ءابىلباي ۇلى، بەيجىڭ ۇلتتار باسپاسى قازاق رەداكسياسىنىڭ اعا رەداكتورى:
- بىزدە 24 تاريح دەگەن كىتاپ بولعان قىتاي تىلىندە. سول 24 تاريحتىڭ ىشىندەگى قازاققا قاتىستى جەرلەرىن كولەمدەپ، اۋدارىپ، بۇگىنگى وقىرمانعا ۇسىنىپ وتىرعان كىتاپ.
- قىتايداعى ۇلتتار باسپاسىندا ق ر پرەزيدەنتى ن. نازاربايەۆتىڭ 7 بىردەي كىتابى جارىققا شىققان. سونىڭ ءبىرى «ەلىن سۇيگەن، ەلى سۇيگەن ەلباسى» كىتابى تازا قىتايشا جارىق كورگەن، ال «قازاقستان جولى» توتە جازۋمەن باسىلىپ، 3000 دانا بولىپ تاراعان ەكەن. بۇدان بولەك «سىندارلى ون جىل» ، «تاريح تولقىنىندا»، «ەۋرازيا جۇرەگىندە» ت. ب. كىتاپتارى دا بار مۇندا.
باقىتبەك توقتاسىن ۇلى، بەيجىڭ ۇلتتار باسپاسى قازاق رەداكسياسىنىڭ جەتەكشىسى:
- وقىرماندار جاقسى قابىلدادى. قازاقستاننىڭ ەگەمەندى بولعاننان كەيىنگى ساياسي وزگەرىستەرىنە تولىق حاباردار دەسەك تە بولادى. ەكى ەلدىڭ قازىرگى تاتۋ كورشىلىگى، ەكونوميكالىق بايلانىستارمەن كۇشەيۋىمەن قوسا، گۋمانيتارلىق بايلانىستاردىڭ كۇن سايىن جاندانىپ جاڭعىرۋىنا وراي تالاي- تالاي كىتاپ جوباعا دا الىپ وتىرمىز.
باسپادا ءبىر جىلدا قازاق قالامگەرلەرىنىڭ ءۇش جۇزدەن استام تۋىندىسى ءتارجىمالانىپ جانە ءتۇپ نۇسقاسىمەن باسىلىپ شىعادى ەكەن. بۇدان بولەك قازاق اۋىز ادەبيەتىنىڭ تاريحى مەن ماقال- ماتەلدەردىڭ بىرنەشە تومى جارىق كورگەن. بالالار ادەبيەتى دە ۇمىت بولعان جوق.
ءتىلشى: نۇربەك بەكەن
وپەراتور: جان سۋي
«حابار» تەلەارناسى