اقمولا وبلىسىنىڭ شالعاي اۋدانىندا كۇردەلى وتا ءساتتى جاسالدى

كوكشەتاۋ. KAZINFORM - اقمولا وبلىسىنىڭ جاقسى اۋداندىق اۋرۋحاناسىنىڭ دارىگەرلەرى يليزاروۆ اپپاراتىنىڭ كومەگىمەن 38 جاستاعى ناۋقاستىڭ سول اياعىنىڭ اسىقتى جىلىگىنىڭ اشىق كوپجارىلى سىنىعىنا وتا جاسادى.

اقمولا وبلىسى دەنەساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، ناۋقاس اياعىن ابايسىزدا، باسپالداقتان قۇلاپ سىندىرىپ العان. ءبىر جارىم ساعاتقا سوزىلعانى وتانى جەرگىلىكتى اۋرۋحانانىڭ ەكى حيرۋرگى - حيرۋرگيا ءبولىمىنىڭ مەڭگەرۋشىسى امانجول نۇرمۇحامەتوۆ جانە ەمدەۋ ءىسى جونىندەگى باس دارىگەردىڭ ورىنباسارى جانايدار قاجدەنبەكوۆ جۇرگىزدى.

«يليزاروۆ اپپاراتى ارقىلى جاسالاتىن سۇيەك ديستراكتسيالىق وستەوسينتەز وتاسى ۇزىن تۇتىك ءتارىزدى سۇيەكتەردىڭ اشىق سىنۋىن ەمدەۋدەگى الەمدىك ستاندارتى بولىپ تابىلادى. بۇل ءادىس ناۋقاستىڭ وتادان كەيىنگى كۇنى-اق بەلسەندىلىك تانىتىپ، وتا جاسالعان اياققا تۇرۋىنا مۇمكىندىك بەرەدى، ۇزاق توسەك تارتىپ جاتۋدىڭ الدىن الادى»، - دەپ ءتۇسىندىردى حيرۋرگ امانجول نۇرمۇحامەتوۆ.

جالپى، جاقسى اۋداندىق اۋرۋحاناسىنىڭ حيرۋرگيا بولىمىندە ەكسترامەدۋليارلىق وستەوسينتەز، ءوت جولى تاستارىنا، جارىقتارعا جانە گەموررويدەكتومياعا قاتىستى كۇردەلى وتالار دا جاسالادى. سونىمەن بىرگە، تاۋلىك بويى شۇعىل حيرۋرگيالىق جانە گينەكولوگيالىق كومەك كورسەتىلەدى.

«ءبىز حيرۋرگيالىق بازامىزدى بەلسەندى تۇردە دامىتىپ جاتىرمىز جانە الداعى ۋاقىتتا جاڭا ينترامەدۋليارلىق وستەوسينتەز ءادىسىن ەنگىزۋدى جوسپارلاپ وتىرمىز. ول ءۇشىن قاجەتتى قۇرال-جابدىقتار مەن ماتەريالدار ساتىپ الىپ جاتىرمىز»، - دەپ تولىقتىردى حيرۋرگ.

سوڭعى ەكى ايدا جاقسى اۋداندىق اۋرۋحاناسىنىڭ حيرۋرگيا بولىمىندە دارىگەرلەر 50-دەن استام وتا جاسادى. بۇل جەرگىلىكتى مەديتسينا قىزمەتكەرلەرىنىڭ جوعارى بىلىكتىلىگى مەن تاجىريبەسىنىڭ جوعارى ەكەنىن كورسەتەدى.

ايتا كەتسەك، بۇدان بۇرىن «وقجەتپەس» ەمدەۋ-ساۋىقتىرۋ كەشەنىندە قىزمەت اياسى كەڭەيىپ كەلە جاتقاندىعىن جازعان ەدىك.

اۆتور
اسلان وسپانوۆ