ءماجىلىس ءتوراعاسى: مەن قۇرىلىسشى رەتىندە ايتايىن، ەلىمىزدەگى باسپانا قۇرىلىسىنداعى قازىرگى ساپا نولگە تەڭ

استانا. قازاقپارات - بۇگىن ءماجىلىستىڭ جالپى وتىرىسىندا تۇرعىن ءۇي قاتىناستارىنا ارنالعان زاڭ جوباسىن تالقىلاۋ بارىسىندا پالاتا سپيكەرى قابيبوللا جاقىپوۆ ەلىمىزدە سالىنىپ جاتقان باسپانالاردىڭ، عيماراتتاردىڭ قۇرىلىسىنا قاتىستى سىن ايتتى.

«بولات بيداحمەت ۇلى، باسپانا ماسەلەسە اسا وتكىر، وسى پروبلەماعا وتە-موتە ماڭىز بەرۋىڭىزدى سۇرايمىن»، - دەدى پالاتا ءتوراعاسى وڭىرلىك دامۋ مينيسترىنە قاراتا ايتقان سوزىندە.

«ەكىنشىدەن، دەپۋتاتتاردىڭ باسىم بولىگى كوتەرىپ وتىرعانىنداي، قازىر ەلىمىزدە سالىنىپ جاتقان باسپانا ساپاسى مۇلدەم سىن كوتەرمەيدى. ءبىز داۋىل مەن جاۋىن-شاشىن بولسا سول ۇيلەرگە ۇدەرە نازار اۋداراتىن بولدىق، جەل تۇرسا ءبىتتى شاتىرلار ۇشا باستايدى. كەيىن سول شاتىرلاردىڭ ءوزىن قايتا سالۋعا ميلليونداعان قاراجات شىعىندايمىز. بۇل قالاي؟ قاراپايىم ماسەلە ەمەس پە ەدى؟ مەن قۇرىلىسشى رەتىندە ايتايىن، قازىرگى ساپا نولگە تەڭ. بۇعان دەيىن دە ءتۇرلى عيماراتتاردى، باسپانادان باستاپ زاۋىتتارعا دەيىن سالىپ جۇردىك قوي. دەگەنمەن، بۇگىنگىدەي بىلىق بولعان ەمەس»، دەدى ق. جاقىپوۆ.

سونىمەن قاتار، پالاتا ءتوراعاسى مينيسترگە قۇرىلىس سالۋ بارىسىندا ونىڭ ساپاسىن ءبىرىنشى ورىنعا قويۋدىڭ قاجەتتىگىن قاتاڭ ەسكەرتتى.

 

اۆتور: قانات مامەتقازى ۇلى