«ارسەلورميتتال تەمىرتاۋدىڭ» ورنىنا كەلۋگە نيەتتى ينۆەستورلار قىتاي مەن رەسەيدەن، تاياۋ شىعىستان حابارلاسىپ جاتىر - رايمبەك باتالوۆ
«اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى رايمبەك باتالوۆ «ارسەلورميتتال تەمىرتاۋ» كومپانياسىنىڭ ورنىنا ينۆەستور بولۋعا نيەتتى كومپانيالار الەمنىڭ قاي ەلدەرىنەن حابارلاسىپ جاتقانىن ايتتى، دەپ حابارلايدى Kazinform اگەنتتىگى.
ازياداعى ءوزارا ءىس- قيمىل جانە سەنىم شارالارى جونىندەگى كەڭەستىڭ سەگىزىنشى بيزنەس فورۋمىندا ازىق- تۇلىك قاۋىپسىزدىگى، جاسىل ەنەرگەتيكا ماسەلەسى تالقىلانىپ جاتىر. شارا كەزىندە ب ا ق وكىلدەرىنىڭ ساۋالىنا جاۋاپ بەرگەن رايمبەك باتالوۆ «ارسەلورميتتال تەمىرتاۋ» كومپانياسىنىڭ ورنىنا كەلۋگە نيەتتى ينۆەستورلار «اتامەكەن» پالاتاسىنا دا ۇسىنىستار ءتۇسىرىپ جاتقانىن ايتتى.
«ۇلتتىق پالاتادا ۇلتتىق بيزنەستەن دە، شەتەل بيزنەسىنەن دە «كارمەت كومبيناتقا» ينۆەستيتسيا سالۋ ماسەلەسى بويىنشا تۇسكەن ۇسىنىستار بار. بۇلار - شىعىستىڭ، رەسەي فەدەراتسياسىنىڭ، قىتايدىڭ، تاياۋ شىعىستىڭ ينۆەستورلارى. بۇل ينۆەستورلار «كارمەت كومبيناتتى» ينۆەستيتسيا سالاتىن كاسىپورىن رەتىندە قاراستىرىپ وتىر. ءبىراق ۇكىمەت شەشىم قابىلدايدى دەپ ويلايمىن. ءبىز ۇلتتىق پالاتا رەتىندە وسى اقپاراتتاردى بەرەمىز. ول اقپاراتتى ۇكىمەت ەسكەرەدى دەپ ۇمىتتەنەمىن»، - دەدى پالاتا باسشىسى.
اۆتور
ەسىمجان ناقتىباي