الەمنىڭ 1-راكەتكاسىنىڭ تابىسى رەكوردتىق كولەمگە جەتتى

الەمنىڭ 1-راكەتكاسى، «ۇلكەن دۋلىعا» تۋرنيرىنىڭ 24 دۇركىن چەمپيونى، سەربيالىق نوۆاك دجوكوۆيچ يتاليانىڭ تۋرين قالاسىندا وتكەن بيىلعى جىلدىڭ قورىتىندى تۋرنيرىندە 4,4 ميلليون دوللار كولەمىندە تابىس تاپتى، دەپ حابارلايدى Kazinform.

ATP Tour مالىمەتىنە قاراعاندا، سەربيالىق تەننيسشى بيىل جالپى 16 ميلليون دوللار ولجالادى.

سپورتتىق جولىندا ن. دجوكوۆيچ تاپقان تابىسىن 180,6 ميلليون دوللارعا جەتكىزدى. بۇل - رەكوردتىق كورسەتكىش.

تۋريندەگى ATP قورىتىندى تۋرنيرىندە دجوكوۆيچ فينالدا يتاليالىق ياننيك سيننەردى 6:3، 6:3 ەسەبىمەن تىزە بۇكتىردى. سولاي، اتالمىش جارىستى جەتى رەت ۇتقان العاشقى تەننيسشى اتاندى. يا. سيننەر تۋريندە 2,6 ميلليون دوللار تابىس تاپتى. سپورتتىق جولىنداعى تابىسى - 14,9 ميلليون دوللار.

نوۆاك دجوكوۆيچ الداعى جىلى سپورتتىق جولىن جالعاستىراتىنىن، «ۇلكەن دۋلىعا» سىندى ءىرى جارىستاردا، سونداي-اق وليمپيادا ويىندارىندا ونەر كورسەتۋدى جوسپارلاپ وتىرعانىن مالىمدەدى.

ەسكە سالا كەتەيىك، بۇدان بۇرىن بەيبىت جۇقايەۆ الەمدىك رەيتينگىدە جەكە رەكوردىن جاڭارتقانىن جازعان بولاتىنبىز.