پاۆلودار وبلىسىندا جىلقىنىڭ جاڭا ءتيپى ءوسىرىلىپ جاتىر
پاۆلودار. KAZINFORM - پاۆلودار وبلىسىندا 292 مىڭنان استام جىلقى وسىرىلەدى. ونىڭ 5,5 مىڭ اسىل تۇقىمدى، بۇل - جالپى جىلقى باسىنىڭ شامامەن %2,4 ى.
ەرتىس- بايان وڭىرىندە جىلقى شارۋاشىلىعى سالاسى قارقىندى دامىپ كەلەدى. قازىرگى ۋاقىتتا جىلقى سانى 292 مىڭعا جەتىپ وتىر. سوڭعى جىلدارى مال باسىنىڭ تۇراقتى ءوسۋى بايقالادى، جىلىنا ورتا ەسەپپەن %7 عا ءوسىپ وتىرعانى تىركەلدى. وڭىردە جىلقى شارۋاشىلىعىمەن اينالىساتىن اۋىل شارۋاشىلىعى قۇرىلىمدارىنىڭ سانى مىڭنان اسادى.
عالىمدار الداعى 10-15 جىلدا ەلىمىزدەگى قىلقۇيرىقتىلاردىڭ سانى 10 ميلليوننان اسادى دەپ بولجاپ وتىر. بۇعان ەلىمىزدەگى جايىلىمدىق جەرلەر مۇمكىندىك بەرەدى. ەندىگى جەردە قازاق جىلقىسىنىڭ ساپا تۇرعىسىنداعى كورسەتكىشتەرىن ارتتىرۋ ماڭىزدى.
تورايعىروۆ ۋنيۆەرسيتەتىنىڭ قاۋىمداستىرىلعان پروفەسسورى، پاۆلودار وبلىستىق جىلقى وسىرۋشىلەر قاۋىمداستىعىنىڭ ءتوراعاسى تولەگەن اسانبايەۆتىڭ سوزىنشە، پاۆلودارلىق عالىمدار مەن جىلقى وسىرۋشىلەر بىرلەسە وتىرىپ، تاۋلى التايدان اكەلىنگەن جاڭاالتاي جىلقىسىنىڭ ايعىرىن قازاقتىڭ بيەلەرىمەن بۋدانداستىرعان. جاڭاالتايلىق تۇقىمنىڭ گەنوتيپىندە التايلىق، كەڭەستىك، ورىس، ليتۆالىق اۋىر جۇك تارتاتىن جىلقى تۇقىمدارىنىڭ قانى بار.
«بۇل تۇقىمداردىڭ گەنەتيكالىق پوتەنتسيالى جوعارى، تىرىدەي سالماعى 600-دەن 1000 ك گ-عا دەيىن جەتەدى. ال سۇتتىلىگى - 4 مىڭنان 7 مىڭ ليترگە دەيىن. ماڭىزدىسى، بۇل تۇقىم جىل بويى تەبىندى جايىلىمعا بەيىمدەلگەن ءارى بۇل جاعىنان قازاق جىلقىلارىنان كەم تۇسپەيدى. ەگەر وسى قاسيەتتەر قازاق جىلقىلارىنا دارىسا، ولاردىڭ سۇتتىلىك قابىلەتى ودان ءارى ارتا تۇسەدى. ءونىمدى باعىتتاعى اسىل تۇقىمدى جىلقىلار وبلىستىڭ بارلىق وڭىرلەرىندە وسىرىلەدى. جەرگىلىكتى جىلقى تۇقىمدارىنىڭ اسىل تۇقىمدى جانە ءونىمدى قاسيەتتەرىن جەتىلدىرۋ ماقساتىندا شارۋاشىلىقتاردا تابىنداردا ۇستاعان كەزدە «جابە» ءتيپتى قازاق تۇقىمىنىڭ جوعارى ءونىمدى ايعىرلارىنىڭ قارقىندى گەنەتيكالىق مۇمكىندىگى قولدانىلادى»، - دەيدى عالىم.
وبلىستا 5,5 مىڭ اسىل تۇقىمدى جىلقى بار، بۇل - جالپى جىلقى باسىنىڭ شامامەن %2,4 ى.
ەسكە سالا كەتەيىك، وتاندىق جىلقى تۇقىمىن ساقتاۋ جانە كوبەيتۋگە 701 ميلليون تەڭگە بولىنەدى.